RRR to '83 and Maidaan| RRR മുതൽ മൈദാൻ വരെ; ബോളിവുഡിൽ വരാനിരിക്കുന്ന വമ്പൻ സിനിമകൾ

കോവിഡിനെ തുടർന്നുള്ള പ്രതിസന്ധിക്ക് ശേഷം ബോളിവുഡിൽ ഇനി വരാനുള്ളത് ബിഗ് ബജറ്റ് സിനിമകളുടെ കാലമാണ്. പത്തോളം ബിഗ് ബജറ്റ് ചിത്രങ്ങളാണ് ബോളിവുഡിൽ പുറത്തിറങ്ങാനുള്ളത്. കോടികൾ മുതൽമുടക്കിൽ ഒരുക്കിയ പിരീഡ് ഡ്രാമ, ബയോപിക്ക് ചിത്രങ്ങളാണ് ഇതിൽ ശ്രദ്ധേയം.

ബാഹുബലിക്ക് ശേഷം എസ്എസ് രാജമൗലിയുടെ ബ്രഹ്മാണ്ഡ ചിത്രമാണ് ആർആർആർ. ബോളിവുഡിലടക്കം ബാഹുബലിയുണ്ടാക്കിയ തരംഗം തന്നെയാണ് ആർആർആറിന്റെ ഹൈലൈറ്റ്. ആലിയ ഭട്ടാണ് ചിത്രത്തിൽ തെന്നിന്ത്യൻ സൂപ്പർ താരങ്ങളായ രാം ചരണിനും ജൂനിയർ എൻടിആറിനുമൊപ്പം എത്തുന്നത്.

ഇന്ത്യൻ ഫുട്ബോൾ ടീമിനെ വാർത്തെടുക്കുന്നതിൽ നിർണായക പങ്കുവഹിച്ച സയ്യിദ് അബ്ദുൽ റഹ്മാന്റെ ജീവിത കഥ പറയുന്ന ചിത്രമാണ് മൈദാൻ. 1950 കളുടെ തുടക്കം മുതൽ 1960 വരെ ഇന്ത്യൻ ടീമിനെ വാർത്തെടുത്ത ഇതിഹാസ ഫുട്ബോൾ താരമായി ബിഗ് സ്ക്രീനിൽ എത്തുന്നത് അജയ് ദേവഗൺ ആണ്.

ബാഹുബലിക്ക് ശേഷം പ്രഭാസിന്റെ ആരാധകർ കാത്തിരിക്കുന്ന ചിത്രമാണ് ആദിപുരുഷ്. ഓം റൗട്ട് സംവിധാനം ചെയ്യുന്ന ചിത്രം രാമായണ കഥയെ ആസ്പദമാക്കിയാണ് എടുത്തിരിക്കുന്നത്. സയ്ഫ് അലി ഖാനും ചിത്രത്തിൽ പ്രധാന വേഷത്തിൽ എത്തുന്നു. ബോളിവുഡിൽ ഒരുക്കിയ ചിത്രം തെലുങ്ക് അടക്കമുള്ള ദക്ഷിണേന്ത്യൻ ഭാഷകളിലും പുറത്തിറങ്ങും.

ഹോളിവുഡ് ക്ലാസ് ഫോറസ്റ്റ് ഗമ്പിന്റെ ഹിന്ദി പതിപ്പാണ് ലാൽ സിംഗ് ഛദ്ദ. ആമിർ ഖാൻ ആണ് ചിത്രത്തിൽ പ്രധാന വേഷത്തിൽ എത്തുന്നത്. ഫോറസ്റ്റ് ഗമ്പ് എന്ന നോവലിനെ ആസ്പദമാക്കി എടുത്ത ചിത്രത്തിൽ ടോം ഹാങ്ക്സ് അവതരിപ്പിച്ച കഥാപാത്രമാണ് ഹിന്ദിയിൽ ആമിർ ഖാൻ ചെയ്യുന്നത്.

