മൂന്നു നായികമാർക്കൊപ്പം അതിസാഹസികമായി മരുഭൂമിയിൽ വാഹനമോടിച്ച് മമ്മൂട്ടി

ആറാട്ട് എന്ന മോഹൻലാൽ ചിത്രത്തിനുശേഷം മമ്മൂട്ടിയെ നായകനാക്കി ബി ഉണ്ണികൃഷ്ണൻ സംവിധാനം ചെയ്ത ക്രിസ്റ്റഫർ എന്ന ചിത്രം ഫെബ്രുവരി ഒമ്പതിന് തിയറ്ററുകളിലെത്തും. ഇതിന് മുന്നോടിയായി മരുഭൂമിയിൽ മമ്മൂട്ടിയുടെ നേതൃത്വത്തിൽ നടത്തുന്ന പ്രൊമോഷൻ ചിത്രങ്ങളും വീഡിയോയുമാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്.

ക്രിസ്റ്റഫർ സിനിമയുടെ പ്രമോഷനുവേണ്ടി ദുബായിൽ എത്തിയപ്പോഴുള്ള ചിത്രമാണ് വൈറലാകുന്നത്. മമ്മൂട്ടിക്കൊപ്പം സ്‌നേഹ, ഐശ്വര്യ ലക്ഷ്മി, മീര നന്ദന്‍ എന്നീ നടിമാരുമുണ്ട്. ഈ മൂന്നു നടിമാർക്കുമൊപ്പം മരുഭൂമിയിലൂടെ സാഹസികമായി വാഹനമോടിക്കുന്ന ചിത്രങ്ങളും ഇപ്പോൾ സോഷ്യൽ മീഡിയയിൽ തരംഗമാകുന്നുണ്ട്.

സ്‌നേഹ, ഐശ്വര്യ ലക്ഷ്മി, മീര നന്ദന്‍ എന്നിവരെ വച്ച് അനായാസമായാണ് മമ്മൂട്ടി മരുഭൂമിയിലൂടെ വാഹനമോടിച്ചത്. ഈ വീഡിയോ മമ്മൂട്ടി തന്നെ സോഷ്യൽ മീഡിയയിൽ പങ്കുവെച്ചത്.

ഉദയ് കൃഷ്ണ തിരക്കഥ ഒരുക്കിയ ക്രിസ്റ്റഫർ ശ്രദ്ധ നേടുമെന്നാണ് അണിയറപ്രവർത്തകരുടെ പ്രതീക്ഷ. ‘ബയോഗ്രഫി ഓഫ് എ വിജിലന്റ് കോപ്പ്’ എന്ന ടാഗ് ലൈനോടെയാണ് ഈ ചിത്രം എത്തുന്നത്.

തമിഴിലെ പ്രശസ്തതാരം വിനയ് റായ് മലയാളത്തില്‍ ആദ്യമായി അഭിനയിക്കുന്ന ചിത്രമെന്ന പ്രത്യേകതയും ക്രിസ്റ്റഫറിനുണ്ട്. ചിത്രത്തില്‍ അമല പോള്‍, സ്‌നേഹ, ഐശ്വര്യ ലക്ഷ്മി, എന്നിങ്ങനെ മൂന്ന് നായികമാരാണ് അഭിനയിച്ചിരിക്കുന്നത്. കൂടാതെ ദിലീഷ് പോത്തന്‍, സിദ്ദിഖ്, ജിനു എബ്രഹാം, വിനീത കോശി തുടങ്ങി ഒരു വലിയ താരനിരയുമുണ്ട്.