'എന്നെ എം ടി യുമായി ബന്ധിപ്പിച്ചത് ഏതോ മാന്ത്രികശക്തി; എല്ലാ ആദരങ്ങളും എം ടിയുടെ കാൽച്ചുവട്ടിൽ സമർപ്പിക്കുന്നു:' മമ്മൂട്ടി

മലയാള ഭാഷ ഉള്ളിടത്തോളം കാലം എംടി നിലനിൽക്കുമെന്ന് മമ്മൂട്ടി. എംടിയുടെ നവതി ആഘോഷങ്ങളുടെ ഭാഗമായി തിരൂർ തുഞ്ചൻ പറമ്പിൽ നടക്കുന്ന സാദരം എംടി ഉത്സവത്തിൽ മുഖ്യാതിഥി ആയിരുന്നു മമ്മൂട്ടി. അദ്ദേഹം നടത്തിയ പ്രഭാഷണത്തിന്റെ ചുരുക്കം ഇപ്രകാരം.

എംടി യുമായി തനിക്കുള്ള ബന്ധം വിശദീകരിക്കാനാകുന്നില്ലെന്നും ചേട്ടനോ അനിയനോ പിതാവോ സുഹൃത് ആരാധകനോ ഏത് വിധത്തിലും തനിക്ക് അദ്ദേഹത്ത സമീപിക്കാം എന്ന് മമ്മൂട്ടി. പണക്കാരനെന്നോ പാവപ്പെട്ടവനെന്നോ വ്യത്യാസമില്ലാതെ നമ്മൾ ഉപയോഗിക്കുന്നതാണ് ഭാഷയെന്നും, ഭാഷയുള്ളിടത്തോളം കാലം എം.ടി നിലനിൽക്കുമെന്നും അദ്ദേഹം കൂട്ടിച്ചേർത്തു.

സിനിമയിൽ ഞാൻ അദ്ദേഹത്തിന്റെ ചുരുക്കം കഥാപാത്രങ്ങളെയേ അവതരിപ്പിച്ചിട്ടുള്ളൂ. പക്ഷേ, ഇദ്ദേഹം എഴുതിയ നിരവധി കഥാപാത്രങ്ങളെ ഞാൻ മനസ്സിൽ കണ്ടിട്ടുണ്ട്. ആ കഥാപാത്രങ്ങളായി ജീവിക്കുന്നത് സ്വപ്നം കണ്ടിട്ടുണ്ട്.

ആ കഥകളിലെ ഒരുപാട് മനുഷ്യരെ ഞാൻ ഒറ്റയാളായി നിന്ന് അഭിനയിച്ചു തീർത്തിട്ടുണ്ട്. എന്നിലെ നടനെ അത് പരിപോഷിപ്പിച്ചു. ഞാൻ വായിച്ചു തുടങ്ങുമ്പോൾ കഥാപാത്രങ്ങളോടും കഥയോടുമുള്ള ആഗ്രഹങ്ങൾ അഭിനയമായി പുറത്തുവന്നിട്ടുണ്ട്. ആരും കാണാതെ കണ്ണാടിയിലും വെള്ളത്തിലും മുഖം നോക്കി കഥാപാത്രങ്ങളായി ഞാൻ ഒരുപാട് പരിശീലിച്ചു.

എംടിയെ എന്നെങ്കിലും ഒന്ന് പരിചയപ്പെടാൻ കഴിയണേ എന്ന് കുട്ടിക്കാലത്തേ ആഗ്രഹിച്ചിരുന്നു. ഒരു ചലച്ചിത്രോത്സവത്തിന്റെ സമാപനത്തിലാണ് ഞങ്ങൾ പരിചയപ്പെട്ടത്. ഏതോ ഒരു മന്ത്രികശക്തി ഞങ്ങളെ പരസ്പരം ബന്ധിപ്പിച്ചു. അതിനുശേഷമാണ് എനിക്ക് സിനിമയിൽ അവസരം ഉണ്ടാകുന്നത്.

41 വർഷക്കാലം ആ ബന്ധം നിലനിന്നു. എംടിക്കു കിട്ടാത്ത പുരസ്കാരങ്ങളില്ല, പ്രശംസകളില്ല. പക്ഷേ, ഒരു സാഹിത്യകാരനെന്നതിന് അപ്പുറം വളരെ വലുതാണ് അദ്ദേഹത്തെക്കുറിച്ച് നമ്മുടെ മനസ്സിലുള്ള സ്ഥാനം. നമ്മുടെ ദൈനംദിന സംഭാഷണങ്ങളിൽ എവിടെയെങ്കിലുമൊക്കെ എം.ടിയുടെ ഭാഷയും പ്രയോഗങ്ങളും കടന്നുവരാറുണ്ട്.

പുതിയ തലമുറ അദ്ദേഹത്തെ എത്രത്തോളം വായിക്കുന്നുവെന്ന് അറിഞ്ഞുകൂടാ. പക്ഷേ, അവരിലേക്കും എത്തിച്ചേരാൻ അദ്ദേഹത്തിന് കഴിയും. അത്രത്തോളം നവീകരിക്കപ്പെട്ട രചനകളാണ് അദ്ദേഹത്തിന്റേത്. എം.ടിയെ നാം ആദരിക്കുന്നതിനേക്കാൾ കൂടു തൽ മറ്റുഭാഷക്കാർ ആദരിക്കുന്നുണ്ടാകും.

അദ്ദേഹത്തിന്റെ സിനിമയിൽ അഭിനയിച്ച ആളാണ് ഞാൻ എന്നു പറയുമ്പോൾ എനിക്കുകിട്ടുന്ന ആദരം ആസ്വദിക്കുന്നു. നാലഞ്ചുമാസം മുമ്പ് അദ്ദേഹത്തിന്റെ ഒരു കഥാപാത്രത്തെ അഭിനയിച്ചു തീർത്തിട്ടേഉള്ളൂ. ഇനിയും ഒരുപാട് കഥാപാത്രങ്ങളെ ഞാൻ ആഗ്രഹിക്കുന്നു.

എന്റെ എല്ലാ പുരസ്കാരങ്ങളും ഞാൻ എം.ടിയുടെ കാൽച്ചുവട്ടിൽ  ഗുരുദക്ഷിണയായി സമർപ്പിക്കുന്നു. ഇനിയും ലഭിച്ചാൽ അതും സമർപ്പിക്കും. എംടി യില്ലാതെ മലയാളം ഇല്ല." മമ്മൂട്ടി പറഞ്ഞു. ചടങ്ങിൽ മമ്മൂട്ടി എം ടി ക്ക് സ്വർണ കൈ ചെയിൻ സമ്മാനമായി സമർപ്പിച്ചു.