താലിമാല പൊട്ടിച്ചോടിയ കള്ളന് നേരെ 'തീ'യായി ഉയർന്ന് നവ്യ; ഇനി അതിഗംഭീര മടങ്ങി വരവ്

ആരാധകർ കേൾക്കാൻ കൊതിച്ച വാർത്തയുമായാണ് പുതുവർഷത്തിൽ നടിയും നർത്തകിയും എഴുത്തുകാരിയുമായ നവ്യ നായരുടെ വരവ്

എട്ട് വർഷങ്ങൾക്ക് ശേഷം നവ്യ വെള്ളിത്തിരയിലേക്ക് മടങ്ങി വരികയാണ്

വെറും വരവല്ല. തീ പോലെ ഉയർന്ന് പൊങ്ങുന്ന കഥയുമായാണ് നവ്യയുടെ മടങ്ങി വരവ്. ജീവിതത്തിലെ ഏക സമ്പാദ്യമായ താലിമാല പൊട്ടിച്ചോടുന്ന കള്ളന് പിന്നാലെയുള്ള നിരാലംബയായ സ്ത്രീയുടെ ഓട്ടപാച്ചിലുമായാണ് 'തീ' എന്ന് പേരുള്ള ചിത്രത്തിൽ നവ്യ മടങ്ങിയെത്തുന്നത്. ഒരു മാസികയ്ക്കു നൽകിയ അഭിമുഖത്തിലാണ് നവ്യ ഇക്കാര്യം വെളിപ്പെടുത്തിയത്

'സീൻ ഒന്ന് നമ്മുടെ വീടാണ്' നവ്യ ഏറ്റവും ഒടുവിലായി വേഷമിട്ട ചിത്രം. വിവാഹ ശേഷം അഭിനയത്തിൽ നിന്നും വിട്ടു നിന്ന നവ്യ ഈ ചിത്രത്തിൽ മുഖം കാണിച്ചെങ്കിലും തുടർന്നഭിനയിച്ചില്ല

മഞ്ജു വാര്യർ നടത്തിയ തിരിച്ചു വരവാണ് തന്റെ ആത്മവിശ്വാസം കൂട്ടിയതെന്ന്‌ നവ്യ വിശ്വസിക്കുന്നു. അതുപോലൊരു കഥാപാത്രം കിട്ടാനുള്ള കാത്തിരിപ്പിലായിരുന്നു ഇത്രയും വർഷങ്ങൾ കടന്ന് പോയതെന്നും

എന്നാലും ഈ വർഷങ്ങളിൽ കുടുംബിനിയായ നവ്യ തിരക്കിലായിരുന്നു. 'ചിന്നം ചിരു കിളിയെ' എന്ന നൃത്ത ആൽബം ഇതിനിടെ നവ്യ സ്വയം കൊറിയോഗ്രഫി ചെയ്ത് പുറത്തിറക്കിയിരുന്നു