കോവിഡ് കാലത്ത് കല്യാണം കഴിച്ചാൽ ഹണിമൂൺ എങ്ങോട്ട്? ഉത്തരവുമായി മിയ

ലോക്ക്ഡൗൺ നാളുകളിലാണ് വിവാഹിതയാവാൻ പോകുന്ന വാർത്തയുമായി നടി മിയ ജോർജ് എത്തുന്നത്. ബിസിനസ്കാരൻ അശ്വിനാണ് മിയയുടെ വരൻ. ഭാവനയുടെ കല്യാണം കഴിഞ്ഞപ്പോൾ മുതലേ മകളുടെ വിവാഹക്കാര്യം മനസ്സിൽകൊണ്ടു നടന്ന മിയയുടെ അമ്മ തന്നെയാണ് അശ്വിനെ കണ്ടെത്തി കൊടുത്തതും. 'വനിതയ്ക്ക്' നൽകിയ അഭിമുഖത്തിൽ മിയ അക്കാര്യം പറയുന്നു

മാട്രിമോണി സൈറ്റിൽ നിന്നാണ് മിയക്കായി അമ്മ വരനെ കണ്ടെത്തിയത്. ആയിരത്തോളം പ്രൊഫൈലുകളിൽ നിന്നുമാണ് മിയയുടെ അമ്മ ഒടുവിൽ അശ്വിനെ കണ്ടെത്തിയത്

"അവസാനം ദേ വരുന്നു. തേടിയ വള്ളി. 'കൂടിവന്നാൽ തൃശൂർ വരെ. അതിനപ്പുറത്തേക്ക് എന്റെ കൊച്ചിനെ വിടത്തില്ല' എന്നൊക്കെ പറഞ്ഞിരുന്ന മമ്മിക്ക് എറണാകുളത്തു നിന്നുള്ള ചെക്കനെ അങ്ങ് പിടിച്ചു. 'ദേ നോക്ക് നോക്ക്' എന്നുപറഞ്ഞു ഒരു ഫോട്ടോയുമായി എന്റെ പിറകെ നടക്കാൻ തുടങ്ങി," മിയ പറയുന്നു

ബംഗളൂരുവിലും ഇംഗ്ലണ്ടിലും പഠനം കഴിഞ്ഞ അശ്വിൻ യു.കെ.യിലും യു.എ.ഇ.യിലും ബിസിനസ് ചെയ്ത ശേഷം നാട്ടിലേക്കു തിരികെയെത്തുകയായിരുന്നു

ഡ്രൈവിംഗ്, സ്പോർട്സ് പോലുള്ള സമാന ഇഷ്‌ടങ്ങൾ ഇരുവർക്കുമുണ്ട്. മിയക്ക് സംസാരിക്കാനാണിഷ്‌ടമെങ്കിൽ അശ്വിന് കേൾക്കാനാണ് താൽപ്പര്യം. കല്യാണം കഴിഞ്ഞാലും മിയ അഭിനയിക്കുന്നതിൽ അശ്വിന് വിരോധമൊന്നുമില്ല

ഈ കോവിഡ് ലോക്ക്ഡൗൺ കാലത്ത് വിവാഹം കഴിഞ്ഞാൽ ഹണിമൂൺ ട്രിപ്പ് എങ്ങോട്ട് എന്ന ചോദ്യത്തിനും ഇവർക്ക് രണ്ടുപേർക്കും ഉത്തരമുണ്ട്. "മിയക്ക് ലോകത്തെ ഏറ്റവും ബ്യൂട്ടിഫുൾ പ്ലെയ്സ് എന്ന് പറഞ്ഞാൽ അത് പാലായാണ്. ഞങ്ങൾ എറണാകുളത്ത് നിന്നും പാലായ്ക്കും പിന്നെ, പാലായിൽ നിന്നും എറണാകുളത്തിനും അങ്ങനെ പൊയ്ക്കൊണ്ടേയിരിക്കും," അശ്വിൻ പറയുന്നു

മിയയും അശ്വിനും വിവാഹനിശ്ചയ വേളയിൽ