'പരസ്പരം വേദനിപ്പിക്കാതെ പരിഹാരം കാണണം'; JNU വിഷയത്തിൽ നടി സണ്ണി ലിയോണ്‍
''താൻ അക്രമത്തിൽ വിശ്വസിക്കുന്നില്ല. മറിച്ച് എല്ലാ പ്രശ്‌നത്തിനും അക്രമം കൂടാതെ തന്നെ ഉത്തരമുണ്ടെന്നാണ് വിശ്വസിക്കുന്നത്''
ജെഎൻയുവിലെ അക്രമങ്ങളെ അപലപിച്ച് ബോളിവുഡ് നടി സണ്ണി ലിയോൺ. രാജ്യത്ത് നടക്കുന്ന പ്രശ്‌നങ്ങളിൽ പരസ്പരം അക്രമിക്കാതെ തന്നെ പരിഹാരം കാണണമെന്ന് നടി പറഞ്ഞു. താൻ അക്രമത്തിൽ വിശ്വസിക്കുന്നില്ലെന്നും മറിച്ച് എല്ലാ പ്രശ്‌നത്തിനും അക്രമം കൂടാതെ തന്നെ ഉത്തരമുണ്ടെന്നാണ് വിശ്വസിക്കുന്നതെന്നും വാർത്താ എജൻസിയായ എഎൻഐയോട് അവർ പ്രതികരിച്ചു.
വടികളും ചുറ്റികയും മറ്റ് മാരകായുധങ്ങളുമായി അക്രമി സംഘം ഹോസ്റ്റലുകളിലേക്ക് അതിക്രമിച്ച് കയറി വന്ന് മർദിക്കുകയായിരുന്നുവെന്ന് വിദ്യാർത്ഥികൾ പറയുന്നു. സബർമതി ഹോസ്റ്റൽ അടിച്ച് തകർത്തു. നിർത്തിയിട്ട വാഹനങ്ങൾ തകർക്കുകയും ഹോസ്റ്റലുകൾക്ക് നേരെ കല്ലെറിയുകയുമുണ്ടായി. ജെഎൻയു സ്റ്റു‍ഡന്റ്സ് യൂണിയൻ പ്രസിഡന്റ് ഐഷി ഘോഷിന് ആക്രമണത്തിൽ തലയ്ക്ക് പരിക്കേറ്റിരുന്നു. കഴിഞ്ഞ ദിവസം നടി ദീപിക പദുകോൺ ജെഎൻയുവിലെത്തി വിദ്യാർഥികൾക്ക് ഐക്യദാർഢ്യം പ്രഖ്യാപിച്ചിരുന്നു.
