'കുടുംബത്തിൽ ആദ്യമായി ഓസ്കാർ കൊണ്ടുവരുന്നത് താനായിരിക്കും'; ഭർത്താവിന്റെ വാക്കുകൾ പങ്കുവെച്ച് പ്രിയങ്ക ചോപ്ര

നെറ്റ്ഫ്ലിക്സിൽ റിലീസ് ചെയ്ത പ്രിയങ്ക ചോപ്രയുടെ ഏറ്റവും പുതിയ ചിത്രമാണ് ദി വൈറ്റ് ടൈഗർ. ചിത്രം ഇതിനകം പ്രേക്ഷകർ ഇരുകൈയ്യും നീട്ടി സ്വീകരിച്ചിരിക്കുകയാണ്. പ്രിയങ്കയുടെ ഏറ്റവും മികച്ച പ്രകടനമാണ് ചിത്രത്തിലേതെന്നാണ് പൊതുവിലുള്ള അഭിപ്രായം.

ഇപ്പോഴിതാ പ്രിയങ്ക ചോപ്രയുടെ ഭർത്താവ് നിക്ക് ജോനാസും പ്രിയങ്കയുടെ അഭിനയത്തെ പ്രകീർത്തിച്ച് രംഗത്തെത്തിയിരിക്കുകയാണ്. ഭർത്താവിന്റെ അഭിനന്ദനവാക്കുകൾ പ്രിയങ്ക തന്നെയാണ് ആരാധകരുമായി പങ്കുവെച്ചത്.

അരവിന്ദ് അഡിഗയുടെ ബുക്കർ പ്രൈസ് നേടിയ നോവലിനെ അടിസ്ഥാനമാക്കിയാണ് വൈറ്റ് ടൈഗർ സിനിമയാക്കിയിരിക്കുന്നത്. ചിത്രത്തിൽ പിങ്കി എന്ന കഥാപാത്രത്തെയാണ് നടി അവതരിപ്പിച്ചിരിക്കുന്നത്. സിനിമയുടെ സഹ നിർമാതാവു കൂടിയാണ് പ്രിയങ്ക.

ജോനാസ് കുടുംബത്തിൽ ആദ്യമായി ഓസ്കാർ കൊണ്ടുവരുന്നത് പ്രിയങ്കയായിരിക്കുമെന്നാണ് നിക്ക് ജോനാസ് സിനിമ കണ്ടതിന് ശേഷം അഭിപ്രായപ്പെട്ടത്. സിനിമ പുറത്തിറങ്ങുന്നതിന് മുമ്പ് തന്നെ ട്രെയിലർ പങ്കുവെച്ച് മികച്ച ചിത്രമാണെന്ന് നിക്ക് സോഷ്യൽമീഡിയയിൽ പോസ്റ്റ് ചെയ്തിരുന്നു.

ചിത്രം പുറത്തിറങ്ങിയതിനു ശേഷവും നിക്ക് സോഷ്യൽമീഡിയയിലൂടെ സന്തോഷം പങ്കുവെച്ചിരുന്നു. നടി എന്ന നിലയിലും നിർമാതാവെന്ന നിലയിലും പ്രിയങ്കയെ കുറിച്ച് അഭിമാനം തോന്നുന്നുവെന്നായിരുന്നു നിക്കിന്റെ ട്വീറ്റ്.

എല്ലാവരും ചിത്രം കാണണമെന്നും ആരേയും നിരാശപ്പെടുത്തില്ലെന്നും നിക്ക് പറഞ്ഞിരുന്നു. നെറ്റ്ഫ്ലിക്സിൽ ജനുവരി ഇരുപത്തിരണ്ടിനാണ് വൈറ്റ് ടൈഗർ റിലീസ് ചെയ്തത്. രാജ്കുമാർ റാവു, ആദർശ് ഗൗരവ് എന്നിവരാണ് ചിത്രത്തിലെ മറ്റ് പ്രധാന താരങ്ങൾ.

രാമിണ്‍ ബഹ്റാനിയാണ് വൈറ്റ് ടൈഗർ സംവിധാനം ചെയ്തിരിക്കുന്നത്. ബൽറാം ഹൽവായി എന്ന യുവാവിന്റെ ജീവിതത്തെ കുറിച്ചാണ് സിനിമ. പുതുമുഖമായ ആദർശ് ഗൗരവാണ് ബൽറാം ഹൽവായിയായി വേഷമിടുന്നത്. ആദ്യ ചിത്രത്തിൽ തന്നെ ഗംഭീര പ്രകടനം നടത്തി ആദർശ് പ്രേക്ഷകരെ ഞെട്ടിച്ചിരിക്കുകയാണ് ചിത്രത്തിൽ.

2007 ൽ നോവലിന് അരവിന്ദ് അഡിഗയ്ക്ക് ബുക്കർ പുരസ്കാരം ലഭിച്ചത്. അരവിന്ദ് അഡിഗയുടെ ആദ്യ നോവൽ കൂടിയായിരുന്നു ദി വൈറ്റ് ടൈഗർ. ബൽരാം ഹൽവായി എന്ന മുഖ്യകഥാപാത്രത്തിലൂടെ ആധുനിക ഇൻഡ്യൻ ജീവിതത്തെ പരിഹാസരൂപേണ കഥാകൃത്ത് നോക്കിക്കാണുന്നു. ഓട്ടോറിക്ഷ ഡ്രൈവറുടെ മകനായി ഒരു ദരിദ്ര ഗ്രാമത്തിൽ ജനിച്ച ബൽറാം ഹൽവായിക്ക് ഒരു സ്വപ്നമേ ഉണ്ടായിരുന്നുള്ളൂ, എങ്ങനെയും തന്റെ ഗ്രാമത്തിൽ നിന്നും രക്ഷപെടുക.

അവസാനം അയാൾ എത്തിച്ചേർന്നത് ഡൽഹിയിൽ ആയിരുന്നു. നിലച്ചു പോയ തന്റെ ജീവിത വിദ്യാഭ്യാസം അവിടെ നിന്ന് പുനരാരംഭിക്കുന്നു. ഗ്രാമത്തിന്റെ നിഷ്കളങ്കതയിൽ നിന്നും നഗരത്തിന്റെ വെളിച്ചത്തിലേക്കും കപട്യതിലെക്കുമുള്ള ബലരാമിന്റെ യാത്ര ഇവിടെ ആരംഭിക്കുന്നു.