അയോധ്യ വിധി: സിനിമയാക്കാൻ കങ്കണ; തിരക്കഥ ബാഹുബലിയുടെ എഴുത്തുകാരന്‍

അയോധ്യ വിഷയത്തിൽ സുപ്രീംകോടതി വിധി വന്നിരിക്കുകയാണ്. വിധിക്കു പിന്നാലെ വിഷയം സിനിമയുമാകുന്നു. അയോധ്യയെ കുറിച്ച് സിനിമ നിർമ്മിക്കുന്നത് മറ്റാരുമല്ല, ബോളിവുഡ് താരം കങ്കണ റാണൗട്ട്.

ബാഹുബലി സീരീസിന്റെ തിരക്കഥാകൃത്തും രാജമൗലിയുടെ പിതാവുമായ വിജയേന്ദ്രപ്രസാദാണ് ചിത്രത്തിന് തിരക്കഥയൊരുക്കുന്നത്. അപരാജിത അയോധ്യ എന്നാണ് ചിത്രത്തിന് പേര് നൽകിയിരിക്കുന്നത്. അടുത്ത വർഷം ചിത്രത്തിന്റെ ഷൂട്ടിംഗ് ആരംഭിക്കും. മണികർണിക, തലൈവി എന്നീ ചിത്രങ്ങൾക്കു ശേഷം മൂന്നാം തവണയാണ് വിജയേന്ദ്രപ്രസാദ് കങ്കണയ്ക്കായി തിരക്കഥ എഴുതുന്നത്.

നൂറ് കണക്കിന് വർഷങ്ങളായി കത്തുന്ന വിഷയമാണ് രാമക്ഷേത്രം. 80കളിൽ ജനിച്ച ഒരു വ്യക്തി എന്ന നിലയിൽ നെഗറ്റീവ് വെളിച്ചത്തിലാണ് അയോധ്യയുടെ പേര് കേട്ടിരുന്നതെന്ന് കങ്കണ പറയുന്നു.

ത്യാഗത്തിന്റെ ആള്‍രൂപമായ ഒരു രാജാവ് ജനിച്ച ഭൂമിയാണ് ഒരു സ്വത്ത് തര്‍ക്കത്തിന് വിഷയമായത്. ഈ കേസ് ഇന്ത്യന്‍ രാഷ്ട്രീയത്തിന്റെ മുഖച്ഛായ തന്നെ മാറ്റി. ഇന്ത്യയുടെ മതേതര മനോഭാവം ഉൾക്കൊണ്ടാണ് കേസിൽ വിധി വന്നത്- കങ്കണ പറയുന്നു.

അയോധ്യ -ബാബറി മസ്ജിദ് വിഷയത്തിൽ നിരവധി ഡോക്യുമെന്ററികൾ നിർമ്മിക്കപ്പെട്ടിട്ടുണ്ടെന്നും എന്നാൽ ഇതാദ്യമായിട്ടാണ് സിനിമ നിർമ്മിക്കുന്നതെന്നും കങ്കണ പറയുന്നു.

വിശ്വാസിയല്ലാത്ത നായക കഥാപാത്രം വിശ്വാസിയായി മാറുന്നതിലേക്കുള്ള യാത്രയാണ് ഈ ചിത്രത്തിൻറെ പ്രത്യേകതയെന്നും കങ്കണ. ഒരു തരത്തില്‍, ഇത് എന്റെ വ്യക്തിപരമായ യാത്രയെ തന്നെ പ്രതിഫലിപ്പിക്കുന്നതിനാല്‍, എന്റെ ആദ്യത്തെ നിര്‍മ്മാണത്തിന് ഇത് തന്നെയാകും ഉചിതമായ വിഷയമെന്ന് ഞാന്‍ തീരുമാനിച്ചു- കങ്കണ വ്യക്തമാക്കുന്നു.