Mammootty | മമ്മൂട്ടിയുടെ പുതിയ ചിത്രം Rorschach; ഇതെങ്ങനെ വായിക്കും? പേരിന്റെ അർത്ഥമെന്ത്?

സൂപ്പർസ്റ്റാർ മമ്മൂട്ടി (Mammootty) തന്റെ വരാനിരിക്കുന്ന ചിത്രത്തിന്റെ ഫസ്റ്റ് ലുക്ക് കഴിഞ്ഞ ദിവസം പുറത്തിറക്കിയിരുന്നു. ചിത്രം ഒരു ക്രൈം ത്രില്ലറായിരിക്കാൻ സാധ്യതയുണ്ടെന്ന് സൂചിപ്പിക്കുന്ന പോസ്റ്ററിൽ ദുരൂഹത നിറഞ്ഞിരിക്കുന്നു. ചോരയിൽ നനഞ്ഞ മുഖംമൂടി കൊണ്ട് മുഖം മറച്ച രീതിയിൽ ഒരു കസേരയിൽ ഇരിക്കുന്ന മമ്മൂട്ടിയെ ഇതിൽ കാണാം

2019ൽ 'കെട്ട്യോളാണ് എന്റെ മാലാഖ' എന്ന ചിത്രത്തിലൂടെ ശ്രദ്ധേയമായ അരങ്ങേറ്റം കുറിച്ച നിസാം ബഷീറാണ് റോഷാക്ക് എന്ന സിനിമ സംവിധാനം ചെയ്യുന്നത്. ഓമനക്കുട്ടൻ, ഇബിലീസ് തുടങ്ങിയ ചിത്രങ്ങളുടെ രചന നിർവഹിച്ച സമീർ അബ്ദുൾ ആണ് ചിത്രത്തിന്റെ തിരക്കഥാകൃത്ത്. 'റോഷാക്ക്' എന്ന പേര് പരിചിതമല്ല. എന്താണ് ഇതുകൊണ്ടു അർത്ഥമാക്കുന്നത് എന്ന് നോക്കാം (തുടർന്ന് വായിക്കുക)

റോഷാക്ക് ടെസ്റ്റ്, റോഷാക്ക് ഇൻക്ബ്ലോട്ട് ടെസ്റ്റ് എന്നും അറിയപ്പെടുന്നു. മനഃശാസ്ത്രപരമായ പരിശോധനാ രീതിയിൽ ഒരു വ്യക്തിയോട് 10 മഷി ബ്ലോട്ടുകളിൽ എന്താണ് കാണുന്നതെന്ന് വിവരിക്കാൻ ആവശ്യപ്പെടുന്നു. അവയിൽ ചിലത് കറുപ്പും ചാരനിറവുമാണ്, മറ്റുള്ളവയ്ക്ക് നിറമുള്ള പാച്ചുകൾ ഉണ്ട്

1921-ൽ സ്വിസ് സൈക്യാട്രിസ്റ്റ് ഹെർമൻ റോഷാക്ക് ആണ് ഈ ടെസ്റ്റ് അവതരിപ്പിച്ചത്. 1960-കളിൽ ഇത് ജനപ്രീതി നേടിയെടുത്തു. അറിവും വ്യക്തിത്വവും വിലയിരുത്തുന്നതിനും ചില മാനസിക അവസ്ഥകൾ കണ്ടെത്തുന്നതിനും ഇത് വ്യാപകമായി ഉപയോഗിച്ചു പോരുന്നു. സിനിമയിൽ ഈ പേരിന് എന്ത് ബന്ധം എന്ന് കാത്തിരുന്നു കാണാം

റോഷാക്കിന്റെ ഷൂട്ടിംഗ് കൊച്ചിയിലും പരിസരങ്ങളിലുമായി പുരോഗമിക്കുകയാണ്. കഥയുടെ വിശദാംശങ്ങൾ അണിയറപ്രവർത്തകർ ഇതുവരെ വെളിപ്പെടുത്തിയിട്ടില്ല. ഗ്രേസ് ആന്റണി, ഷറഫുദ്ദീൻ, ജഗദീഷ്, കോട്ടയം നസീർ, ബിന്ദു പണിക്കർ എന്നിവരും ചിത്രത്തിലുണ്ട്

മമ്മൂട്ടിയുടെ ഏറ്റവും പുതിയ ചിത്രം സിബിഐ 5: ദി ബ്രെയിൻ ഞായറാഴ്ച തിയേറ്ററുകളിൽ റിലീസ് ചെയ്തു. ഇൻവെസ്റ്റിഗേറ്റീവ് ത്രില്ലർ ഗണത്തിലെ അഞ്ചാമത്തെ ഭാഗമാണ് ഈ ചിത്രം. ഇതുവരെ ബോക്‌സ് ഓഫീസിൽ വിജയംകൊണ്ട സി.ബി.ഐ. പരമ്പരയിലെ പുതിയ സിനിമയുടെ വാണിജ്യ വിജയം വിലയിരുത്തപ്പെട്ട് വരുന്നതേയുള്ളൂ

സോണി ലിവിൽ പ്രീമിയർ ചെയ്യുന്ന 'പുഴു' ആണ് അടുത്ത മമ്മൂട്ടി ചിത്രം. പാർവതി തിരുവോത്താണ് നായിക. മെയ് 13ന് റിലീസ് ചെയ്യും