ഓസ്കാർ ചിത്രം പാരസൈറ്റ്‌ വിജയ് സിനിമയുടെ കോപ്പിയടിയോ? നിർമ്മാതാവ് കേസുമായി മുന്നോട്ട്

ഓസ്കർ ചിത്രം 'പാരസൈറ്റ്‌' വിജയ് നായകനായ 'മിൻസാര കണ്ണാ'യുടെ മറ്റൊരു പതിപ്പെന്ന് ആരാധകർ ആരംഭത്തിലെ സംശയം പ്രകടിപ്പിച്ചിരുന്നു. ഇപ്പോൾ കേസുമായി മുന്നോട്ട് പോകാൻ തീരുമാനിച്ച് സിനിമാ നിർമ്മാതാവ് മുന്നോട്ട്. 1999ൽ റിലീസായ തമിഴ് ചിത്രത്തിന്റെ കഥ കൊറിയൻ സിനിമ കോപ്പിയടിച്ചു എന്നാണ് വാദം

മാധ്യമങ്ങൾക്ക് നൽകിയ അഭിമുഖത്തിൽ വക്കീലുമായി കേസിനു പോകാൻ തയാറെടുക്കുകയാണെന്ന് തമിഴ് ചലച്ചിത്ര നിർമ്മാതാവ് പി.എൽ. തേനപ്പൻ പറഞ്ഞിരുന്നതായി റിപ്പോർട്ടുകൾ സൂചിപ്പിക്കുന്നു. അന്തരിച്ച ചലച്ചിത്ര നിർമ്മാതാവ് കെ.ആർ. ഗംഗാധരനാണ് 'മിൻസാര കണ്ണാ' നിർമ്മിച്ചത്

മികച്ച ചിത്രം, മികച്ച തിരക്കഥ, വിദേശഭാഷാ ചിത്രം, മികച്ച സംവിധായകൻ എന്നിങ്ങനെ നാലു പ്രധാന പുരസ്ക്കാരങ്ങൾ നേടിയ കൊറിയൻ ചിത്രമാണ് പാരസൈറ്റ്. ബോംഗ് ജൂൺ ഹോയാണ് ചിത്രത്തിന്റെ സംവിധാനം. നിർധന നാലംഗ കുടുംബം സമ്പന്നരുടെ വീട്ടിൽ കയറിക്കൂടി അവരുടെ ചിലവിൽ ജീവിക്കുന്നതിനെ പറ്റിയാണ് പാരാസൈറ്റ്‌ പറയുന്നത്

1999ൽ പുറത്തിറങ്ങിയ 'മിൻസാര കണ്ണാ'യിൽ കോടീശ്വരനും സുഹൃത്തുക്കളും സമ്പന്ന യുവതിയുടെ വീട്ടുജോലിക്കാരായി കടന്നു കൂടി വിവാഹാഭ്യർത്ഥന നടത്തുന്നതാണ് പ്രമേയം. എന്നാൽ 20 വർഷം മുൻപ് തന്നെ ഓസ്കർ മൂല്യമുള്ള കഥ തനിക്ക് ചെയ്യാൻ പറ്റിയല്ലോ എന്ന സന്തോഷമാണ് സിനിമയുടെ സംവിധായകൻ കെ.എസ്. രവികുമാറിനുള്ളത്