Vijay Sethupathy 800 | മുരളീധരന്റെ ബയോപിക് പോസ്റ്റർ എത്തിയതിനു പിന്നാലെ ട്വിറ്ററിൽ ട്രെന്റിംഗായി #ShameOnVijaySethupathi

ശ്രീലങ്കൻ ക്രിക്കറ്റ് ഇതിഹാസം മുത്തയ്യ മുരളീധരൻറെ ജീവിതം വെള്ളിത്തിരയിലെത്തുകയാണ്. തമിഴ് താരം വിജയ് സേതുപതിയാണ് മുത്തയ്യ മുരളീധരനായി എത്തുന്നത്. 800 എന്നാണ് ചിത്രത്തിന് പേരിട്ടിരിക്കുന്നത്.

ടെസ്റ്റ് ക്രിക്കറ്റിൽ 800 വിക്കറ്റ് സ്വന്തമാക്കിയതിനു പിന്നാലെ 18 വർഷം നീണ്ട ക്രിക്കറ്റ് കരിയർ 2008ൽ അദ്ദേഹം അവസാനിപ്പിച്ചു.അതുകൊണ്ടാണ് ചിത്രത്തിന് 800 എന്ന പേര് നൽകിയിരിക്കുന്നത്.

എംഎസ് ശ്രീപതിയാണ് ചിത്രം സംവിധാനം ചെയ്യുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്ററും മോഷനും പോസ്റ്ററും കഴിഞ്ഞ ദിവസം പുറത്തു വന്നിരുന്നു. ഇതിനു പിന്നാലെ ShameOnVijaySethupathi എന്ന ഹാഷ് ടാഗ് ട്വിറ്ററിൽ ട്രെന്റിംഗ് ആയിരിക്കുകയാണ്.

സ്വദേശികളായ സിംഹള ജനത ഭൂരിപക്ഷമുള്ള ശ്രീലങ്കൻ സർക്കാർ ചരിത്രപരമായി തങ്ങളുടെ രാജ്യത്തെ തമിഴരെ അടിച്ചമർത്തുന്നുവെന്ന വസ്തുതയിലാണ് ട്വിറ്ററാറ്റികളുടെ വാദം.

വംശീയതയെ അടിസ്ഥാനമാക്കി തമിഴ് ജനതയോട് വിവേചനം കാണിക്കുന്ന രാജ്യത്തെ പ്രതിനിധീകരിക്കുന്ന ക്രിക്കറ്റ് കളിക്കാരനായി വിജയ്‌ സേതുപതി വേഷമിടുന്നത് അന്യായമാണെന്ന് ട്വിറ്റെറാറ്റികൾ വാദിക്കുന്നു.

800 മോഷൻ പോസ്റ്റർ സമാരംഭത്തിനുശേഷം #ShameOnVijaySethupathi ട്വിറ്ററിൽ ട്രെൻഡുചെയ്യാൻ തുടങ്ങി. ഒരു നടനെന്ന നിലയിൽ അദ്ദേഹത്തെ വളർത്തിയ ആളുകളിൽ നിന്ന് വളരെയധികം എതിർപ്പുണ്ടായിട്ടും മുത്തയ്യ മുരളീധരൻ എന്ന നിന്ദ്യനായ വ്യക്തിയുടെ വേഷം ചെയ്യുന്നത് ധാർഷ്ട്യമാണെന്ന് ട്വിറ്ററാറ്റികൾ പറയുന്നു.

ശ്രീലങ്കയുടെ പതാക പിടിക്കുന്ന ആദ്യ തമിഴ് നടനായ വിജയ് സേതുപതി അപമാനമാണെന്നാണ് മറ്റൊരാൾ പറയുന്നത്. വിജയ് സേതുപതി തമിഴ് സിനിമാ വ്യവസായത്തിന് തന്നെ അപമാനമായിരിക്കുകയാണെന്നാണ് ഒരാൾ പറയുന്നത്.

നാഴികക്കല്ലാകുന്ന പ്രൊജക്ടിന്റെ ഭാഗമായതിൽ അഭിമാനം എന്നാണ് വിജയ് സേതുപതി മോഷൻ പോസ്റ്റർ പങ്കുവെച്ചുകൊണ്ട് ട്വീറ്റ് ചെയ്തത്. വംശഹത്യയുടെ ഭാഗമായിരുന്നു മുരളിയെന്നും നിങ്ങളും ആ സംഘത്തിന്റെ ഭാഗമാകാൻ പോവുകയാണോ എന്നാണ് സേതുപതിയുടെ ട്വീറ്റിന് ഒരാളുടെ ചോദ്യം.

മുരളീധരൻ ഒരു ശ്രീലങ്കൻ തമിഴനാണ്, 1977 ൽ രാജ്യത്ത് നടന്ന കലാപത്തിന്റെ ഇരയാണെന്ന് അദ്ദേഹം സമ്മതിച്ചിട്ടുമുണ്ട്. ഡാർ മോഷൻ പിക്ചേഴ്സും മൂവി ട്രെയിൻ മോഷൻ പിക്ചേഴ്സും ചേർന്നാണ് ബയോപിക് ചിത്രം നിർമ്മിക്കുന്നത്