ബോളിവുഡിലെ 'സീത'യാവാന്‍ കങ്കണ റണൗത്ത്; പ്രതിഫല തര്‍ക്കത്തെ തുടര്‍ന്ന് കരീന കപൂര്‍ പിന്മാറിയെന്ന് റിപ്പോർട്ട്
ഹിന്ദി ഉള്‍പ്പടെ രാജ്യത്തെ അഞ്ച് ഭാഷകളിലാണ് ചിത്രം റിലീസ് ചെയ്യുന്നത്. ഹിന്ദി, തമിഴ്, തെലുങ്ക്, മലയാളം, കന്നഡ ഭാഷകളില്‍ പ്രദര്‍ശനത്തിനെത്തുമെന്നാണ് റിപ്പോര്‍ട്ടുകള്‍.
രാമായണത്തെ അടിസ്ഥാനമാക്കിയുള്ള വരാനിരിക്കുന്ന ബോളിവുഡ് ചിത്രത്തില്‍ കങ്കണ റണൗത്ത് ഇതിഹാസ കഥാപാത്രമായ 'സീതാദേവി'യുടെ വേഷം അവതരിപ്പിക്കും. കെവി വിജയേന്ദ്ര പ്രസാദ് രചിച്ച് അലൗക്കിക് ദേശായി സംവിധാനം ചെയ്യുന്ന പീരിയഡ് ഡ്രാമയില്‍ സീതയായി ആദ്യം നിശ്ചയിച്ചിരുന്നത് കരീന കപൂറിനെയായിരുന്നു. എന്നാല്‍ കരീന അമിത പ്രതിഫലം ആവശ്യപ്പെട്ടതിനെ തുടര്‍ന്ന് താരത്തെ മാറ്റിയെന്നാണ് റിപ്പോര്‍ട്ടുകള്‍.
ചിത്രത്തിലെ കേന്ദ്ര കഥാപാത്രം കങ്കണയാണെന്ന് നിര്‍മ്മാതാവ് സലോണി ശര്‍മ്മയും സ്ഥിരീകരിച്ചിരുന്നു. ''ഞങ്ങളുടെ അതുല്യമായ വിഎഫ്എക്‌സ് സൃഷ്ടിയായ 'ദി ഇന്‍കാര്‍നേഷന്‍ സീത'യില്‍ ഒരു സ്ത്രീ എന്ന നിലയില്‍ കങ്കണ റണൗത്തിനെ സ്വാഗതം ചെയ്യുന്നതില്‍ എനിക്ക് സന്തോഷിക്കാതിരിക്കാന്‍ കഴിയില്ല. കങ്കണ, നിര്‍ഭയരും ധൈര്യവതികളുമായ ഇന്ത്യന്‍ സ്ത്രീകളുടെ ആത്മാവിനെയും സത്തയെയും പ്രതീകപ്പെടുത്തുന്നു. എല്ലാ അര്‍ത്ഥത്തിലും തുല്യത ആഘോഷിക്കാന്‍ ഞങ്ങള്‍ മുന്നിട്ടിറങ്ങേണ്ട സമയമാണിത്,''സലോണി ശര്‍മ്മ പറഞ്ഞു.
ചിത്രത്തെക്കുറിച്ച് കങ്കണയും പ്രതികരിച്ചിട്ടുണ്ട്. “ഈ കഴിവുള്ള കലാകാരന്മാരുടെ ടീമിനൊപ്പം ടൈറ്റില്‍ റോളില്‍ അഭിനയിക്കുന്നതില്‍ സന്തോഷമുണ്ട്. സീതാ രാമന്റെ അനുഗ്രഹം. ജയ് സിയാറാം (sic),” ഈ ചിത്രത്തിന്റെ ടീസര്‍ പോസ്റ്റര്‍ സാമൂഹിക മാധ്യമങ്ങളില്‍ പങ്കുവച്ച് കങ്കണ എഴുതി. ഹിന്ദി ഉള്‍പ്പടെ രാജ്യത്തെ അഞ്ച് ഭാഷകളിലാണ് ചിത്രം റിലീസ് ചെയ്യുന്നത്. ഹിന്ദി, തമിഴ്, തെലുങ്ക്, മലയാളം, കന്നഡ ഭാഷകളില്‍ പ്രദര്‍ശനത്തിനെത്തുമെന്നാണ് റിപ്പോര്‍ട്ടുകള്‍. എ ഹ്യൂമന്‍ ബീയിംഗ് സ്റ്റുഡിയോയുടെ ബാനറിലാണ് ചിത്രം ഒരുങ്ങുന്നത്.
