ട്രാൻസിൽ എസ്തറിനെ തേടി വിജു എത്തുന്ന ചുവന്ന തെരുവ് ആംസ്റ്റർഡാമിലെയല്ല; സെറ്റിട്ടത് കേരളത്തിൽ

മതം കൊണ്ട് ജനത്തെ ഉന്മത്തരാക്കി അതിന്റെ പിന്നിൽ വൻ റാക്കറ്റ് തീർത്ത് സാമ്രാജ്യം കെട്ടിപ്പടുക്കുന്നവർക്കുള്ള നിശിത വിമർശനവുമായി തിയേറ്ററുകളിലെത്തിയ മലയാള ചിത്രമാണ് ഫഹദ് ഫാസിൽ നായകനായ ട്രാൻസ്. ചിത്രത്തിൽ വിജു പ്രസാദ് എന്ന കന്യാകുമാരിക്കാരൻ ലോകപ്രശസ്ത പാസ്റ്റർ ജോഷ്വാ കാൾട്ടണായി മാറുന്നതും അതിന്റെ പിന്നിലെ പ്രവർത്തനങ്ങളുമാണ് പ്രമേയമാക്കിയത്

ജോഷ്വാ കാൾട്ടൻ സാമ്രാജ്യത്തിന്റെ അധിപന്മാരുമായി തെറ്റുന്ന സാഹചര്യത്തിൽ അവർക്കധീനനായി അയാളെ ചലിപ്പിക്കാൻ ഒപ്പം നിർത്തുന്ന പെൺകുട്ടിയായാണ് നസ്രിയ അവതരിപ്പിച്ച എസ്തർ ലോപ്പസിന്റെ വരവ്. നൂതന കാലത്തെ എക്സിക്യൂട്ടീവ് ആയി വിജു പ്രസാദിന്റെ പേർസണൽ മാനേജറായി എസ്തർ ചുമതലയെടുക്കുന്നു

അങ്ങനെ ഒരു ഇടനിലക്കാരിയായി കുറച്ചു നാളുകൾക്ക് വേണ്ടി മാത്രം വരുന്ന എസ്തർ പക്ഷെ വിജുവിന്‌ അടുപ്പമുള്ളവളായി മാറുന്നു. ഒടുവിൽ മാനസിക രോഗാശുപത്രിയിൽ നിന്നും വിജു എസ്തറിനെ തേടി ആംസ്റ്റർഡാമിൽ ചുവന്ന തെരുവിൽ എത്തുന്ന ക്ലൈമാക്സ് രംഗം ഏറെ ശ്രദ്ധിക്കപ്പെട്ടിരുന്നു. ആ തെരുവ് വിദേശത്തല്ല എന്നുള്ള കാര്യമാണ് പ്രേക്ഷകർ അറിയേണ്ടത്

ഈ ചിത്രത്തിൽ കാണുന്ന സെറ്റിലാണ് കണ്ണാടിച്ചില്ലുകൾ ചവിട്ടിത്തെറിപ്പിച്ച് എസ്തർ വിജുവിന്റെ അടുത്തേക്ക് പാഞ്ഞെത്തുന്ന രംഗം ചിത്രീകരിച്ചത്

ഈ സ്ഥലം കാണാൻ മറ്റെവിടെയും പോകണ്ട, ഫോർട്ട് കൊച്ചിയിൽ ആണ് ഈ രംഗം സെറ്റു ചെയ്തത്. ആംസ്റ്റർഡാമിൽ നിയമതടസങ്ങൾ കൊണ്ട് ഷൂട്ട്‌ ചെയ്യാൻ കഴിയാതെ വന്നപ്പോൾ അമൽ നീരദ് ചിത്രത്തിലെ റെഡ് സ്ട്രീറ്റ് ഫോർട്ട് കൊച്ചിയിൽ ഉയരുകയായിരുന്നു. പിന്നിൽ ഇവരാണ്:

കലാസംവിധായകൻ അജയൻ ചാലിശ്ശേരിയും സംഘവുമാണ് ഈ സെറ്റ് ഒരുക്കിയത്. ക്ളൈമാക്സിൽ കണ്ട രംഗത്തിനായി പ്രത്യേകം പ്രകാശ വിന്യാസം ചെയ്തിരുന്നു