'ദൃശ്യം 2' വരുന്നു; ലോക്ക്ഡൗണിന് ശേഷം മോഹൻലാൽ വീണ്ടും ജോർജ് കുട്ടിയാകും

ലോക്ക്ഡൗണ്‍ കഴിഞ്ഞാല്‍ ഉടന്‍ മോഹന്‍ലാല്‍ അഭിനയിക്കുന്നത് ദൃശ്യത്തിന്റെ രണ്ടാം ഭാഗത്തിലെന്ന് റിപ്പോർട്ട്.

2013 ഡിസംബറില്‍ റിലീസ് ചെയ്ത ജീത്തു ജോസഫ് സംവിധാനം ചെയ്ത ദൃശ്യം അക്കാലത്തെ ഏറ്റവും വലിയ ഹിറ്റായിരുന്നു. തുടര്‍ന്ന് രണ്ടാംഭാഗത്തിന് സാധ്യതയുണ്ടെന്ന സൂചനകള്‍ സംവിധായകൻ നല്‍കിയിരുന്നു.

ജിത്തു ജോസഫ് രചനയും സംവിധാനവും നിർവഹിച്ച് മോഹൻലാലും മീനയും പ്രധാന വേഷങ്ങളിൽ അഭിനയിച്ച മലയാളം ത്രില്ലർ ചിത്രമാണ്‌ ദൃശ്യം. ജീത്തു ജോസഫ് തന്നെയാണ് രണ്ടാംഭാഗവും എഴുതി സംവിധാനം ചെയ്യുന്നത്.

ആശീര്‍വാദ് സിനിമയ്ക്ക് വേണ്ടി ആന്റണി പെരുമ്പാവൂര്‍ ആയിരിക്കും സിനിമ നിര്‍മ്മിക്കുക. നിയന്ത്രിത സാഹചര്യത്തില്‍ ചിത്രീകരിച്ച്‌ പൂര്‍ത്തിയാക്കുന്നൊരു ക്രൈം ത്രില്ലറാകും സിനിമയെന്ന് നിര്‍മ്മാതാവ് ആന്റണി പെരുമ്പാവൂര്‍ പറഞ്ഞതായി മലയാള മനോരമ റിപ്പോര്‍ട്ട് ചെയ്യുന്നു

ലോക്ഡൗണിന് ശേഷം തുടര്‍ച്ചയായി 60 ദിവസം കൊണ്ട് കേരളത്തില്‍ ചിത്രീകരിച്ച്‌ പൂര്‍ത്തിയാക്കുന്ന വിധത്തിലാണ് സിനിമ.

 ദൃശ്യം രണ്ടിന്റെ ഷൂട്ടിങ്ങിന് ശേഷം മാത്രമേ മോഹന്‍ലാല്‍ ഇനി മറ്റ് സിനിമകളില്‍ അഭിനയിക്കുകയുളളുവെന്നും സൂചനയുണ്ട്.

ലോക്ക്ഡൗണിനെ തുടർന്ന് മാസങ്ങളായി തിയറ്ററിൽ നിന്നും അകന്നു നിൽക്കുന്ന പ്രേക്ഷകരെ മോഹൻലാല്‍ ചിത്രത്തിലൂടെ തിയറ്ററുകളിലേക്ക് അടുപ്പിക്കുക എന്ന ഉദ്ദേശമാണ് തിടുക്കത്തിലുള്ള പ്രഖ്യാപനത്തിന് പിന്നിലെന്നാണ് സൂചന

ജോർജുകുട്ടിയുടെ മകൾ കൊലപാതകത്തിനുത്തരവാദിയാകുന്നു. കൊല്ലപ്പെടുന്നത്‌ പോലീസ്‌ ഐ ജിയുടെ മകനും. ആ കുറ്റകൃത്യത്തിൽ നിന്ന് ഭാര്യയേയും മക്കളേയും രക്ഷപ്പെടുത്താൻ നാലാം ക്ലാസ്‌ വിദ്യാഭ്യാസം മാത്രമുള്ള ജോർജുകുട്ടി നടത്തുന്ന ബുദ്ധിപൂർവമായ നീക്കങ്ങളാണ് സിനിമ വിവരിക്കുന്നത്.

നീണ്ട നാളത്തെ ഇടവേളക്ക് ശേഷം ദൃശ്യം എന്ന വമ്പൻ ഹിറ്റായി എത്തിയ മോഹൻലാല്‍ മലയാളത്തിലെ ആദ്യത്തെ 75 കോടി കളക്ഷൻ എന്ന റെക്കോഡും സ്വന്തമാക്കിയിരുന്നു

ഇന്ത്യയിലെ ഒട്ടുമിക്ക് ഭാഷകളിലും ദൃശ്യം പിന്നീട് റിമേക്ക് ചെയ്തിരുന്നു. ‘ദൃശ്യ’ത്തിന്റെ ചൈനീസ് റീമേക്കും വൻ ഹിറ്റായിരുന്നു. ‘ഷീപ്പ് വിത്തൗട്ട് എ ഷെപ്പേർഡ്’എന്നായിരുന്നു ചൈനീസ് ഭാഷയിലെ സിനിമക്ക് പേരിട്ടത്.