Radhe Shyam | പ്രഭാസ് ചിത്രം രാധേ ശ്യാമിലെ ടീസറിലെ രംഗം കണ്ടോ? ഒരു സീനിന് വേണ്ടി മുടക്കിയത് കോടികൾ

ഫെബ്രുവരി 14 വാലന്റൈൻസ് ദിനത്തിലാണ് പ്രഭാസ് ചിത്രം രാധേശ്യാമിന്റെ ആദ്യ ദൃശ്യങ്ങൾ പുറത്തിറങ്ങിയത്. പൂജാ ഹെഗ്ഡെ നായികയാകുന്ന ചിത്രം തെലുങ്കിന് പുറമേ, ഹിന്ദി, തമിഴ്, മലയാളം എന്നീ ഭാഷകളിലും പുറത്തിറങ്ങുന്നുണ്ട്.

പഴയകാല രീതിയിലുള്ള റെയിൽവേ സ്റ്റേഷൻ പശ്ചാത്തലമാക്കിയുള്ള ദൃശ്യമാണ് പുറത്തുവന്നത്. കലാ സംവിധായകൻ രവീന്ദർ റെഡ്ഡിയാണ് ഇതിനായുള്ള സെറ്റ് ഒരുക്കിയിരിക്കുന്നത്. പുറത്തു വരുന്ന റിപ്പോർട്ടുകൾ അനുസരിച്ച് കോടികളാണ് ഈയൊരു ദൃശ്യത്തിന് മാത്രം ചെലവഴിച്ചിരിക്കുന്നത്.

നാല് ഭാഷകളിൽ പുറത്തിറങ്ങിയ ടീസറിന് മാത്രം ഒരു മാസത്തോളം രവീന്ദർ റെഡ്ഡിയും ടീമും അധ്വാനിച്ചിട്ടുണ്ട്. പുറത്തിറങ്ങി ദിവസങ്ങൾക്കുള്ളിൽ 80 ലക്ഷത്തിലധികം പേരാണ് ടീസറിന്റെ തെലുങ്ക് പതിപ്പ് മാത്രം കണ്ടത്.

ഇന്ത്യ ടുഡെ റിപ്പോർട്ട് അനുസരിച്ച് ടീസറിലെ ട്രയിനും റെയിൽവേ സ്റ്റേഷനും അടക്കമുള്ള രംഗങ്ങൾ ഒരുക്കാൻ 1.6 കോടി രൂപയാണ് ചെലവഴിച്ചത്. ഈ ദൃശ്യങ്ങൾ ഇറ്റലിയിൽ ചിത്രീകരിക്കാനായിരുന്നു നേരത്തേ തീരുമാനിച്ചിരുന്നത്.

എന്നാൽ കോവിഡും ലോക്ക്ഡൗണും കാരണം നിയന്ത്രണങ്ങൾ വന്നതോടെ ഇറ്റലിയിലെ ചിത്രീകരണം മുടങ്ങി. ചിത്രത്തിന്റെ ഷൂട്ടിങ് ഇറ്റലിയിൽ പുരോഗമിക്കുന്നതിനിടയിലാണ് കോവിഡ് നിയന്ത്രണങ്ങൾ ലോകരാജ്യങ്ങളിൽ പ്രഖ്യാപിക്കുന്നത്. ഇതോടെ ചിത്രീകരണം സംഘം ഡിസംബറിൽ ഇന്ത്യയിലേക്ക് മടങ്ങുകയായിരുന്നു.

ഇതേ തുടർന്നാണ് ഈ രംഗങ്ങൾ ഇന്ത്യയിൽ തന്നെ സെറ്റ് ചെയ്ത് ചിത്രീകരിക്കാൻ കലാസംവിധായകൻ തീരുമാനിച്ചത്. രവീന്ദർ റെഡ്ഡിക്കൊപ്പം 250 ഓളം കലാകാരന്മാർ 30 ദിവസം പരിശ്രമിച്ചാണ് ട്രെയിനും റെയിൽവേ സ്റ്റേഷനും ഒരുക്കിയത്.

