'ഇതാ 2020ലെ സിനിമയിൽ നിന്നുള്ള എന്റെ ആദ്യ ശമ്പളം'; മംമ്ത മോഹൻദാസ്

കൂടുതലും വിദേശത്തും, പിന്നെ ഇടയ്ക്കിടെ നാട്ടിലുമായി താമസിക്കുന്ന താരമാണ് മംമ്ത മോഹൻദാസ്. ഷൂട്ടിംഗ് തിരക്കുകൾ തുടങ്ങിയാൽ മംമ്ത കേരളത്തിലെത്തും. എന്നാൽ കോവിഡിന് ശേഷമുള്ള അനിശ്ചിതാവസ്ഥ മറ്റു താരങ്ങളെ പോലെ മംമ്തയെയും ബാധിച്ചു. ഷൂട്ടിംഗ് കഴിഞ്ഞ ചിത്രങ്ങൾ റിലീസ് ചെയ്യാൻ പറ്റിയില്ലെന്നു മാത്രമല്ല, പുതിയ ചിത്രങ്ങൾ ആരംഭിക്കാനും കഴിയാത്ത അവസ്ഥയെത്തി

2020 ആരംഭിച്ചതിൽ പിന്നെ ചെറിയ തോതിലെ ഷൂട്ടിങ്ങുകളിൽ മംമ്ത ഭാഗമായിരുന്നു. ചിലതെല്ലാം സ്വയം റെക്കോർഡ് ചെയ്‌തും നൽകി. ആ വീഡിയോകൾ മംമ്ത സോഷ്യൽ മീഡിയയിൽ പോസ്റ്റ് ചെയ്തിരുന്നു. അല്ലാത്ത സമയം വീടിനു പെയിന്റ് ചെയ്‌തു പോലും മംമ്ത തനിക്കു ലഭിച്ച ഒഴിവുവേളകൾ ആനന്ദകരമാക്കി

എന്നാൽ 2020ലെ ആദ്യ ചിത്രം സംഭവിക്കുന്നത് ഈ ഒക്ടോബർ മാസമാണ്. ആ വിശേഷങ്ങളുമായി മംമ്ത എത്തുന്നു. ചിത്രത്തിന്റെ പൂജ വേളയിലെ ഒരു ഫോട്ടോ പോസ്റ്റ് ചെയ്താണ് മംമ്ത ആ വിശേഷം പങ്കിടുന്നത്. ഇൻസ്റ്റഗ്രാമിലാണ് നീണ്ട നാളത്തെ കാത്തിരിപ്പിന് ശേഷം താൻ ഭാഗമാവുന്ന ചിത്രം ആരംഭിച്ചതിന്റെ സന്തോഷം മംമ്ത പങ്കിട്ടിരിക്കുന്നത്‌

വീണ്ടും ജോലിയിലേക്ക് മടങ്ങിയ സന്തോഷമാണ് മംമ്തക്കുള്ളത്. 2020ൽ സിനിമയിൽ നിന്നുള്ള മംമ്തയുടെ ആദ്യ പേചെക്ക് കൂടിയാണിത്. അത് കൊണ്ട് ഇരട്ടി സന്തോഷത്തിലാണ് മംമ്ത ഇപ്പോൾ. സിനിമയുടെ കൂടുതൽ വിവരങ്ങൾ പിന്നീട് അറിയിക്കാമെന്നും മംമ്ത പറഞ്ഞിട്ടുണ്ട്. പൂജാ വേളയിലെ ചിത്രമാണ് ഈ പോസ്റ്റിൽ കാണുന്നത്

2020ൽ മംമ്ത വേഷമിട്ട ഫോറൻസിക് തിയേറ്ററിലെത്തിയിരുന്നു. ടൊവിനോ തോമസ് നായകനായ ചിത്രമാണ് ഇത്. ഋതിക സേവ്യർ എന്ന കഥാപാത്രമാണ് മംമ്ത അവതരിപ്പിച്ചത്. സൈജു കുറുപ്പായിരുന്നു മംമ്തയുടെ നായകൻ. ഈ ചിത്രം മികച്ച പ്രതികരണം നേടിവരുമ്പോഴാണ് നിനച്ചിരിക്കാതെ ലോക്ക്ഡൗണും മറ്റു പ്രതിസന്ധികളും തല പൊക്കുന്നത്

ഋതിക സേവ്യർ ഐ. പി. എസ്. ആയി ഫോറെൻസിക്കിൽ മംമ്ത. തന്റെ കരിയറിലെ ആദ്യത്തെ ഐ. പി. എസ്. ഓഫീസർ കഥാപാത്രമാണ് മംമ്ത ഈ ചിത്രത്തിൽ കൈകാര്യം ചെയ്തത്. മുഴുനീള കഥാപാത്രമായെത്തിയ സിനിമയിൽ ഇരട്ടക്കുട്ടികളുടെ അമ്മയുടെ വേഷവും കൂടി ചേർത്താണ് താരം അവതരിപ്പിച്ചത്