'ലേഡി സൂപ്പര്‍ സ്റ്റാര്‍ എന്ന വിളി ഇഷ്ടമല്ല, നയന്‍താരയെ ഏറെ ബഹുമാനിക്കുന്നു'; മറുപടിയുമായി മാളവിക മോഹനന്‍
തന്റെ പുതിയ സിനിമയായ ക്രിസ്റ്റിയുടെ പ്രൊമോഷന്‍റെ ഭാഗമായി ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് മാളവിക ഇക്കാര്യം പറഞ്ഞത്.
നായികമാരെ ലേഡി സൂപ്പര്‍ സ്റ്റാര്‍ എന്ന് വിളിക്കാതെ സൂപ്പര്‍ സ്റ്റാര്‍ എന്ന് വിളിച്ചാല്‍ മതിയെന്ന നടി മാളവിക മോഹനന്‍റെ പരാമര്‍ശം സിനിമാലോകത്ത് വലിയ ചര്‍ച്ചകള്‍ക്കാണ് വഴി തുറന്നത്. തന്റെ പുതിയ സിനിമയായ ക്രിസ്റ്റിയുടെ പ്രൊമോഷന്‍റെ ഭാഗമായി ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് മാളവിക ഇക്കാര്യം പറഞ്ഞത്.
മാളവികയുടെ പരാമര്‍ശം തെന്നിന്ത്യന്‍ താരറാണി നയന്‍താരയെ ഉന്നം വെച്ചുള്ളതാണെന്ന് പ്രചരിച്ചതോടെ നയന്‍സ് ആരാധകര്‍ മാളവികയ്ക്കെതിരെ രംഗത്തെത്തി. മുന്‍പ് ഒരു സിനിമയിലെ രംഗത്തില്‍ ആശുപത്രി കിടക്കയില്‍ ഫുള്‍ മേക്കപ്പോടെ ഒരു സീനിയര്‍ നായിക അഭിനയിച്ചതിരെ മാളവിക സംസാരിച്ചിരുന്നു. ഇത്ല ശ്രദ്ധയില്‍പ്പെട്ട നയന്‍താര മാളവികയുടെ പരാമര്‍ശത്തിന് മറുപടി നല്‍കുകയും ചെയ്തിരുന്നു.
മാളവികയുടെ തുടര്‍ച്ചയായ പരാമര്‍ശങ്ങളില്‍ നയന്‍താരയെ ലക്ഷ്യംവെക്കുന്നു എന്ന പ്രചാരം ശക്തമായതോടെ നടി തന്നെ ഒടുവില്‍ സംഭവത്തില്‍ വിശദീകരണവുമായെത്തി.ജീവിതത്തിൽ ഏറെ ആരാധിക്കുകയും ബഹുമാനിക്കുകയും ചെയ്യുന്ന നടിയാണ് നയൻതാരയെന്ന് മാളവിക മോഹനൻ. സിനിമയിൽ സീനിയർ എന്ന നിലയിൽ അവരുടെ അവിശ്വസനീയമായ യാത്രയെ ശരിക്കും നോക്കികാണാറുണ്ടെന്നും മാളവിക പറഞ്ഞു.
തന്റെ അഭിപ്രായം സ്ത്രീ അഭിനേതാക്കളെ വിശേഷിപ്പിക്കാൻ ഉപയോഗിക്കുന്ന ഒരു പദത്തെക്കുറിച്ചാണ്, അല്ലാതെ ഏതെങ്കിലും പ്രത്യേക താരത്തെക്കുറിച്ചല്ലെന്ന് മാളവിക വ്യക്തമാക്കി. ‘‘ഞാൻ നയൻതാരയെ ശരിക്കും ബഹുമാനിക്കുകയും ആരാധിക്കുകയും ചെയ്യുന്നു. ഒരു സീനിയർ എന്ന നിലയിൽ അവരുടെ അവിശ്വസനീയമായ യാത്രയെ ഞാൻ ശരിക്കും നോക്കിക്കാണുന്നു. ഇനിയെങ്കിലും നിങ്ങൾ ഒന്നടങ്ങൂ.’’–മാളവിക ട്വീറ്റ് ചെയ്തു.
ലേഡി സൂപ്പർ സ്റ്റാർ എന്ന പ്രയോഗം തന്നെ ഇഷ്ടമല്ല. നായകന്മാരെ എന്നപോലെ നായികമാരെയും സൂപ്പർ സ്റ്റാർ എന്ന് വിളിക്കുന്ന സാഹചര്യമുണ്ടാവണം. ലേഡി സൂപ്പർസ്റ്റാർ എന്നാലെന്താണ്? അതിലെ ലേഡിയുടെ ആവശ്യമില്ല. ദീപികാ പദുക്കോണിനേയും ആലിയാ ഭട്ടിനേയും കത്രീനാ കെയ്ഫിനെയുമെല്ലാം സൂപ്പർ സ്റ്റാർ എന്നല്ലേ വിളിക്കുന്നതെന്നും മാളവിക ചോദിച്ചിരുന്നു.
