വലിയ താരമാവുമെന്ന് പറഞ്ഞ ഋഷി കപൂർ; ഓർമ്മകൾ അയവിറക്കി പ്രിയ വാര്യർ

ഋഷി കപൂർ ഈ പോസ്റ്റ് ഇടുന്നത് 2018 ഫെബ്രുവരി 18ന്. അന്ന് പ്രിയ പ്രകാശ് വാര്യർ പ്രേക്ഷകരുടെ കണ്ണിറുക്കി പെൺകുട്ടി ആവുന്നതേയുള്ളൂ. തന്നിലെ താരത്തെ അനുഗ്രഹിച്ച ബോളിവുഡ് ഇതിഹാസത്തിന്റെ പോസ്റ്റ് ഷെയർ ചെയ്തു ഓർമ്മകൾ അയവിറക്കുകയാണ് പ്രിയ

പ്രിയ വാര്യരിൽ ഒരു മികച്ച താരത്തെ കണ്ട ഋഷി കപൂർ, ഈ പെൺകുട്ടി സമപ്രായക്കാർക്കും ഒരു മികച്ച മത്സരം കാഴ്ചവയ്ക്കുമെന്ന് ട്വീറ്റിലൂടെ പറയുന്നു. ഈ വാക്കുകളെപ്പറ്റി ഓർക്കുമ്പോൾ പ്രിയയുടെ മനസ്സിലെ ചിന്ത ഇതാണ് 

"ഈ വാക്കുകൾ എനിക്ക് എത്രത്തോളം വലുതാണെന്ന് പറയാൻ പോലുമാവുന്നില്ല. ഞാൻ എന്നെ തന്നെ വിശ്വാസിക്കാതാവുന്ന സന്ദർഭങ്ങളിൽ അദ്ദേഹത്തിന്റെ വാക്കുകൾ എനിക്ക് പ്രചോദനമാവാറുണ്ട്. ഇത് ഞാൻ എക്കാലവും ഓർത്തിരിക്കും. താങ്കളുടെ ആത്മാവിന് നിത്യശാന്തി ലഭിക്കട്ടെ." പ്രിയ കുറിച്ചു

ആദ്യ ചിത്രം 'ഒരു അഡാർ ലവ് ' 2019 ലെ വാലന്റൈൻ ദിനത്തിലാണ് പുറത്തിറങ്ങുന്നത്. റോഷനായിരുന്നു ചിത്രത്തിലെ നായകൻ. പ്രിയയും നൂറിന് ഷെരീഫും തുല്യ കഥാപാത്രങ്ങളെ അവതരിപ്പിച്ചു. ഒമർ ലുലുവാണ് സംവിധായകൻ

പ്രിയ പ്രകാശ് വാര്യരുടെ ആദ്യ ബോളിവുഡ് ചിത്രമാണ് ശ്രീദേവി ബംഗ്ളാവ്. ഇനിയും റിലീസ് ആവാത്ത ചിത്രം മണ്മറഞ്ഞ താരം ശ്രീദേവിയുടെ കഥയുമായി സാമ്യമുള്ളതെന്ന പേരിൽ ആക്ഷേപം ഉയർന്നിരുന്നു. ശ്രീദേവിയുടെ ഭർത്താവ് ബോണി കപൂർ തന്നെ ചിത്രത്തിനെതിരെ രംഗത്തെത്തി

ഏകാന്ത ജീവിതവും, അവസാനം ബാത്ത് ടബ്ബിലെ മരണവും പ്രതിപാദ്യമാകുന്നതാണ് രണ്ടു മിനിറ്റോളം വരുന്ന ഈ സിനിമയുടെ ടീസർ

എന്നാൽ ചിത്രം ഒരു ക്രൈം ത്രില്ലർ എന്നാണ് സംവിധായകൻ പ്രശാന്ത് മാമ്പുള്ളിയുടെ പക്ഷം