അറിയാതെ പോകരുത് ജോജുവിനെ; അംബിക റാവുവിന്റെ ചികിത്സയ്ക്ക് മനസ്സറിഞ്ഞ് സംഭാവന നൽകി താരം

കുമ്പളങ്ങി നൈറ്റ്‌സിലെ സിമിയുടെ അമ്മയായി, ഷമ്മിയുടെ അമ്മായിയമ്മയായി വേഷമിട്ട് പ്രേക്ഷകരുടെ മനസ്സിലിടം നേടിയ താരമാണ് അംബിക റാവു. ഇന്നിപ്പോൾ വൃക്ക സംബന്ധമായ രോഗത്തിന് ചികിത്സയിൽ കഴിയുകയാണ് അംബിക. ഇവരുടെ ചികിത്സാർത്ഥം സംഭാവന സ്വരൂപിക്കാനുള്ള ഉദ്യമത്തിലാണ് സിനിമാ ലോകവും സഹപ്രവർത്തകരും

കഴിഞ്ഞ കുറേ ദിവസങ്ങളായി അംബിക റാവുവിന്റെ ബാങ്ക് അക്കൗണ്ട് വിവരങ്ങൾ സോഷ്യൽ മീഡിയയിൽ ഷെയർ ചെയ്യപ്പെടുകയാണ്. ഒട്ടേറെപ്പേർ ഈ സന്ദേശം കൈമാറുകയും ചെയ്യുന്നു. എന്നാൽ അതിനിടയിൽ നടൻ ജോജു നൽകിയ സംഭാവനയുടെ വിവരം വെളിപ്പെടുത്തുകയാണ് സംവിധായകൻ സാജിദ് യഹിയ

അംബിക റാവുവിന്റെ അക്കൗണ്ട് വിവരങ്ങൾ കൈമാറിയപ്പോൾ ഒരു വലിയ തുക സംഭാവനയായി നാളെത്തന്നെ നൽകാം എന്ന ഉറപ്പായിരുന്നു ജോജുവിന്റെ മറുപടി. "നന്ദി ജോജു ഏട്ടാ, ആ നല്ല മനസ്സിന്" എന്ന ക്യാപ്ഷ്യനോടുകൂടിയാണ് സാജിദ് ആ വാട്സാപ്പ് ചാറ്റിന്റെ സ്ക്രീൻഷോട്ട് പുറത്തുവിട്ടത്. ആ പോസ്റ്റും ജോജു നൽകാമെന്നേറ്റ തുകയും ചുവടെ ചേർക്കുന്നു

കൂടുതലൊന്നും ചോദിക്കുകയോ പറയുകയോ ചെയ്യാതെ ഒരു ലക്ഷം രൂപ നാളെയിടാം എന്നാണ് ജോജു നൽകിയ മറുപടി. ഇതാണ് സാജിദ് യഹിയ പോസ്റ്റ് ചെയ്ത സ്ക്രീൻഷോട്ട്

നിലവിൽ 'പീസ്' എന്ന സിനിമയുടെ ചിത്രീകരണ തിരക്കിലാണ് ജോജു. ജോജുവിന്റേതായി വേറെയും ചിത്രങ്ങൾ അണിയറയിൽ ഒരുങ്ങുന്നുണ്ട്

അടുത്തിടെ ഡിജിറ്റൽ റിലീസ് ചെയ്യപ്പെട്ട 'ഒരു ഹലാൽ ലവ് സ്റ്റോറി' ആണ് ജോജുവിന്റെ ഏറ്റവും പുതിയ ചിത്രം