കത്രീന കൈഫ്-വിജയ് സേതുപതി ചിത്രത്തിന് പേരിട്ടു; ഏപ്രിലിൽ ചിത്രീകരണം ആരംഭിക്കും

വിജയ് സേതുപതിയുടെ നായികയായി കത്രീന കൈഫ് പുതിയ ചിത്രത്തിൽ എത്തുന്നു എന്ന വാർത്തകൾ ആരാധകർ കേട്ടുതുടങ്ങിയിട്ട് നാളുകളായി. ഇപ്പോഴിതാ ചിത്രത്തിന്റെ പേര് പ്രഖ്യാപിച്ചിരിക്കുകയാണ് അണിയറ പ്രവർത്തകർ. അന്ധാദുൻ സംവിധായകനായ ശ്രീറാം രാഘവനാണ് ചിത്രം സംവിധാനം ചെയ്യുന്നത്.

വിജയ് സേതുപതി നായകനാകുന്ന ആദ്യ ഹിന്ദി ചിത്രമായിരിക്കും ഇത്. നേരത്തേ ആമിർ ഖാന്റെ പുതിയ ചിത്രത്തിൽ വിജയ് സേതുപതി സുപ്രധാന വേഷത്തിൽ എത്തുമെന്ന് വാർത്തകളുണ്ടായിരുന്നു. എന്നാൽ അവസാന നിമിഷം ചിത്രത്തിൽ നിന്നും വിജയ് പിൻമാറുകയായിരുന്നു.

കത്രീന കൈഫും വിജയ് സേതുപതിയും ഒന്നിക്കുന്ന ആദ്യ ചിത്രമെന്ന സവിശേഷതയും ഈ ചിത്രത്തിനുണ്ട്. മെറി ക്രിസ്മസ് എന്ന് പേരിട്ടിരിക്കുന്ന ചിത്രം ത്രില്ലർ സ്വഭാവത്തിലുള്ളതായിരിക്കുമെന്നാണ് സൂചന. ഏപ്രിൽ മാസത്തിൽ സിനിമയുടെ ചിത്രീകരണം ആരംഭിക്കും.

പൂനെയിൽ വെച്ചായിരിക്കും ചിത്രീകരണം നടക്കുക. അടുത്തിടെ ശ്രദ്ധേയമായ വേഷങ്ങൾ ചെയ്ത് തെന്നിന്ത്യൻ പ്രേക്ഷകരുടെ പ്രിയതാരമായി മാറിയ നടനാണ് മക്കൾ സെൽവൻ വിജയ് സേതുപതി. ഇളയ ദളപതി വിജയ് നായകനായ മാസ്റ്ററിലെ വിജയിയുടെ വില്ലൻ വേഷവും ഏറെ ശ്രദ്ധിക്കപ്പെട്ടിരുന്നു.

വരുൺ ധവാനെ നായകനാക്കി ശ്രീറാം പ്രഖ്യാപിച്ച ബിഗ് ബജറ്റ് ചിത്രം ഇക്കീസ് കോവിഡിനെ തുടർന്ന് മുടങ്ങിയിരുന്നു. ഈ ചിത്രത്തിന് മുമ്പ് വിജയ് സേതുപതി-കത്രീന കൈഫ് പ്രധാന വേഷത്തിലെത്തുന്ന ചിത്രം പുറത്തിറങ്ങുമെന്നാണ് റിപ്പോർട്ടുകൾ.

വിജയ്-കത്രീന-ശ്രീറാം ചിത്രം ബോളിവുഡിൽ മാത്രമായിരിക്കുമോ അതോ ബഹുഭാഷാ ചിത്രമാകുമോ എന്നതിൽ വ്യക്തതയില്ല. സൂപ്പർ ഹിറ്റ് തമിഴ് ചിത്രമായ 'മനഗരംത്തിന്റെ ഹിന്ദി റീമേക്കിലും വിജയ് സേതുപതിയാണ് പ്രധാന വേഷത്തിലെത്തുന്നത്. സന്തോഷ് ശിവൻ സംവിധാനം ചെയ്യുന്ന ചിത്രത്തിൽ റീമേക്കിൽ മുനിഷ്കാന്ത് എന്ന കഥാപാത്രത്തെയാണ് വിജയ് അവതരിപ്പിക്കുന്നത്.

അലി അബ്ബാസ് സഫർ സംവിധാനം ചെയ്യുന്ന സൂപ്പർഹീറോ ചിത്രത്തിൽ അഭിനയിച്ചുകൊണ്ടിരിക്കുകയാണ് കത്രീന കൈഫ് ഇപ്പോൾ. നേരത്തേ, കത്രീനയെ നായികയാക്കി മേരി ബ്രദർ കി ദുൽഹൻ, ടൈഗർ സിന്ദാഹേ എന്നീ ചിത്രങ്ങൾ അലി അബ്ബാസ് സംവിധാനം ചെയ്തിട്ടുണ്ട്.

അക്ഷയ് കുമാർ നായകനായ സൂര്യവംശിയാണ് കത്രീനയുടെ ഇനി പുറത്തിറങ്ങാനുള്ള ചിത്രം.ഈ വർഷം പുറത്തിറങ്ങേണ്ട ചിത്രം കോവിഡ് കാരണം റിലീസ് മാറ്റിവെച്ചിരിക്കുകയാണ്. ഗള്ളി ബോയ് ഫെയിം സിദ്ധാന്ത് ചതുർവേദി, ഇഷാൻ ഖട്ടർ എന്നിവർക്കൊപ്പം ഫോൺ ബൂത്ത് എന്ന ഹോറർ കോമഡി ചിത്രവും അണിയറയിൽ ഒരുങ്ങുന്നുണ്ട്.