നയൻതാരയുടെ 'കോലമാവ് കോകില' ബോളിവുഡിലേക്ക്; കേന്ദ്രകഥാപാത്രമായി ജാൻവി കപൂർ

തമിഴിലെ ഹിറ്റ് ചിത്രം 'കോലമാവ് കോകില'ബോളിവുഡിലേക്ക് റീമേക്ക് ചെയ്യുന്നു. നയൻതാര കേന്ദ്രകഥാപാത്രമായ ചിത്രം ഹിന്ദിയിലെത്തുമ്പോൾ നായികയായെത്തുന്നത് ജാൻവി കപൂറാണ്.

എല്ലാത്തരം ആളുകൾക്കും ആസ്വാദകരമാകുന്ന രീതിയിൽ ഉത്തരേന്ത്യൻ പശ്ചാത്തലത്തിൽ ആകും ചിത്രം ഒരുങ്ങുക എന്നാണ് അണിയറ പ്രവർത്തകരെ ഉദ്ധരിച്ചുള്ള റിപ്പോർട്ട്.

'മിഡ് ഡേ'റിപ്പോർട്ട് അനുസരിച്ച് ആദ്യ ഷെഡ്യൂൾ പഞ്ചാബിലാകും ചിത്രീകരിക്കുക. 45 ദിവസത്തോളം ഇവിടെ ഷൂട്ടിംഗ് ഉണ്ടാകും. ഇതിനു ശേഷം വിവിധയിടങ്ങളിലായി ചിത്രീകരണം പൂർത്തിയാക്കാനാണ് നീക്കം.

എല്ലാത്തരം ആളുകൾക്കും ആസ്വാദകരമാകുന്ന രീതിയിൽ ഉത്തരേന്ത്യൻ പശ്ചാത്തലത്തിൽ ആകും ചിത്രം ഒരുങ്ങുക എന്നാണ് അണിയറ പ്രവർത്തകരെ ഉദ്ധരിച്ചുള്ള റിപ്പോർട്ട്. കോവിഡ് പശ്ചാത്തലത്തിൽ സെറ്റുകളിൽ സുരക്ഷാ-പ്രതിരോധ നിയന്ത്രണങ്ങൾ കർശനമായി തന്നെ പാലിക്കുമെന്നും അണിയറ പ്രവർത്തകർ അറിയിച്ചിട്ടുണ്ട്.

തീർത്തും നോൺ ഗ്ലാമറസ് ലുക്കിലാകും ജാൻവി ചിത്രത്തിൽ പ്രത്യക്ഷപ്പെടുക. ചിത്രത്തിലെ ചില ആക്ഷൻ രംഗങ്ങൾക്കു വേണ്ടിയുള്ള തയ്യാറെടുപ്പുകളും താരം നടത്തി വരുന്നുണ്ട്.

മിഡിൽ-ക്ലാസ് കുടുംബത്തിൽ നിന്നും വരുന്ന ഒരു പെൺകുട്ടിക്ക് അസാധാരണമായ ചില സാഹചര്യങ്ങൾ നേരിടേണ്ടി വരുന്നു. അതിനെ അവൾ എങ്ങനെ അതിജീവിക്കുന്നു എന്നതാണ് ചിത്രത്തിന്‍റെ പ്രമേയം. സിദ്ധാർത്ഥ സെൻ ഗുപ്തയാണ് ചിത്രം ബോളിവുഡിൽ ഒരുക്കുന്നത്.

2018ലാണ് കോലമാവ് കോകില റിലീസാകുന്നത്. പെട്ടെന്ന് പണം സമ്പാദിക്കുന്നതിനായ ഡ്രഗ് റാക്കറ്റിന്‍റെ കണ്ണിയാകേണ്ടി വരുന്ന പെൺകുട്ടിയുടെ കഥ സംവിധാനം ചെയ്തത് നെൽസൺ ദിലീപ് കുമാർ ആയിരുന്നു.

നയൻതാര ടൈറ്റില്‍ കഥാപാത്രത്തിലെത്തിയ ചിത്രം പ്രേക്ഷകരുടെയും നിരൂപകരുടെയും പ്രശംസ പിടിച്ചു പറ്റിയിരുന്നു.