FACT CHECK | 'കീരിക്കാടന്‍ ജോസ് ആശുപത്രിയിൽ'; സത്യം ഇതാണ്; മോഹൻരാജിന്റെ കുടുംബത്തിന് പറയാനുള്ളത്

തിരുവനന്തപുരം: കിരീടം സിനിമയിലെ വില്ലന്‍ കഥാപാത്രത്തിലൂടെ കൊണ്ട് മലയാളികളുടെ മനസില്‍ ചിരപ്രതിഷ്ഠ നേടിയ കീരിക്കാടന്‍ ജോസ് എന്ന മോഹന്‍രാജിനെ പരിചരിക്കാൻ ആരുമില്ലെന്ന പ്രചരണത്തിനെതിരെ കുടുംബം.

പത്ത് ദിവസമായി തിരുവനന്തപുരം ജനറല്‍ ആശുപത്രിയിലെ സര്‍ജറി വിഭാഗത്തിൽ ചികില്‍സയിലാണ് മോഹന്‍രാജ്. വെരിക്കോസ് ബാധയെ തുടർന്ന് കാലിൽ മുറിവുകളുണ്ടായതിനെ തുടർന്നാണ് മോഹൻരാജിനെ ആശുപത്രിയിൽ പ്രവേശിപ്പിച്ചത്.

അനുജന്‍ പ്രേം ലാലാണ് മോഹന്‍രാജിനൊപ്പം ആശുപത്രിയിലുള്ളത്. ജനറല്‍ ആശുപത്രിയില്‍ ആരും നോക്കാനില്ലാതെ മോഹൻരാജ് കടുത്ത ദുരിതത്തിലാണെന്ന തരത്തിലായിരുന്നു സോഷ്യല്‍ മീഡിയ പ്രചരണം. മോഹന്‍ രാജിന്റെ ചിത്രങ്ങളും വീഡിയോയും ഉൾപ്പെടെയാണ് സോഷ്യല്‍ മീഡിയയില്‍ പ്രചരിക്കുന്നത്. എന്നാൽ ഇതിൽ വസ്തുതയില്ലെന്നാണ് അനുജന്‍ പ്രേം ലാല്‍ പറയുന്നത്.

"നേരത്തെ ചെന്നൈ അപ്പോളൊ ആശുപത്രിയിലായിരുന്നു ചിക്തസ. തിരുവനന്തപുരത്ത് എത്തിയ ശേഷം കുടുംബ ഡോക്ടറും ജനറല്‍ ആശുപത്രിയിലെ ശസ്ത്രക്രിയ വിഭാഗത്തിലെ ഡോക്ടറുമായ ശോഭയെ കാണുകയായിരുന്നു. കൂടുതല്‍ ചിക്തസയ്ക്കായി ആശുപത്രിയില്‍ അഡ്മിറ്റാകാന്‍ അവർ നിർദ്ദേശിച്ചു." - പ്രേംലാൽ പറഞ്ഞു.

മധുരയില്‍ എന്‍ഫോഴ്‌സ്‌മെന്റ് അസിസ്റ്റന്റ് കമ്മീഷണറായി വിരമിച്ച മോഹന്‍രാജിനും ഭാര്യയ്ക്കും ഏത് ആശുപത്രിയിലും ചികിത്സ തേടാനുള്ള ഇൻഷുറൻസ് സൗകര്യമുണ്ട്. സാമ്പത്തിക പ്രതിസന്ധിയും കുടുംബത്തിനില്ല. ജനറല്‍ ആശുപത്രിയിലെ പേ വാര്‍ഡിലാണ് മോഹൻ രാജ് കഴിയുന്നതെന്നും കുടുംബം അറിയിച്ചു.

സോഷ്യൽ മീഡിയയിൽ നടക്കുന്ന വ്യാജ പ്രചരണത്തിനെതിരെ മോഹൻ രാജിന്റെ കുടുംബം സൈബര്‍ സെല്ലില്‍ പരാതി നല്‍കിയിട്ടുണ്ട്.

News18

വാർത്തയറിഞ്ഞ് അമ്മ സെക്രട്ടറി ഇടവേള ബാബുവും വിഷയത്തില്‍ ഇടപെട്ടു. നിലവില്‍ കുടുംബത്തിന് സാമ്പത്തിക സാഹയം വേണ്ടെന്ന് അറിയിച്ചിട്ടുണ്ടെന്നും സോഷ്യല്‍ മാഡിയ പ്രചരണം വ്യാജമാണെന്നും അദ്ദേഹവും വ്യക്തമാക്കി.