1960 കളിലേയും 70 കളിലേയും യുദ്ധകാല പശ്ചാത്തലത്തിൽ ഒരുക്കിയ ചിത്രമാണ് ഇക്കീസ്. വരുൺ ധവാനാണ് ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നത്. ഇന്ത്യ-പാക് യുദ്ധത്തിൽ കൊല്ലപ്പെട്ട അരുൺ കേദാർപാലിനെ കുറിച്ചാണ് ചിത്രം. ഇന്ത്യൻ സൈന്യത്തിലെ ഏറ്റവും ധീരനായ പട്ടാളക്കാരനായാണ് സെക്കന്റ് ലെഫ്റ്റണന്റ് അരുൺ കേദാർപാൽ വിശേഷിപ്പിക്കപ്പെടുന്നത്. അടുത്ത വർഷം പുറത്തിറങ്ങുന്ന ചിത്രം സംവിധാനം ചെയ്യുന്നത് ശ്രീറാം രാഘവനാണ്.

ആലിയ ഭട്ടിനെ പ്രധാനവേഷത്തിൽ അവതരിപ്പിച്ച് സഞ്ജയ് ലീല ബൻസാലി ഒരുക്കുന്ന ചിത്രമാണ് ഗംഗുഭായ് ഗംഗുഭായ് കത്തിയാവാഡി. റെഡ് സ്ട്രീറ്റിൽ നിന്ന് രാഷ്ട്രീയത്തിലേക്ക് എത്തിയ ഗംഗുഭായിടെ കഥയാണ് ചിത്രം പറയുന്നത്.

പൃഥ്വിരാജ് ചൗഹാൻ രാജാവായി അക്ഷയ് കുമാർ എത്തുന്ന ചിത്രമാണ് പൃഥ്വിരാജ്. 20200 ലാണ് ചിത്രം പുറത്തിറങ്ങുന്നത്.

മണിരത്നം ചിത്രം പൊന്നിയൻ ശെൽലമാണ് പ്രതീക്ഷയേകുന്ന മറ്റൊരു ചിത്രം. വമ്പൻ താരനിരയെ അണിനിരത്തി ഒരുക്കുന്ന ചിത്രം രണ്ട് ഭാഗങ്ങളായാണ് പുറത്തിറങ്ങുക. തെക്കേ ഇന്ത്യയിൽ ക്രി.വ. 13-ആം നൂറ്റാണ്ടുവരെ ഭരണം നടത്തിയ തമിഴ് സാമ്രാജ്യത്തിലെ ഏറ്റവും പ്രസിദ്ധനും കലിംഗം മുതല്‍ ശ്രീലങ്ക വരെയുള്ള ഭൂഭാഗങ്ങളുടെ അധിപനുമായിരുന്ന അരുള്‍മൊഴി വര്‍മനെ കേന്ദ്രീകരിച്ചാണ് ചിത്രം ഒരുക്കുന്നത്. വിക്രം, ജയം രവി, കാർത്തി, തൃഷ, ഐശ്വര്യ റായ്, ശരത് കുമാർ, ഐശ്വര്യ ലക്ഷ്മി, ജയറാം, തുടങ്ങി വമ്പൻ താരനിരയാണ് ചിത്രത്തിലുള്ളത്.

സ്വാതന്ത്ര്യത്തിന് മുമ്പുള്ള ഇന്ത്യൻ പശ്ചാത്തലത്തിൽ ഒരുക്കുന്ന ഷംശേരയിൽ റൺബീർ കപൂറാണ് നായകൻ. വാണി കപൂർ ആണ് ചിത്രത്തിലെ നായിക.

മുൻ ഇന്ത്യൻ ക്രിക്കറ്റ് ടീം ക്യാപ്റ്റൻ കപിൽ ദേവിനെ കുറിച്ചുള്ള 83 യിൽ റൺവീർ സിംഗ് ആണ് കപിൽ ദേവായി വേഷമിടുന്നത്. ഈ വർഷം ക്രിസ്മസിന് പുറത്തിറങ്ങുമെന്ന് പ്രതീക്ഷിക്കുന്ന ചിത്രത്തിൽ ദീപിക പദുകോൺ ആണ് കപിൽ ദേവിന്റെ ഭാര്യയുടെ വേഷം അവതരിപ്പിക്കുന്നത്.