ഓണത്തിന് തീപാറും; മോഹന്‍ലാലിന്‍റ 'റാം' ദുല്‍ഖറിന്‍റെ 'കിങ് ഓഫ് കൊത്ത' ഓഗസ്റ്റിലെത്തിയേക്കും

മലയാള സിനിമ പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളാണ് മോഹന്‍ലാലിന്‍റെ റാം, ദുല്‍ഖര്‍ സല്‍മാന്‍റെ കിങ് ഓഫ് കൊത്ത. വലിയ മുതല്‍ മുടക്കില്‍ തയാറാക്കിയ രണ്ട് സിനിമകളും ഈ വര്‍ഷം ഓഗസ്റ്റില്‍ റിലീസിനെത്തും എന്നാണ് സിനിമാ മേഖലയില്‍ നിന്നുള്ള സൂചന.

ഓണം റിലിസായെത്തുന്ന രണ്ട് സിനിമകളും ഇരുവരുടെയും ആരാധകര്‍ക്കുള്ള ഓണ സമ്മാനമായിരിക്കും എന്നാണ് പ്രതീക്ഷിക്കുന്നത്. ജീത്തു ജോസഫ് സംവിധാനം ചെയ്യുന്ന റാം രണ്ട് ഭാഗങ്ങളായാണ് റീലീസ് ചെയ്യുക. ട്വല്‍ത്ത് മാന് ശേഷം മോഹന്‍ലാലും ജീത്തു ജോസഫും ഒന്നിക്കുന്ന ചിത്രത്തിന്‍റെ ഷൂട്ടിങ് മൂന്ന് വര്‍ഷം മുന്‍പ് ആരംഭിച്ചിരുന്നെങ്കിലും കോവിഡ് പ്രതിസന്ധി മൂലം ഷൂട്ടിങ് നിര്‍ത്തി വേക്കെണ്ടി വന്നു. പിന്നാലെ കഴിഞ്ഞ ഓഗസ്റ്റിലാണ് ചിത്രീകരണം പുനരാരംഭിച്ചത്.

തമിഴ് താരം തൃഷയാണ് റാമിലെ നായിക. ശ്യാമപ്രസാദിന്‍റെ ഹേ ജൂഡിലൂടെ മലയാളത്തില്‍ അരങ്ങേറിയ തൃഷയുടെ രണ്ടാമത്തെ മലയാള ചിത്രമാണ് റാം.എറണാകുളം , ധനുഷ്കോടി, ഡല്‍ഹി, ഉസ്ബെക്കിസ്ഥാൻ, കെയ്റോ, ലണ്ടൻ എന്നിവിടങ്ങളാണ് പ്രധാന ലൊക്കേഷനുകൾ.

സീ സ്റ്റുഡിയോസും ദുൽഖറിന്റെ വേഫേറെർ ഫിലിംസും ചേർന്ന് നിർമിക്കുന്ന കിങ് ഓഫ് കൊത്ത മലയാളം, തമിഴ്, തെലുഗ്, ഹിന്ദി, കന്നട തുടങ്ങി അഞ്ചു ഭാഷകളിലാണ് റിലീസ് ചെയ്യുന്നത്.

ഇന്ദ്രജിത്ത്, സുരേഷ് മേനോൻ, സിദ്ദിഖ്, ദുർഗ കൃഷ്ണ, ആദിൽ ഹുസൈൻ, ചന്തുനാഥ് എന്നിവരാണ് റാമിലെ മറ്റുതാരങ്ങൾ. ഛായാഗ്രഹണം സതീഷ് കുറുപ്പ്. എഡിറ്റിങ് വി.എസ്. വിനായക്. സംഗീതം വിഷ്ണു ശ്യാം.

പ്രശസ്ത സംവിധായകനായ ജോഷിയുടെ മകൻ അഭിലാഷ് ജോഷി ആദ്യമായി സംവിധാനം ചെയ്യുന്ന ചിത്രം കൂടിയാണ് കിങ് ഓഫ് കൊത്ത.രണ്ടു കാലഘട്ടങ്ങളിലെ കഥയാണ് കിങ് ഓഫ് കൊത്ത പറയുന്നത്. ജേക്സ് ബിജോയ്, ഷാൻ റഹ്മാൻ എന്നിവരാണ് സം​ഗീത സംവിധാനം നിർവഹിക്കുന്നത്. ആക്ഷന് ഏറെ പ്രാധാന്യമുള്ള ചിത്രത്തിന്റെ സംഘട്ടനരം​ഗങ്ങളൊരുക്കുന്നത് രാജശേഖറാണ്.