ഗർഭിണിയാണെന്ന് വാർത്ത വന്നെങ്കിൽ ആ മക്കളൊക്കെ എവിടെ? നസ്രിയ ചോദിക്കുന്നു

വിവാഹശേഷം സിനിമാഭിനയം കുറേക്കാലത്തേക്ക് മാറ്റി വച്ചിരുന്നു നസ്രിയ നസിം. കുട്ടിത്തമുള്ള നായികയെ അത്ര ചെറുതായൊന്നുമല്ല ആരാധകർ മിസ് ചെയ്തത്. ഒടുവിൽ അവർക്കുള്ള മറുപടി ലഭിച്ചത് പൃഥ്വിരാജ് ചിത്രം 'കൂടെ'യിൽ നസ്രിയ മടങ്ങി വന്നപ്പോഴാണ്. ബാംഗ്ലൂർ ഡെയ്‌സിന് ശേഷം, ഭർത്താവ് ഫഹദിനൊപ്പം ട്രാൻസിൽ നസ്രിയ വേഷമിട്ടു. വിവാഹശേഷം നസ്രിയ എന്ത് ചെയ്തു? ജീവിതത്തിൽ എന്തെല്ലാം മാറ്റം വരുത്തി എന്ന് ഒരു ചാനൽ അഭിമുഖത്തിൽ ഇഷ്‌ട താരം തുറന്ന് പറഞ്ഞു

ഒരു വർഷത്തോളം യാത്രകളായിരുന്നു നസ്രിയയുടെയും ഫഹദിന്റെയും ജീവിതത്തിൽ. നിർത്താതെ സംസാരിക്കുന്ന നസ്രിയയെ 'ഞാനില്ലാത്തപ്പോള്‍ നീ ഒറ്റയ്ക്ക് സംസാരിക്കാറുണ്ടോ'? എന്ന് ചോദിച്ചു ഫഹദ് കളിയാക്കും

അഭിനയിക്കാതിരുന്നതിന്റെ കാരണം ഫഹദിന്റെ തീരുമാനമല്ല എന്ന് നസ്രിയ പറയും. ഫഹദ് പ്രോത്സാഹിപ്പിച്ചു കൊണ്ടേയിരുന്നു. ഇനി ഭർത്താവ് പറഞ്ഞിട്ടാണോ നസ്രിയ അഭിനയിക്കാത്തത് എന്ന് മറ്റുള്ളവർ തെറ്റിദ്ധരിക്കുമോ എന്ന ചിന്തയും ഫഹദിനുണ്ടായിരുന്നത്രെ

'സിനിമ ചെയ്തില്ലെന്ന് കരുതി ലോകം അവസാനിച്ചു എന്ന് കരുതുന്ന ആളല്ല ഞാന്‍' എന്ന് നസ്രിയ. ജീവിതത്തിൽ ചെയ്തു തീർക്കാൻ ഒരുപാട് കാര്യങ്ങളുണ്ടെന്നു നസ്രിയ പറയുന്നു. തങ്ങളുടെ വീട് സെറ്റ് ചെയ്യുന്നതിന്റെ ചുമതല പോലും നസ്രിയയാണ് ഏറ്റെടുത്തു നിർവഹിച്ചത്

ഒരുപാട് തവണ സോഷ്യൽ മീഡിയയിൽ താൻ ഗർഭിണിയാണെന്ന് പറഞ്ഞു വന്ന വാർത്തയോടും നസ്രിയ പ്രതികരിക്കുന്നു. ആ മക്കളൊക്കെ എവിടെ പോയി എന്നറിയില്ല എന്ന് നസ്രിയ. ജീവിതത്തിലെ വളരെ മനോഹരമായ ആ ഘട്ടത്തെ ഒരിക്കലും മറച്ച് വയ്ക്കുന്നയാളല്ല താനെന്നും നസ്രിയ പറയുന്നു

അടുത്ത സിനിമ എന്ന് എന്ന ചോദ്യത്തിന് നസ്രിയ ഇപ്പോൾ മറുപടി പറയുന്നില്ല. നല്ല തിരക്കഥ വന്നാൽ വേണ്ടെന്ന് പറയില്ലെന്നും നസ്രിയ വ്യക്തമാക്കുന്നു