ഇതിലും വലിയ കോടികൾ മലയാള സിനിമയിൽ വേറെയില്ല; 200 കോടി കടന്ന് ലൂസിഫർ -- മോഹൻലാൽ ഹിറ്റ് ചിത്രങ്ങളുടെ നാൾവഴി

കേവലം 44 ലക്ഷത്തിൽ നിർമ്മിച്ച, പ്രിയദർശൻ സംവിധാനം ചെയ്ത 'ചിത്രം' മലയാള സിനിമയിൽ അക്കാലത്തെ മികച്ച റെക്കോർഡാണ് കുറിച്ചത്. 1988ലെ ക്രിസ്മസ് ചിത്രം ബോക്സ് ഓഫീസിൽ മൂന്നര കോടി സ്വന്തമാക്കി. മൈ ഡിയർ കുട്ടിച്ചാത്തന്റെ റെക്കോർഡാണ് 'ചിത്രം' മറികടന്നത്. നായകൻ മോഹൻലാൽ. 365 ദിവസത്തിന് മേൽ തിയേറ്ററിൽ പ്രദർശിപ്പിച്ച സിനിമയായിരുന്നു

1991ൽ റിലീസ് ആയ മോഹൻലാൽ നായകനായ കിലുക്കം മലയാളത്തിലെ ആദ്യ അഞ്ചു കോടി ചിത്രമായിരുന്നു. സംവിധാനം പ്രിയദർശൻ

1990കളിൽ ഏറ്റവും കൂടുതൽ കളക്ഷൻ നേടിയ ഹിറ്റ് ചിത്രങ്ങളുടെ പട്ടികയിൽ 1993ൽ പുറത്തുവന്ന ഐ.വി.ശശി ചിത്രം ദേവാസുരത്തിന് ഒരു വലിയ ഇടം തന്നെ ഉണ്ടായിരുന്നു. ചിത്രത്തിന്റെ രണ്ടാം ഭാഗം 2001ൽ രാവണപ്രഭു എന്ന പേരിൽ രഞ്ജിത് പുറത്തിറക്കി

1993 ൽ പുറത്തു വന്ന മണിച്ചിത്രത്താഴ് മോഹൻലാൽ-ഫാസിൽ കൂട്ടുകെട്ടിലെ റെക്കോർഡ് ചിത്രമായി മാറി. സൈക്കളോജിക്കൽ ത്രില്ലർ ആയ ചിത്രം ബോക്സ് ഓഫീസിൽ വാരിക്കൂട്ടിയത് ഏഴു കോടിക്ക് മേൽ കളക്ഷനായിരുന്നു. സുരേഷ് ഗോപി, ശോഭന തുടങ്ങിയവർ മറ്റു പ്രധാന കഥാപാത്രങ്ങളെ അവതരിപ്പിച്ചു

1995ൽ പുറത്തു വന്ന ഭദ്രൻ ചിത്രം സ്ഫടികത്തിൽ ആട് തോമ എന്ന നായക കഥാപാത്രത്തെ മോഹൻലാൽ അവതരിപ്പിച്ചു. അഞ്ചു കോടിക്കു മേൽ നേടി ബോക്സ് ഓഫീസ് ഹിറ്റായ സ്ഫടികം ആ വർഷത്തെ ഏറ്റവും കൂടുതൽ കളക്ഷൻ നേടിയ ചിത്രമായി മാറി.

അതുവരെയുള്ള റെക്കോർഡുകൾ ഭേദിച്ചായിരുന്നു 1997ലെ മോഹൻലാൽ ചിത്രം ആറാംതമ്പുരാന്റെ വരവ്. മൊത്തം നേട്ടം 12 കോടി. സംവിധാനം ഷാജി കൈലാസ്

ആദ്യമായി മലയാളത്തിൽ 20 കോടി കടന്ന ചിത്രമായിരുന്നു നരസിംഹം. 2000ത്തിൽ റിലീസ് ആയ ചിത്രം സംവിധാനം ചെയ്തത് ഷാജി കൈലാസ്. രണ്ട് കോടി മുതൽമുടക്കിൽ ആയിരുന്നു നിർമ്മാണം

മലയാളത്തിലെ ആദ്യ 50 കോടി ചിത്രവും മോഹൻലാലിന് സ്വന്തം. ബോക്സ് ഓഫീസ് കളക്ഷൻ, റീമേക്ക് അവകാശം, സാറ്റലൈറ്, ടെലിവിഷൻ റൈറ്റുകളാണ് ദൃശ്യത്തിന് ഈ നേട്ടം കരസ്ഥമാക്കാൻ സഹായിച്ചത്. 2014ൽ പുറത്തു വന്ന ചിത്രം സംവിധാനം ചെയ്തത് ജീത്തു ജോസഫ്

25 കോടി മുതൽമുടക്കിൽ നിർമ്മിച്ച വൈശാഖ് ചിത്രം പുലിമുരുകനിലെ നായകൻ മോഹൻലാൽ ആണ്. 2016ൽ പുറത്തു വന്ന ചിത്രം മലയാളത്തിലെ ആദ്യ 150 കോടി സിനിമ എന്ന ഖ്യാതി നേടി. മൊത്തം ബോക്സ് ഓഫീസ് കളക്ഷൻ 152 കോടി

പൃഥ്വിരാജ് സുകുമാരന്റെ ആദ്യ സംവിധാന സംരംഭം, ലൂസിഫർ, മലയാളത്തിലെ ആദ്യ 200 കോടി ക്ളബ് ചിത്രം എന്ന ഖ്യാതിയാണ് റിലീസിന്റെ 50-ാം ദിവസം നേടിയെടുത്തത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച മോഹൻലാൽ ചിത്രം 200 കോടിയും കടന്നിരിക്കുന്നു. ഇതിൽ 13 കോടിക്ക് മേൽ ലഭിച്ചത് ആമസോൺ പ്രൈം വീഡിയോ വഴിയുള്ള പ്രദർശനാനുമതിയിൽ നിന്നും എന്നാണ് കണക്കുകൾ സൂചിപ്പിക്കുന്നത്