28 ദിവസം ആശുപത്രി വാസം; എന്തായിരുന്നു ലത മങ്കേഷ്കറിന്റെ ഭീതി പടർത്തിയ ആരോഗ്യ പ്രശ്നം?

ഒരു മാസത്തോളമായി മുംബൈയിലെ ബ്രീച്ച് കാൻഡി ആശുപത്രിയിൽ ചികിത്സയിലായിരുന്നു ഇന്ത്യൻ പിന്നണി ഗാനരംഗത്തെ പകരം വയ്ക്കാനില്ലാത്ത ഗായിക ലതാ മങ്കേഷ്കർ. ഇക്കഴിഞ്ഞ ദിവസം, വളരെക്കാലത്തിന് ശേഷം അവർ ട്വീറ്റ് ചെയ്തു, ഇപ്പോൾ തനിക്ക് സുഖമാണെന്ന് സൂചിപ്പിക്കാനായിരുന്നു അത്

ആരാധകരുടെ ആശംസകൾക്കും പിന്തുണയ്ക്കും നന്ദി അറിയിക്കുന്നതിനായി കൂടിയായിരുന്നു അവർ സോഷ്യൽ മീഡിയയിൽ എത്തിയത്. ചികിത്സയ്ക്കായി സഹകരിച്ച ഡോക്ടർമാരോട് നന്ദി അറിയിച്ചു. ഇപ്പോൾ വീട്ടിൽ തിരിച്ചെത്തിയെന്നും കുറിച്ചു

നവംബർ 11 ന് ശ്വാസതടസത്തെ തുടർന്ന് 90 കാരിയായ മങ്കേഷ്ക്കറിനെ ബ്രീച്ച് കാൻഡി ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിക്കുകയായിരുന്നു. പിന്നീട് വെന്റിലേറ്ററിൽ പ്രവേശിപ്പിച്ചു. തനിക്ക് ന്യുമോണിയ ബാധിച്ചതായിരുന്നു പ്രശ്നം എന്ന് ലത മങ്കേഷ്‌കർ പറഞ്ഞു

ഇതിനിടയിൽ ലതയുടെ ജീവൻ അപകടത്തിലെന്ന് വരെ പ്രചാരണം നടന്നു. പക്ഷെ സിനിമ വൃത്തങ്ങൾ ഇത് നിഷേധിച്ചു കൊണ്ടേയിരുന്നു

ഹിന്ദിയിൽ മാത്രം ആയിരത്തിലധികം ഗാനങ്ങൾക്ക് ശബ്ദം നൽകിയ മങ്കേഷ്കറിന് 2001ൽ രാജ്യത്തെ പരമോന്നത സിവിലിയൻ ബഹുമതിയായ ഭാരത് രത്‌ന അവാർഡ് ലഭിച്ചിരുന്നു