ഗർഭകാലം കൊട്ടിഘോഷിക്കാത്ത മിയ ജോർജിനും ഭാമയ്ക്കും അഭിനന്ദനവുമായി ആരാധകർ

ഗർഭകാലം തുടങ്ങിയാൽ ഡാൻസ്, ഫോട്ടോഷൂട്ട്, കഴിക്കുന്ന ഭക്ഷണം, ദിനചര്യകൾ, കുഞ്ഞിന്റെ ചലനങ്ങളുടെ വിവരണം... കാലം മാറിയപ്പോൾ ഗർഭകാലം ആഘോഷിക്കുന്നതിന്റെ രീതികളും അടിമുടി മാറി. കുഞ്ഞു പിറന്നു കഴിഞ്ഞാലുള്ള സീരീസ് വേറെ. പക്ഷെ ഇതൊന്നുമില്ലാതെ ആദ്യത്തെ കുഞ്ഞിനെ വരവേറ്റ താരമാണ് മിയ ജോർജ്. കഴിഞ്ഞ വർഷം സെപ്റ്റംബറിൽ വിവാഹിതയായ മിയ ഗർഭിണിയായ വിവരം പോലും ആരും അറിഞ്ഞില്ല, അല്ലെങ്കിൽ അറിയിച്ചില്ല എന്നതാണ് സത്യം. മിയക്കിതാ അഭിനന്ദനത്തിന്റെ പൂച്ചെണ്ടുകളുമായി ആരാധകർ എത്തിയിരിക്കുന്നു

മിയയും ഭർത്താവ് അശ്വിൻ ഫിലിപ്പും ചേർന്ന് കുഞ്ഞുമൊത്തുള്ള ഫോട്ടോ പോസ്റ്റ് ചെയ്താണ് തങ്ങൾക്കൊരു മകൻ പിറന്ന വിവരം  ഏവരെയും അറിയിക്കുന്നത്. ഗർഭകാലം കൊട്ടിഘോഷിക്കാതിരുന്ന മിയ ജോർജിന്റെ ചിത്രത്തിന് താഴെ എത്ര അഭിനന്ദിച്ചാലും മതിയാവാത്ത നിലയിലാണ് ആരാധകർ. ഈ കാണുന്ന കമന്റുകൾ വെറും സാമ്പിൾ മാത്രമാണ്. സോഷ്യൽ മീഡിയ ചർച്ചകളിൽ മിയക്കു മാത്രമല്ല, ഭാമയ്ക്കും അഭിനന്ദനം അറിയിക്കുന്നവരുണ്ട്. എന്നാൽ ഇവർ രണ്ടുപേരും മാത്രമല്ല, ഗർഭകാലം തങ്ങളുടെ സ്വകാര്യ സന്തോഷമായി പാലിച്ചുപോന്ന നടീനടന്മാർ മലയാള സിനിമയിൽ അനവധിയാണ്. അവരെയും ഇവിടെ പരിചയപ്പെടാം  (തുടർന്ന് വായിക്കുക)

മകൾ ഉണ്ടായ കാര്യം പറഞ്ഞ് ഒരു പോസ്റ്റുപോലും ഇടാത്തയാളാണ് ഭാമയും ഭർത്താവ് അരുണും. ഒരു മാധ്യമറിപ്പോർട്ടിലാണ് അക്കാര്യം ആദ്യമായി പുറത്തറിഞ്ഞത്. അതും പ്രസവം കഴിഞ്ഞ് ഏതാനും മാസങ്ങൾ കടന്ന ശേഷം മാത്രം. മകളുടെ കുഞ്ഞികൈകാലുകൾ മോൾഡ് തീർത്ത ചിത്രമാണ് ഭാമ ഇതുവരെയായും പോസ്റ്റ് ചെയ്ത ഏക വിശേഷം

