Kangana Ranaut |തോറിന്റെ ചുറ്റിക ഹനുമാന്റെ ഗദ, അയേൺമാൻ സ്യൂട്ട് കർണന്റെ കവചകുണ്ഡലം; അവഞ്ചേഴ്‌സ് മഹാഭാരതത്തിൽ നിന്ന് പ്രചോദനം ഉൾക്കൊണ്ടതെന്ന് കങ്കണ

തന്റെ പുതിയ ചിത്രം ധക്കഡിന്റെ (Dhaakad) പ്രമോഷൻ തിരക്കുകളിലാണ് ബോളിവുഡ് നടി കങ്കണ റണാവത്ത്(Kangana Ranaut). ഇതിന്റെ ഭാഗമായി പ്രമുഖ മാധ്യമങ്ങളിലെല്ലാം താരം അഭിമുഖങ്ങളും നൽകുന്നുണ്ട്.

ഇടൈംസിന് നൽകിയ അഭിമുഖത്തിലാണ് അവഞ്ചേഴ്സിനെ കുറിച്ചുള്ള കങ്കണയുടെ പരാമർശങ്ങൾ. അവഞ്ചേഴ്സ് മഹാഭാരതത്തിൽ നിന്ന് പ്രചോദനമുൾക്കൊണ്ടതാണെന്നാണ് താൻ കരുതുന്നതെന്ന് കങ്കണ പറയുന്നു.

സൂപ്പർഹീറോ ചിത്രത്തിൽ അഭിനയിക്കുകയാണെങ്കിൽ ഏത് രീതിയിലായിരിക്കും അതിനെ സമീപിക്കുക എന്നായിരുന്നു നടിയോടുള്ള ചോദ്യം. ഇതിനാണ് അവഞ്ചേഴ്സും മഹാഭാരതവുമൊക്കെ കടന്നുവന്നത്.

പാശ്ചാത്യ സിനിമകൾ ഇന്ത്യൻ പുരാണങ്ങളിൽ നിന്നും കടംകൊള്ളാറുണ്ടെന്ന് നടി പറയുന്നു. അയേൺമാൻ പോലുള്ള ചിത്രങ്ങൾ ചൂണ്ടിക്കാട്ടിയായിരുന്നു കങ്കണയുടെ പരാമർശങ്ങൾ.

കർണന്റെ കവചകുണ്ഡലം പോലെയാണ് അയേൺമാന്റെ ആർമർ തനിക്ക് തോന്നുന്നത്. ചുറ്റിക പിടിക്കുന്ന തോറിനെ ഹനുമാനോടും ഗദയോടും ഉപമിക്കാം. അവഞ്ചേഴ്സ് തന്നെ മഹാഭാരതത്തിൽ നിന്ന് പ്രചോദനം ഉൾക്കൊണ്ടെന്നാണ് താൻ കരുതുന്നത്.

ഹോളിവുഡ് സിനിമകളുടെ വിശ്വൽ ട്രീറ്റ്മെന്റ് വ്യത്യസ്തമായിരിക്കും, പക്ഷേ അവരുടെ സൂപ്പർഹീറോ കഥകൾ നമ്മുടെ പുരാണങ്ങളിൽ നിന്നും വലിയ രീതിയിൽ പ്രചോദനം ഉൾക്കൊണ്ടിട്ടുണ്ട്. അവർ ഈ വസ്തുത അംഗീകരിക്കുകയും ചെയ്യുന്നുണ്ട്. അതുപോലെ, യഥാർത്ഥമായ എന്തെങ്കിലും ചെയ്യാൻ താനും ആഗ്രഹിക്കുന്നുണ്ടെന്നും കങ്കണ പറയുന്നു.

ധക്കഡിനെ കുറിച്ച് സംവിധായകൻ റസ്നീഷ് ആദ്യം പറഞ്ഞപ്പോൾ തനിക്ക് വലിയ വിശ്വാസമുണ്ടായിരുന്നില്ലെന്നും കങ്കണ തുറന്നു പറഞ്ഞു. തൊണ്ണൂറ് ശതമാനവും ഈ ചിത്രം വേണ്ടെന്നായിരുന്നു തന്റെ അഭിപ്രായം. അത് അവതരിപ്പിക്കാൻ കഴിയുമോ എന്ന സംശയമുണ്ടായിരുന്നു.

‌പക്ഷേ, താൻ നേരത്തേ പരിശീലിച്ച ആയോധന കലകൾ പത്ത് ശതമാനം ആത്മവിശ്വാസം നൽകി. അതിനാൽ സംവിധായകന് ആദ്യത്തെ കുറച്ച് ദിവസത്തേക്ക് മറുപടി നൽകിയിരുന്നില്ല.

ധക്കഡ് ഏറ്റെടുക്കുന്നത് ശരിയായ തീരുമാനമായിരിക്കുമെന്നതിൽ തനിക്ക് പൂർണ വിശ്വാസമുണ്ടായിരുന്നില്ല. പക്ഷേ, വലിയ ആശയമുള്ള ഒരു ആക്ഷൻ സിനിമ ഹിന്ദിയിൽ ചെയ്യുക എന്ന പഴയ സ്വപ്നമാണ് തന്നെ ഈ സിനിമയിലേക്ക് എത്തിച്ചത്.

കൂടാതെ, സംവിധായകനും നിർമാതാവുമാണ് തനിക്ക് വിശ്വാസം തന്നത്. അവരുടെ വിശ്വാസമാണ് തന്റെ ശക്തിയെന്നും കങ്കണ പറയുന്നു. മെയ് 20 നാണ് ചിത്രം തിയേറ്ററിലെത്തുന്നത്.