Mohanlal | സ്വപ്നം പോലൊരു ദിവസം; ഷിജിലിക്കരികിലെത്തി പ്രിയപ്പെട്ട ലാലേട്ടൻ

വീൽ ചെയറിന്റെ സഹായത്തോടെ ജീവിക്കുന്ന ഷിജിലി കോഴിക്കോട് മാങ്കാവ് ജംഗ്ഷനിൽ ലോട്ടറി കച്ചവടം നടത്തുന്നു. തന്റെ ജീവിതത്തിലെ അസുലഭ നിമിഷത്തെക്കുറിച്ച് ഷിജിലി ഫേസ്ബുക്കിൽ ഒരു കുറിപ്പിട്ടപ്പോഴാണ് ലോകം അതേക്കുറിച്ചറിഞ്ഞത്. പ്രിയപ്പെട്ട ലാലേട്ടൻ ഷിജിലിയെ കാണാനെത്തി. ഒപ്പം നിന്നൊരു ഫോട്ടോയുമെടുത്തു. സന്തോഷവതിയായി ഷിജിലി അതേക്കുറിച്ച് പറയുന്നത് കേൾക്കാം:

'സ്വപ്നം പോലെ ഒരു ദിവസമായിരുന്നു ഇന്നലെ. ഏത് വാക്കുകളിൽ വർണിക്കണമെന്നറിയാത്തത്രയും ഭംഗിയുണ്ടതിന്. എന്റെ ജീവിതത്തിലെ ഏറ്റവും മനോഹരമായ നിമിഷങ്ങൾ എന്റെ ലാലേട്ടനൊപ്പം ഞാൻ ചിലവഴിച്ചു. എന്റെ ഏറ്റവും വലിയ ആഗ്രഹം, എത്രയോ കാലത്തെ പരിശ്രമം എല്ലാത്തിനും ഇന്നലെ ഫലമുണ്ടായി...

കണ്ണുനിറയെ കണ്ടു ഞാൻ എന്റെ ലാലേട്ടനെ; ചേർത്ത് പിടിച്ചു എന്നെ ഏട്ടന്റെ കൈകൾ. കുറേ വിശേഷങ്ങൾ ചോദിച്ചു, മനസ് നിറയെ സ്നേഹം തന്നു. ഇനിയുള്ള കാലമത്രയും ഓർക്കാൻ എനിക്ക് ഈ നിമിഷങ്ങൾ മതി; എന്റെ ഏട്ടനെ ചേർന്ന് നിന്ന ഈ നിമിഷങ്ങൾ മാത്രം...

നന്ദി പറയാനുള്ളത് സർവ്വേശ്വരനോടാണ്. പിന്നെ കോഴിക്കോട്ടെ ലാലേട്ടൻ ഫാൻസിലെ എന്റെ പ്രിയപ്പെട്ട ഏട്ടൻമാരോടും. എന്റെ പ്രിയ സുഹൃത്ത് പ്രജിത്ത്, ടിന്റു ഏട്ടൻ, സുഗീതേട്ടൻ, സുഹാസേട്ടൻ, രാജൻ ചേട്ടൻ എല്ലാവർക്കും നൂറ് നൂറ് നന്ദി.'