Pushpa 2| പുഷ്പയിൽ 2 ൽ നായികയായി സായ് പല്ലവിയുമുണ്ടോ? മറുപടി നൽകി നിർമാതാവ്

അല്ലു അർജുൻ-രശ്മിക മന്ദാന (llu Arjun and Rashmika Mandanna)താര ജോഡികളുടെ ബ്ലോക്ക്ബസ്റ്റർ ചിത്രം പുഷ്പയുടെ രണ്ടാം ഭാഗത്തിനായുള്ള (Pushpa 2) കാത്തിരിപ്പിലാണ് ആരാധകർ. രണ്ടാം ഭാഗം ചിത്രീകരണം ഉട‌ൻ ആരംഭിക്കും എന്ന വാർത്തകൾക്കിടയിലാണ് മറ്റൊരു വാർത്തയും പ്രചരിച്ചു തുടങ്ങിയത്.

രണ്ടാം ഭാഗത്തിൽ സായ് പല്ലവിയും പ്രധാന വേഷത്തിൽ എത്തുന്നുവെന്നായിരുന്നു വാർത്തകൾ. വാർത്ത സായ് പല്ലവിയുടേയും അല്ലു അർജുന്റേയും ആരാധകർ ആവേശത്തോടെയാണ് സ്വീകരിച്ചത്.

എന്നാൽ വാർത്തയോട് സിനിമയുടെ അണിയറ പ്രവർത്തകരോ സായ് പല്ലവിയോ ഔദ്യോഗികമായി പ്രതികരിച്ചിരുന്നില്ല. രണ്ടാം ഭാഗത്തിൽ ഗോത്ര വിഭാഗത്തിലെ പെൺകുട്ടിയായി സായ് പല്ലവി എത്തും എന്നായിരുന്നു വാർത്ത.

ഇപ്പോൾ വാർത്തയുടെ സത്യാവസ്ഥ പുറത്തു വന്നിരിക്കുകയാണ്. ചിത്രത്തിന്റെ നിർമാതാവ് രവി ശങ്കർ തന്നെയാണ് വാർത്തകളോട് പ്രതികരിച്ചിരിക്കുന്നത്.

സെപ്റ്റംബർ മൂന്നാമത്തെ ആഴ്ച്ച സിനിമയുടെ ചിത്രീകരണം ആരംഭിക്കുമെന്നും നിർമാതാക്കളിൽ ഒരാളായ രവി ശങ്കർ പറഞ്ഞു. സായ് പല്ലവി സിനിമയുടെ ഭാഗമാകുമോ എന്ന ചോദ്യത്തിന് ഇല്ല എന്നായിരുന്നു നിർമാതാവിന്റെ മറുപടി.

‌നേരത്തേ രണ്ടാം ഭാഗത്തിൽ രശ്മിക അവതരിപ്പിച്ച നായികാ കഥാപാത്രം കൊല്ലപ്പെടുമെന്നും വാർത്തകൾ പ്രചരിച്ചിരുന്നു. ഈ വാർത്തയും വ്യാജമാണെന്ന് പിന്നീട് നിർമാതാവ് തന്നെ വ്യക്തമാക്കി.

ഏകദേശം 350 കോടി മുതൽ മുടക്കിലാണ് പുഷ്പ 2 ചിത്രീകരിക്കുന്നത് എന്ന് നേരത്തേ റിപ്പോർട്ട് ചെയ്യപ്പെട്ടിരുന്നു. ഫഹദ് ഫാസിലിന്റെ വില്ലൻ കഥാപാത്രത്തിനൊപ്പം പുഷ്പയ്ക്ക് വെല്ലുവിളി ഉയർത്താൻ വിജയ് സേതുപതിയും എത്തുന്നുവെന്നും വാർത്തകൾ പുറത്തുവന്നിരുന്നു.