സംവൃത സുനിലിന്റെ അഗസ്ത്യയും രുദ്രയും പിറന്ന ശേഷമാണ് അതിന്റെ സന്തോഷം സോഷ്യൽ മീഡിയയിൽ ആർഭാടങ്ങൾ ഒന്നുമില്ലാതെ പോസ്റ്റ് ചെയ്തത്. താരം ഭർത്താവ് അഖിലിനും മക്കൾക്കുമൊപ്പം വിദേശത്താണ്

മുത്തുമണി അമ്മയാവുന്നു എന്ന വിവരം സംവിധായകൻ കൂടിയായ ഭർത്താവ് പി.ആർ. അരുൺ ഒരു ഫോട്ടോ പോസ്റ്റിലൂടെ അറിയിച്ചു. അത്രമാത്രം. പിന്നെ കുഞ്ഞുണ്ടായ വിവരവും. കുഞ്ഞിന്റെ സ്വകാര്യത മാനിക്കുന്ന മാതാപിതാക്കളായി അവർ കുഞ്ഞിന്റെ കൂടുതൽ വിവരങ്ങൾ ഒന്നും തന്നെ പുറത്തുവിട്ടില്ല

ചാക്കോച്ചന്റെയും പ്രിയ സാമുവലിന്റെയും കാത്തിരുന്നു കിട്ടിയ കണ്മണിയാണ് ഇസഹാക്. മകനുണ്ടായ വിവരം പുറത്തറിഞ്ഞതും പ്രിയ ഗർഭിണിയായത് എപ്പോൾ എന്ന ചോദ്യമാണ് പലരും ആദ്യം ചോദിച്ചത്. പ്രിയയുടെ ബേബി ഷവർ ചിത്രങ്ങൾ പോലും കുഞ്ഞ് പിറന്ന ശേഷമാണ് ചാക്കോച്ചൻ പോസ്റ്റ് ചെയ്തിട്ടുള്ളത്

പൃഥ്വിരാജിന്റെ ഭാര്യ സുപ്രിയ അമ്മയാവുന്ന വിവരം പോലും ആരും അറിഞ്ഞില്ല. മകൾ പിറന്നു, അവളുടെ പേര് അലംകൃത മേനോൻ പൃഥ്വിരാജ് എന്നാണെന്നുള്ള പ്രഖ്യാപനം മാത്രമാണ് ഉണ്ടായത്. മകളുടെ സ്വകാര്യതയെ താൻ മാനിക്കുന്നു എന്ന് ഉറക്കെ പ്രഖ്യാപിച്ച താരമാണ് പൃഥ്വിരാജ്. ഇപ്പോഴും അലംകൃതയുടെ മുഖം കാണാത്ത തരത്തിലുള്ള പോസ്റ്റുകളാണ് പൃഥ്വിരാജും സുപ്രിയയും പോസ്റ്റ് ചെയ്യുക. സോഷ്യൽ മീഡിയയിലെ കുഞ്ഞുങ്ങളുടെ ചിത്രം ദുരുപയോഗം ചെയ്യുന്ന പ്രവണതയുള്ള ഈ കാലത്ത് മകളുടെ സുരക്ഷയ്ക്ക് പ്രാമുഖ്യം നൽകുന്ന മാതാപിതാക്കളാണിവർ

നിവിൻ പോളിയുടെയും റിന്നയുടെയും രണ്ടു മക്കളും പിറന്ന ശേഷം മാത്രമാണ് അക്കാര്യം പുറംലോകം അറിഞ്ഞത്

ടൊവിനോയുടെയും ലിഡിയയുടെയും ഇസയും ഹാനും പിറന്ന ശേഷം മാത്രമാണ് ഈ വിവരം സോഷ്യൽ മീഡിയയിലൂടെ പുറത്തറിഞ്ഞത്

രണ്ടാമത്തെ കുഞ്ഞ് വരുന്നു എന്ന സന്തോഷം മാത്രമാണ് വിനീത് ശ്രീനിവാസൻ പോസ്റ്റ് ചെയ്തിട്ടുള്ളത്. ദിവ്യയുടെ പ്രസവ ശേഷമാണ് മറ്റു വിവരങ്ങൾ അവർ പുറത്തുവിട്ടത്