Nysa Devgn| മകൾ ബോളിവുഡിലേക്ക് വരുമോ? വാർത്തകളോട് പ്രതികരിച്ച് കാജോൾ

മാതാപിതാക്കളുടെ ചുവടുപിടിച്ച് താരങ്ങളുടെ മക്കൾ സിനിമാ ലോകത്ത് എത്തുന്നത് ഇന്ത്യൻ സിനിമയിൽ പതിവ് കാഴ്ച്ചയാണ്. ആദ്യ ചിത്രത്തിൽ പുതുമുഖമായി എത്തുന്നതിന് മുമ്പ് തന്നെ താരപരിവേഷമാണ് ഇവർക്ക് സിനിമാ ലോകത്ത് ലഭിക്കുന്നത്. പ്രത്യേകിച്ച് ബോളിവുഡിൽ. (image: Instagram)

ബോളിവുഡിലെ പ്രമുഖ താരങ്ങളുടെ മക്കളെല്ലാം തന്നെ നിലവിൽ സിനിമകളിൽ സജീവമാണ്. അവസാനമായി ഷാരൂഖ് ഖാന്റെ മകൾ സുഹാന ഖാനാണ് സിനിമയിൽ അരങ്ങേറ്റം കുറിച്ചത്. സോയ അക്തർ സംവിധാനം ചെയ്യുന്ന ആർച്ചീസ് ആണ് സുഹാനയുടെ ആദ്യ ചിത്രം. ചിത്രീകരണം പുരോഗമിക്കുന്ന ആർച്ചീസിൽ ബോളിവുഡിലെ പ്രമുഖ താര കുടുംബങ്ങളിലെ ഇളമുറക്കാരാണ് നവാഗതരായി എത്തുന്നത്. (Image: Instagram)

ഇനി കാജോളിന്റേയും അജയ് ദേവ്ഗണിന്റേയും മൂത്ത മകൾ നിസ ദേവഗണിന്റെ അരങ്ങേറ്റം എന്നാണ് എന്ന കാത്തിരിപ്പിലാണ് പാപ്പരാസികളും ആരാധകരും. സോഷ്യൽമീഡിയയിൽ സജീവമായ നിസയുടെ ചിത്രങ്ങൾ അടുത്തി‌ടെ വൈറലായിരുന്നു. (Image: Instagram)

ഇതുവരെ ഒരു സിനിമയിൽ പോലും ഭാഗമായിട്ടില്ലെങ്കിലും നിസയുടെ പുറകേയാണ് പാപ്പരാസികൾ. മകളുടെ ബോളിവുഡ് അരങ്ങേറ്റത്തെ പറ്റിയുള്ള ചോദ്യങ്ങൾ കാജോളും അജയ് ദേവഗണും നിരവധി തവണ നേരിട്ടിട്ടുണ്ട്. (Image: Instagram)

ഒടുവിൽ ഈ ചോദ്യങ്ങളോട് പ്രതികരിച്ചിരിക്കുകയാണ് കാജോൾ. നിസയെ കൂടാതെ യുഗ് എന്ന മകൻ കൂടിയുണ്ട് കാജോൾ-അജയ് ദമ്പതികൾക്ക്. മക്കൾ ഏത് മേഖല തിരഞ്ഞെടുത്താലും അതിനെ പിന്തുണയ്ക്കുമെന്നാണ് കാജോൾ പറയുന്നത്.

അമ്മയെന്ന നിലയിൽ മക്കളെ സിനിമയിലേക്ക് കൊണ്ടുവരികയല്ല തന്റെ ഉത്തരവാദിത്തമെന്നും അവർക്ക് സന്തോഷമുള്ളതെന്താണോ അത് ചെയ്യാനുള്ള പിന്തുണ നൽകുകയാണെന്നും കാജോൾ വ്യക്തമാക്കുന്നു.

മകൾ നിസയെ ബോളിവുഡിലേക്ക് വരാൻ നിർബന്ധിക്കുകയോ ബോളിവുഡിൽ നിന്ന് അകറ്റുകയോ ചെയ്യില്ല. സ്വന്തമായി തീരുമാനമെടുക്കാൻ പ്രാപ്തിയുള്ളവളാണ് മകൾ. പതിനെട്ട് വയസ്സായ മുതിർന്ന പെൺകുട്ടിയാണ് നിസയെന്നും കാജോൾ പറയുന്നു. (image: Instagram)