സെക്കന്റ് ഷോ മുതൽ കുറുപ്പ് വരെ ഒമ്പത് വർഷം; കുറുപ്പിന്റെ പോസ്റ്റർ പങ്കുവെച്ച് ദുൽഖർ സൽമാൻ

ദുൽഖർ സൽമാന‍്റെ സിനിമാ യാത്ര ആരംഭിച്ച് ഇന്ന് ഒമ്പത് വർഷങ്ങൾ പൂർത്തിയാകുകയാണ്. സിനിമാ ലോകത്ത് ഒമ്പത് എന്ന ചുരുങ്ങിയ കാലത്തിനുള്ളിൽ മലയാളത്തിൽ നിന്നും തമിഴും ബോളിവുഡിലും വരെ ആരാധകരുടെ പ്രിയപ്പെട്ട DQ സാന്നിധ്യമറിയിച്ചു കഴിഞ്ഞു.

ഒമ്പത് വർഷങ്ങൾ പൂർത്തിയാക്കുന്ന സ്പെഷ്യൽദിനത്തിൽ പുതിയ ചിത്രം പ്രഖ്യാപിച്ചാണ് ദുൽഖർ ആഘോഷിച്ചത്. റോഷൻ ആൻഡ്രൂസ് സംവിധാനം ചെയ്യുന്ന പുതിയ ചിത്രത്തിന്റെ പൂജയും സ്വിച്ച് ഓൺ കർമ്മവും നടന്നു. ദുൽഖറും റോഷൻ ആൻഡ്രൂസും ആദ്യമായി ഒരുമിക്കുന്ന ചിത്രമാണിത്.

ഇപ്പോഴിതാ ആരാധകർക്ക് ഇരട്ടി മധുരമായി ഏറെ പ്രതീക്ഷയോടെ കാത്തിരിക്കുന്ന കുറുപ്പിന്റെ പുതിയ പോസ്റ്ററും ദുൽഖർ പുറത്തുവിട്ടിരിക്കുകയാണ്. ദുൽഖറിന്റെ ആദ്യ ചിത്രമായ സെക്കന്റ് ഷോ ഒരുക്കിയ ശ്രീനാഥ് രാജേന്ദ്രൻ തന്നെയാണ് ഒമ്പതാം വർഷത്തിൽ ദുൽഖറിനെ കുറുപ്പായി അവതരിപ്പിക്കുന്നത്.

സെക്കന്റ് ഷോ മുതൽ കുറുപ്പ് വരെയുള്ള കാലത്തെ കുറിച്ചുള്ള മനോഹരമായ കുറിപ്പും ദുൽഖർ പങ്കുവെച്ചിട്ടുണ്ട്. ദുൽഖറിനൊപ്പം ഒരു കൂട്ടം പുതുമുഖങ്ങളാണ് സെക്കന്റ്ഷോയിലൂടെ മലയാള സിനിമയിലേക്ക് കടന്നുവന്നത്. ഇതേ ടീം തന്നെ വീണ്ടും എത്തുന്നു എന്നതാണ് പുതിയ ചിത്രത്തിന്റെ പ്രത്യേകത.

"ഒമ്പത് വർഷങ്ങൾക്ക് മുമ്പ് ഈ ദിവസം ഞങ്ങളുടെ സെക്കന്റ്ഷോ സിനിമ തിയേറ്ററുകളിൽ റിലീസ് ചെയ്തു. ഞാനുൾപ്പെടെ നിരവധി പുതുമുഖങ്ങളുടെ അരങ്ങേറ്റ ചിത്രമായിരുന്നു സെക്കന്റ് ഷോ.

ഇന്ന് ഞാൻ പുതിയ സിനിമ ആരംഭിച്ചിരിക്കുയാണ്. പരിഭ്രമവും പേടിയും ഇപ്പോഴും ഉണ്ടെങ്കിലും അതിനെ ക്രിയാത്മകമായി മാറ്റേണ്ടതെങ്ങനെയെന്ന് കാലം പഠിപ്പിച്ചു. എവിടെ നിന്നാണ് താൻ തുടങ്ങിയതെന്നും എങ്ങു നിന്നാണ് വരുന്നതെന്നും മനസ്സിലാക്കുന്നു.

ഈ കാലളവിൽ നിങ്ങൾ എനിക്ക് തന്നു കൊണ്ടിരുന്ന സ്നേഹത്തിനും പിന്തുണയ്ക്കും ഹൃദയം കൊണ്ട് ഞാൻ നന്ദി പറയുന്നു. വിവിധ ഭാഷകളിലായി തന്റെ സഹപ്രവർത്തകർക്കൊപ്പം ജോലി ചെയ്യാൻ കഴിഞ്ഞത് അംഗീകാരമാണ്.

ഈ വർഷം മികച്ച കുറേ സിനിമകളും എല്ലാവർക്കും ആരോഗ്യവും സന്തോഷവും ഉണ്ടാകട്ടേയെന്ന് പ്രാർത്ഥിക്കുന്നു. നന്ദി പ്രകടിപ്പിക്കാൻ ഇവിടെ കുറുപ്പിന്റെ ചിത്രം സമർപ്പിക്കുന്നുവെന്നും ദുൽഖർ കുറിച്ചു.

സെക്കന്റ്ഷോയിലെ തങ്ങളുടെ മികച്ച ടീം ഒമ്പത് വർഷത്തിന് ശേഷം പൂർണ സർക്കിളിൽ എത്തിയെന്നും ദുൽഖർ പറയുന്നു. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിലാണ് കുറുപ്പ് പ്രേക്ഷകരിലേക്കെത്തുക.

ദുൽഖറിന്റെ കരിയറിലെ തന്നെ ഏറ്റവും വലിയ ബഡ്ജറ്റിൽ ഒരുങ്ങുന്ന ചിത്രത്തിന്റെ മുടക്കുമുതൽ 35 കോടിയാണ്. ദുൽഖർ സൽമാന്റെ ഉടമസ്ഥതയിലുള്ള വേഫറെർ ഫിലിംസും എം സ്റ്റാർ എന്റർടൈൻമെൻറ്സും ചേർന്നാണ്.

മൂത്തോൻ' എന്ന ചിത്രത്തിലൂടെ മലയാളത്തിലേക്ക് അരങ്ങേറ്റം കുറിച്ച ശോഭിത ധുലിപാലയാണ് ചിത്രത്തിലെ നായിക. ഇവരെ കൂടാതെ ഇന്ദ്രജിത് സുകുമാരൻ, സണ്ണി വെയ്ൻ, ഷൈൻ ടോം ചാക്കോ, വിജയരാഘവൻ, പി ബാലചന്ദ്രൻ, സുരഭി ലക്ഷ്മി, ശിവജിത് പദ്മനാഭൻ തുടങ്ങിയവരും ചിത്രത്തിൽ അഭിനയിക്കുന്നുണ്ട്.