കോവിഡ് പ്രതിസന്ധി | താരങ്ങൾ പ്രതിഫലം വെട്ടിക്കുറയ്ക്കണമെന്ന് പ്രമുഖ സംവിധായകൻ

കോവിഡ് കാലത്തെ സാമ്പത്തിക പ്രതിന്ധി സിനിമാമേഖലയെയും ബാധിച്ചു. ഇനി വരുന്ന കാലത്ത് താരങ്ങൾ പ്രതിഫലം വെട്ടിക്കുറയ്ക്കണമെന്ന് സംവിധായകൻ മണിരത്നം ആവശ്യപ്പെട്ടു. റിലയൻസ് എന്റർടയിൻമെന്റ്സിന്റെ സി ഇ ഒ ശിബലാശിഷുമായി ഒരു വെബിനാറിൽ സംസാരിക്കവെയാണ് മണിരത്നം ഇക്കാര്യം ഉന്നയിച്ചത്.

സിനിമാവ്യവസായം പഴയ സ്ഥിതിയിലേക്ക് എത്തുന്നതു വരെ സാങ്കേതികപ്രവർത്തകരും താരങ്ങളുമെല്ലാം പ്രതിഫലം കുറയ്ക്കണം. അല്ലാത്തപക്ഷം ഈ സാഹചര്യത്തിൽ നിർമാതാക്കൾ മുന്നോട്ടുവരില്ല. ബിഗ് ബജറ്റ് സിനിമകൾക്ക് മുതൽമുടക്ക് തിരിച്ചു പിടിക്കണമെങ്കിൽ തിയറ്ററിൽ ആളുകൾ വരണം. തിയറ്റർ തുറന്നാലും ആളുകൾ തിയറ്ററിലേക്ക് എത്താൻ സമയമെടുക്കുമെന്നും മണിരത്നം പറഞ്ഞു.

ചെറിയ സിനിമകൾക്ക് ഒടിടി പ്ലാറ്റ്ഫോമുകൾ അനുഗ്രഹമാണെങ്കിലും തിയറ്റർ അനുഭവം അവിടെ ലഭിക്കില്ലെന്നും മണിരത്നം പറഞ്ഞു. നിലവിൽ മണിരത്നത്തിന്റെ പുതിയ ചിത്രം പൊന്നിയിൻ സെൽവന്റെ ചിത്രീകരണം പാതിവഴിയിലാണ്.

കോവിഡ് പശ്ചാത്തലത്തിൽ സിനിമാസെറ്റുകളിൽ വലിയ മുൻകരുതലുകൾ വേണമെന്നും എന്തുതന്നെ സംഭവിച്ചാലും പൊന്നിയിൻ സെൽവന്റെ ചിത്രീകരണം പൂർത്തിയാക്കുമെന്നും അദ്ദേഹം പറഞ്ഞു.