ഒടിയന് ശേഷം മോഹൻലാലും ശ്രീകുമാർ മേനോനും വീണ്ടും; സന്തോഷം പങ്കുവച്ച് സംവിധായകൻ

കൊച്ചി: ഒടിയന് ശേഷം മോഹൻലാലും സംവിധായകൻ വി എ ശ്രീകുമാർ മേനോനും വീണ്ടും ഒന്നിക്കുന്നു. ശ്രീകുമാർ മേനോൻ തന്നെയാണ് ഇക്കാര്യം ഫേസ്ബുക്കിൽ അറിയിച്ചത്.

സിനിമയിലല്ല, ഇത്തവണ പരസ്യ ചിത്രത്തിലാണ് ഇരുവരും വീണ്ടും ഒന്നിക്കുന്നത്. ലാലേട്ടനുമായുള്ള ഷൂട്ടിംഗിന്റെ ചിത്രങ്ങളും ശ്രീകുമാർമേനോൻ പങ്കുവെച്ചിട്ടുണ്ട്.

മൈജിയ്ക്കുവേണ്ടിയുള്ള പരസ്യചിത്രത്തിലാണ് ഇരുവരും ഒന്നിച്ചത്. ഏറെ സന്തോഷം തരുന്ന മണിക്കൂറുകളായിരുന്നു ഇന്നലെ കടന്നുപോയതതെന്നും ശ്രീകുമാരമേനോൻ പറയുന്നു.

ലാലേട്ടനോടൊപ്പമുള്ള ഷൂട്ടിംഗ് വേളകളെന്നും ആഹ്ളാദകരമാണെന്നും മൂന്നു മണിക്കൂർ വെറും മൂന്ന് മിനിറ്റുപോലെ കടന്നുപോയെന്നും സംവിധായകൻ കുറിച്ചു. അദ്ദേഹത്തിൽ നിന്നും എപ്പോഴും ലഭിക്കുന്ന കരുതലും സ്നേഹവും, ഒരു അപൂർവ ഭാഗ്യമായാണ് കരുതുന്നതെന്നും ശ്രീകുമാർമേനോൻ പറയുന്നു.

മോഹൻലാലിനെ പഴയ ലുക്കിൽ തിരിച്ചുതന്നതിന് ചിത്രങ്ങൾക്ക് താഴെ ആരാധകർ ശ്രീകുമാർ മേനോനോട് നന്ദി പറയുന്നുണ്ട്. ഒടിയൻ സംഭവിച്ചില്ലായിരുന്നു എങ്കിൽ നിങ്ങൾ ഇന്ന് കാണുന്ന ഹെൽത്തി ആയ ഫിറ്റ് ആയ, ചെറുപ്പമായ ലാലേട്ടൻ ഉണ്ടാകില്ലായിരുന്നുവെന്നും ഒരു ആരാധകൻ കുറിക്കുന്നു.