മമ്മൂട്ടിയും പ്രതികരിച്ചു: ഐക്യത്തിന് വിരുദ്ധമായതെന്തും എതിർക്കപ്പെടണം

കൊച്ചി: ദേശീയ പൗരത്വ ഭേദഗതി നിയമത്തിൽ വൈകിയാണെങ്കിലും നിലപാട് വ്യക്തമാക്കി നടൻ മമ്മൂട്ടി. ഫേസ്ബുക്ക് പോസ്റ്റിലാണ് ചൊവ്വാഴ്ച വൈകുന്നേരം മമ്മൂട്ടി തന്‍റെ പ്രതികരണം അറിയിച്ചത്. ജാതി, മതം, വിശ്വാസം എന്നിവയ്ക്ക് അതീതമായി ഉയരുമ്പോഴാണ് നാം ഒരു രാഷ്ട്രമായി നില കൊള്ളുകയെന്ന് മമ്മൂട്ടി ഫേസ്ബുക്കിൽ കുറിച്ചു.

നമ്മുടെ ഐക്യത്തിന്‍റെ ആത്മാവ് ഇല്ലാതാക്കുന്ന എല്ലാറ്റിനെയും നിരുത്സാഹപ്പെടുത്തണമെന്നും മമ്മൂട്ടി ഫേസ്ബുക്കിലൂടെ പ്രതികരിച്ചു.

പൗരത്വ നിയമഭേദഗതിക്കെതിരെ മലയാളത്തിലെ പ്രമുഖ യുവതാരങ്ങളെല്ലാം പ്രതികരണവുമായി നേരത്തേ രംഗത്ത് വന്നിരുന്നു. ടൊവിനോ തോമസ്, പാർവതി തിരുവോത്ത്, പ്രിഥ്വിരാജ്, കുഞ്ചാക്കോ ബോബൻ ഇന്ദ്രജിത്ത് ആഷിഖ് അബു റിമകല്ലിങ്കൻ അമല പോൾ സണ്ണി വെയ്ൻ തുടങ്ങി നിരവധി താരങ്ങളാണ് സോഷ്യൽ മീഡിയയിൽ പ്രതികരിച്ചത്.

എന്നാൽ സൂപ്പർ താരങ്ങളായ മമ്മൂട്ടിയും മോഹൻലാലും അടക്കമുളളവർ പ്രതികരിക്കാത്തതിനെതിരെ രണ്ടു ദിവസമായി വലിയ വിമർശനമാണ് ഉയർന്നിരുന്നത്. ഈ സാഹചര്യത്തിലാണ് മമ്മൂട്ടിയുടെ പ്രതികരണം.

എന്നാൽ പ്രധാനപ്പെട്ട എല്ലാ വിഷയങ്ങളിലും പ്രതികരിക്കാറുള്ള മോഹൻലാൽ ഇതുവരെ അഭിപ്രായം രെഖപ്പെടുത്താത്തതിൽ ഇപ്പോഴും വിമർശനമുണ്ട്..