Love Today | 'ലവ് ടുഡേ'യും ബോളിവുഡിലേക്ക് ; ശ്രീദേവിയുടെ മകളും ആമിര്‍ഖാന്‍റെ മകനും നായികാ നായകന്മാര്‍

കഴിഞ്ഞ വര്‍ഷം തമിഴ് സിനിമാ ലോകം കണ്ട ഏറ്റവും വലിയ സര്‍പ്രൈസ് ഹിറ്റായിരുന്നു ലവ് ടുഡേ. ജയം രവിയെ നായകനാക്കി കോമാളി എന്ന ചിത്രം ഒരുക്കിയ പ്രദീപ് രംഗനാഥന്‍ സംവിധാനം ചെയ്ത് നായകനായെത്തിയ ചിത്രമായിരുന്നു ഇത്. മലയാളി താരം ഇവാനയായിരുന്നു നായിക.

വലിയ താരനിരയൊന്നുമില്ലാതെ അഞ്ച് കോടി ബജറ്റില്‍ എജിഎസ് എന്‍റര്‍ടൈന്‍മെന്‍സ് നിര്‍മ്മിച്ച ചിത്രം ഏകദേശം 150 കോടിയോളം രൂപയാണ് കളക്ഷന്‍ നേടിയത്. തിയേറ്ററിന് പിന്നാവെ ഒടിടി റിലീസ് ചെയ്ത ചിത്രം മറ്റ് ഭാഷകളിലും ശ്രദ്ധിക്കപ്പെട്ടു. ഇപ്പോഴിതാ ചിത്രം ഹിന്ദിയിലേക്ക് റീമേക്ക് ചെയ്യുന്നു എന്ന വാര്‍ത്തയാണ് പുറത്തുവരുന്നത്.

ഹിന്ദിയിലെ പ്രമുഖ പ്രൊഡക്ഷന്‍ കമ്പനിയായ ഫാന്റം സ്റ്റുഡിയോസ് നിർമ്മിക്കുന്ന ലവ് ടുഡേയുടെ ബോളിവുഡ് പതിപ്പില്‍ ആമിർ ഖാന്റെ മൂത്ത മകൻ ജുനൈദും ബോണി കപൂറിന്റെയും ശ്രീദേവിയുടെയും ഇളയ മകൾ ഖുഷി കപൂറും പ്രധാന വേഷങ്ങളിലെത്തുമെന്നാണ് സൂചന.

റിലീസിനൊരുങ്ങുന്ന യഷ് രാജ് ഫിലീംസിന്‍റെ മഹാരാജ എന്ന ചിത്രത്തില്‍ ജുനൈദ് അഭിനയിച്ചിട്ടുണ്ട്.

ലവ് ടുഡേയുടെ റീമേക്ക് ഖുഷിയുടെ രണ്ടാമത്തെ ചിത്രമാകും; അഗസ്ത്യ നന്ദ, സുഹാന ഖാൻ എന്നിവർക്കൊപ്പം സോയ അക്തറിന്റെ 'ദി ആർച്ചീസ്' എന്ന ചിത്രത്തിലൂടെയാണ് അവർ അരങ്ങേറ്റം കുറിക്കുന്നത്.

ബോണി കപൂറിന്‍റെയും ശ്രീദേവിയുടെയും മൂത്തമകളായ ജാന്‍വി ബോളിവുഡിലെ ഇപ്പോഴത്തെ മുന്‍നിര നായികമാരിലൊരാളാണ്. ജൂനിയര്‍ എന്‍ടിആറിന്‍റെ പുതിയ ചിത്രത്തിലൂടെ തെലുങ്ക് സിനിമയില്‍ അരങ്ങേറുകയാണ് ജാന്‍വി.