Meghna Raj | 'ഒപ്പം നിന്നത് നസ്രിയയും അനന്യയും; ഇനിയുള്ള ജീവിതം മകനുവേണ്ടി': മേഘ്ന രാജ്

ചിരഞ്ജീവിയുടെ മരണത്തിൽ താൻ മാനസികമായി തളർന്നുപോയിരുന്നെന്നും ഇനി ജീവിക്കുന്നത് മകനു വേണ്ടി മാത്രമാണെന്നും നടി മേഘ്ന രാജ്. ഭർത്താവ് ചിരഞ്ജീവിയുടെ മരണശേഷം ആദ്യമായാണ് മേഘന മാധ്യമങ്ങളെ അഭിമുഖീകരിക്കുന്നത്.

‘ഞാൻ എത്രത്തോളം ശക്തയാണെന്ന് അറിയില്ല. കാൽതച്ചുവട്ടിലവെ മണ്ണ് ഒലിച്ചു പോയതു പോലെയായിരുന്നു നിന്നിരുന്ന ഇടം ഇളകിപ്പോകുന്ന അവസ്ഥയായിരുന്നു ചിരുവിന്റെ വേർപാട്. എല്ലാം ചിട്ടയോടെ ചെയ്യുന്ന ആളായിരുന്നു ഞാൻ. ചിരു നേർ വിപരീതവും. ജീവിത്തിലെ ഓരോ നിമിഷവും ആസ്വദിക്കുന്നതായിരുന്നു ചിരുവിന്റെ രീതി. മരണശേഷമാണ് എനിക്ക് അതിന്റെ നഷ്ടം മനസ്സിലായത്. ഇനി ഞാനും ചിരുവിനെപ്പോലെയാകും. നാളെ എന്താണ് സംഭവിക്കുന്നതെന്ന് അറിയില്ലല്ലോ?.’–മേഘ്ന പറയുന്നു.

‘മകൻ ചിരുവിനെപ്പോലെ തന്നെയാണ്. ജനിക്കുന്നത് ആൺകുട്ടി ആയിരിക്കുമെന്ന് ചിരു പറയുമായിരുന്നു. പെൺകുട്ടിയാകുമെന്നായിരുന്നു ഞാൻ പറഞ്ഞിരുന്നത്. അവിടെയും ചിരു പറഞ്ഞത് സത്യമായി. ലയൺകിങിലെ സിംബയെപ്പോെല കുട്ടിയെ വളർത്തണമെന്നായിരുന്നു ചിരുവിന്റെ ആഗ്രഹം. കുഞ്ഞ് ജനിക്കുമ്പോൾ സിംബയെ പരിചയപ്പെടുത്തുന്നതുപോലെ ഈ ലോകത്തിനു മുന്നിൽ താൻ പരിചയപ്പെടുത്തുമെന്നും ചിരു പറഞ്ഞിരുന്നു. എന്നാൽ ഒതൊക്കെ വെറുതെയായി.’–മേഘ്ന പറഞ്ഞു.

‘വിഷമഘട്ടത്തില്‍ മാതാപിതാക്കളും അടുത്ത സുഹൃത്തുക്കളായ നസ്രിയയും അനന്യയും ഒപ്പം നിന്നു. എനിക്ക് ഇപ്പോള്‍ കുഞ്ഞുണ്ട്. ആ കുഞ്ഞിലൂടെ ചിരുവിന്റെ എല്ലാ സ്വപ്നങ്ങളും ഞാൻ നിറവേറ്റും. ചിരു എല്ലാവരുടെയും പ്രിയങ്കരനായിരുന്നു. അതുപോലെ എന്റെ മകനെയും ഞാൻ വളർത്തും.'

‘അഭിനയം എന്റെ അഭിനിവേശമാണ്. അത് എന്റെ രക്തത്തിലുളളതാണ്. ഞാന്‍ ഇഷ്ടപ്പെടുന്ന എന്തെങ്കിലും ഉപേക്ഷിക്കണമെന്ന് എന്റെ ഭര്‍ത്താവ് ഒരിക്കലും ആഗ്രഹിക്കുകയില്ല. എനിക്ക് കഴിയുന്നിടത്തോളം കാലം ഞാന്‍ സിനിമകളില്‍ അഭിനയിക്കുന്നത് തുടരും. '- മേഘ്‌ന പറഞ്ഞു.