അതേസമയം, തമിഴ്‌നാട് മുന്‍മുഖ്യമന്ത്രിയും നടിയുമായ ജയലളിതയെ അസ്പദമാക്കിയുള്ള കങ്കണയുടെ 'തലൈവി' സെപ്റ്റംബര്‍ 10 ന് റിലീസ് ചെയ്തു. എ.എല്‍ വിജയ് സംവിധാനം ചെയ്ത്, അരവിന്ദ സ്വാമിയും പ്രധാന വേഷത്തിലെത്തിയ 'തലൈവി' മികച്ച അഭിപ്രായമാണ് നേടിയിരിക്കുന്നത്. ശര്‍വേഷ് മെവരയുടെ സംവിധാനത്തില്‍ എയര്‍ഫോഴ്‌സ് പൈലറ്റ് ആയെത്തുന്ന 'തേജസ്', റസ്‌നീഷ് റാസിയുടെ 'ധക്കഡ്' എന്നിവയാണ് കങ്കണയുടെ റിലീസ് ചെയ്യാനുള്ള ചിത്രങ്ങള്‍. കൂടാതെ അയോധ്യ വിധിയെക്കുറിച്ചുള്ള 'അപരാജിത അയോധ്യ' എന്ന സിനിമയും താരം സംവിധാനം ചെയ്യുന്നുണ്ട്.
'ദി ഇന്‍കാര്‍നേഷന്‍ സീത'യില്‍ അഭിനയിക്കുന്നതുമായി ബന്ധപ്പെട്ടുള്ള നിര്‍മ്മാതാക്കളും കരീന കപൂറുമായുള്ള പ്രതിഫലം തര്‍ക്കം ബി-ടൗണില്‍ വന്‍ചര്‍ച്ചയായിരുന്നു. ഈ വിഷയത്തോടെ താരം നേരിട്ട് പ്രതികരിച്ചിട്ടില്ലെങ്കിലും നടന്മാര്‍ക്ക് തുല്യമായ വേതനത്തിന് നടിമാര്‍ ശബ്ദിക്കുന്നത് സാധാരണമായി കാണണമെന്നും തന്റെ മൂല്യം തനിക്ക് അറിയാമെന്നും അത് വ്യക്തമാക്കാന്‍ യാതൊരു മടിയുമില്ലെന്നും കരീന ഗാര്‍ഡിയന് നല്‍കിയ അഭിമുഖത്തില്‍ പറഞ്ഞിരുന്നു.
''എനിക്ക് എന്താണ് വേണ്ടതെന്നാണ് ഞാന്‍ പറയുന്നത്, അതിന് ബഹുമാനം ലഭിക്കണമെന്നും ഞാന്‍ കരുതുന്നു. ഇത് ആവശ്യപ്പെട്ടു എന്നതിലല്ല കാര്യം, സ്ത്രീകളെ ബഹുമാനിക്കുക എന്നതാണ് കാര്യം. എല്ലാം മാറിക്കൊണ്ടിരിക്കുകയാണെന്ന് ഞാന്‍ കരുതുന്നു. കുറച്ച് വര്‍ഷങ്ങള്‍ക്ക് മുമ്പ് വരെ, ഒരു സിനിമയില്‍ ഒരു പുരുഷനും സ്ത്രീക്കും തുല്യ വേതനം ലഭിക്കുന്നതിനെക്കുറിച്ച് ആരും സംസാരിക്കില്ലായിരുന്നു. ഇപ്പോള്‍ പലരും അതിനെക്കുറിച്ച് ഒരുപാട് സംസാരിക്കുന്നുണ്ട്,'' അഭിമുഖത്തില്‍ കരീന പറഞ്ഞു.
