പറയാൻ ലേശം വൈകി; ഗർഭിണിയാണെന്ന വിവരം ഒമ്പതാം മാസത്തിൽ പങ്കുവെച്ച് ബോളിവുഡ് നടി

ഗര്‍ഭകാലം ആരംഭിക്കുമ്പോൾ തന്നെ വിശേഷങ്ങളുമായി എത്തുന്നവരാണ് സിനിമ താരങ്ങൾ. പലരും ഗര്‍ഭവിശേഷങ്ങളും ഗര്‍ഭകാല ഫോട്ടോഷൂട്ട്, ഡയറ്റ് ടിപ്സ്, മറ്റ് വിശേഷങ്ങള്‍ തുടങ്ങി പതിവായി സമൂഹമാധ്യമങ്ങളിലൂടെ പങ്കുവച്ചിരുന്നു. എന്നാൽ ഇതിൽ നിന്നെല്ലാം വ്യത്യസ്തമാകുകയാണ് ബോളിവുഡ് നടി അമൃത റാവു.

താന്‍ ഗര്‍ഭിണിയാണെന്ന വിവരം തന്നെ ആദ്യമായി ആരാധകരുമായി പങ്കുവയ്ക്കുന്നത് ഒമ്പതാം മാസമായപ്പോഴാണ്. പ്രിയപ്പെട്ടവരോടെല്ലം ക്ഷമാപണം നടത്തിക്കൊണ്ടാണ് അമൃത ഇന്‍സ്റ്റഗ്രാമില്‍ ഭര്‍ത്താവ് ആര്‍ ജെ അന്‍മോള്‍ക്കൊപ്പമുള്ള ചിത്രം പങ്കുവച്ചിരിക്കുന്നത്.

'നിങ്ങള്‍ക്കിത് പത്താം മാസമായിരിക്കും, പക്ഷേ ഞങ്ങള്‍ക്കിത് ഒമ്പതാം മാസമാണ്. സര്‍പ്രൈസ്.. ഞാനും അന്‍മോളും ഞങ്ങളുടെ ഒമ്പതാം മാസം വരെയെത്തി നില്‍ക്കുകയാണ്. ഈ വാര്‍ത്ത നിങ്ങളുമായി പങ്കുവയ്ക്കുമ്പോള്‍ ഒരുപാട് സന്തോഷം തോന്നുന്നുണ്ട്. എന്റെ ആരാധകര്‍ സുഹൃത്തുക്കള്‍ എല്ലാവരും ക്ഷമിക്കണം, ഇത്രയും നാള്‍ ഈ രഹസ്യം എന്റെ ഉദരത്തിനകത്ത് തന്നെ സൂക്ഷിച്ചതിന്..'- അമൃത കുറിച്ചു.

2016ലാണ് അമൃത- അന്‍മോള്‍ വിവാഹം നടക്കുന്നത്. സോഷ്യല്‍ മീഡിയയില്‍ എപ്പോഴും സജീവമാണെങ്കിലും ഗര്‍ഭിണിയാണെന്ന വിവരം മാത്രം അമൃത ആരാധകരുമായി പങ്കുവച്ചില്ല.

2002ലാണ് അമൃതയുടെ ആദ്യ സിനിമ പുറത്തുവരുന്നത്. തുടര്‍ന്ന് ഇരുപത്തിയഞ്ചോളം ചിത്രങ്ങളില്‍ അഭിനയിച്ചു. 'ഇഷ്ഖ് വിഷ്‌ക്', 'മസ്തി', 'വിവാഹ്', 'മേം ഹൂം ന' തുടങ്ങിയ ചിത്രങ്ങളിലെ വേഷങ്ങളാണ് അമൃതയെ ബോളിവുഡില്‍ ശ്രദ്ധ നൽകിയത്.