ഹൈദരാബാദിലെ അന്നപൂർണ സ്റ്റുഡിയോയിലാണ് സെറ്റ് ഒരുക്കിയത്. ഇവിടെ തന്നെയാണ് ചിത്രത്തിന്റെ മറ്റ് പല ഭാഗങ്ങളും ചിത്രീകരിച്ചിരിക്കുന്നത്.

പൂജ ഹെഗ്ഡെ, പ്രഭാസ് എന്നിവർക്ക് പുറമേ, സത്യരാജ്, ഭാഗ്യശ്രീ, കുനാൽ കപൂർ, ജഗ്പതി ബാബു, ജയറാം, സച്ചിൻ കഡേക്കർ, ബീന ബാനർജി, മുരളി ശർമ, സാഷ ഛേദ്രി, പ്രിയദർശി, റിദ്ദി കുമാർ, സത്യൻ എന്നിവരും ചിത്രത്തിൽ പ്രധാന വേഷത്തിൽ എത്തുന്നുണ്ട്.

ചിത്രത്തിനായി മലയാളമടക്കമുള്ള ഭാഷകളിൽ ഒരു പിടി സംഗീത സംവിധായകരെ ഒന്നിച്ച് കൊണ്ടുവരാനുള്ള ഒരുക്കത്തിലാണ് അണിയറ പ്രവർത്തകർ. ഭാഷയ്ക്കടിസ്ഥാനമായി ചിത്രത്തിലെ ഗാനങ്ങള്‍ മാറുന്ന രീതിയില്‍ ഇന്ത്യന്‍ സിനിമയില്‍ ഇന്നുവരെ കണ്ടിട്ടില്ലാത്ത ഒരു പരീക്ഷണമാണ് രാധേശ്യാമിലൂടെ നടക്കാന്‍ പോകുന്നത്.

അതായത് കഥാസന്ദര്‍ഭങ്ങളും ആഖ്യാനവുമെല്ലാം ഒന്നാണെങ്കിലും ചിത്രത്തിന്റെ ഹിന്ദി പതിപ്പില്‍ കേള്‍ക്കുന്ന ഗാനമാവില്ല, ഇതേ സിനിമയുടെ തന്നെ തെലുങ്ക് പതിപ്പിലുണ്ടാവുക.

ഇന്ത്യൻ സിനിമയിൽ തന്നെ ഒരു പുതിയ പരീക്ഷണത്തിലാണ് രാധേശ്യാമിന്റെ അണിയറ പ്രവർത്തകർ ഒരുങ്ങുന്നത്. ഇത് സിനിമ ആസ്വാദകരെ മാത്രമല്ല സംഗീതപ്രേമികളെ വരെ ആവേശത്തിൽ ആക്കിയിട്ടുണ്ട്.

സിനിമ പ്രേക്ഷകര്‍ക്ക് പരിചിതമായിട്ടുള്ള ഡബ്ബിങ്ങ് രീതിയില്‍ നിന്നും വേറിട്ട ഒരു ശൈലിയാണ് രാധേശ്യാം മുന്നോട്ട് വയ്ക്കുന്നത്. ഇത്തരത്തില്‍ ഓരോ ഭാഷയ്ക്കും വെവ്വേറെ ഗാനങ്ങള്‍ തിട്ടപ്പെടുത്തുന്നത് ഏറെ ശ്രമകരമായ ദൗത്യമാണ്.

ഓരോ ഗാനത്തിനും അനുസൃതമായ തരത്തില്‍ നൃത്ത സംവിധാനം നിര്‍വഹിക്കുകയും, ഓരോ ഗാനവും അഭിനേതാക്കളെ കൊണ്ട് പ്രത്യേകം ചിത്രീകരിക്കുകയും വേണം.