Kappa | പൃഥ്വിരാജ് ചിത്രം 'കാപ്പ'യിൽനിന്ന് മഞ്ജു വാര്യർ പിൻമാറി

കടുവയുടെ വിജയത്തിന് പിന്നാലെ പൃഥ്വിരാജ്-ഷാജി കൈലാസ് കൂട്ടുകെട്ട് വീണ്ടും ഒന്നിക്കുന്ന "കാപ്പ"എന്ന ചിത്രത്തിൽ നിന്ന് നടി മഞ്ജു വാര്യർ പിന്മാറി. തല അജിത്തിന്‍റെ ചിത്രത്തിലെ തിരക്കുകൾ കാരണം ആണ് താരം പിന്മാറിയതെന്നാണ് അറിയാൻ സാധിച്ചത്. നിലവിൽ മഞ്ജു അജിത്തിന്‍റെ തമിഴ് ചിത്രത്തിന്‍റെ തിരക്കുകളിൽ ആണ്.

രണ്ടു കാലഘട്ടത്തിന്‍റെ കഥ പറയുന്ന ചിത്രത്തിൽ അജിത്തിന്‍റെ നായികയായാണ് മഞ്ജു വാര്യർ എത്തുന്നത്. പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണിത്.

വൻ താരനിരയുമായി എത്തുന്ന കാപ്പയിൽ പൃഥ്വിരാജിനും മഞ്ജു വാര്യർക്കും പുറമെ ആസിഫ് അലി, അന്നാ ബെൻ എന്നിവരും സുപ്രധാന കഥാപാത്രങ്ങളെ അവതരിപ്പിക്കുമെന്നായിരുന്നു അണിയറപ്രവർത്തകർ പറഞ്ഞിരുന്നത്. ഈ സിനിമ വേണു സംവിധാനം ചെയ്യാനാണ് ആദ്യം തീരുമാനിച്ചത്. എന്നാൽ വേണു പിന്മാറിയതോടെ ഷാജി കൈലാസ് സംവിധായകനായി എത്തുകയായിരുന്നു.

തിരുവനന്തപുരം നഗരത്തിലെ മാഫിയ ഗ്യാങുകളുടെ കഥയാണ് സിനിമ പറയുന്നത്. തിരുവനന്തപുരം തന്നെയാണ് ചിത്രത്തിന്‍റെ പശ്ചാത്തലം. ജി ആര്‍ ഇന്ദുഗോപന്‍ എഴുതിയ 'ശംഖുമുഖി' എന്ന നോവെല്ലയെ ആസ്‍പദമാക്കിയാണ് കാപ്പ എന്ന സിനിമ.

ഇന്ദുഗോപന്‍ തന്നെ തിരക്കഥയൊരുക്കുന്ന ചിത്രത്തിന്‍റെ ഛായാഗ്രഹണം സാനു ജോണ്‍ വര്‍ഗീസ് ആണ്. ജിനു വി ഏബ്രഹാം, ഡോള്‍വിന്‍ കുര്യാക്കോസ് ദിലീഷ് നായര്‍ എന്നിവരുടെ പങ്കാളിത്തത്തില്‍ ആരംഭിച്ച തിയേറ്റര്‍ ഓഫ് ഡ്രീംസ്, ഫെഫ്ക റൈറ്റേഴ്‌സ് യൂണിയന്റെ സഹകരണത്തില്‍ നിര്‍മ്മിക്കുന്ന ചിത്രമാണ് കാപ്പ.