'ശ്രീദേവിക്ക് ശേഷം കോമഡി ചെയ്യുന്ന ഒരേയൊരു നടി'; വീണ്ടും ആത്മപ്രശംസയുമായി കങ്കണ റണൗട്ട്

തന്നേക്കാൾ കഴിവുള്ള നടി ലോകത്ത് വേറെ ഇല്ലെന്ന സ്വയം പുകഴ്ത്തലിന് ശേഷം വീണ്ടും കങ്കണ റണൗട്ട്. ശ്രീദേവിക്ക് ശേഷം കോമഡി ചെയ്യുന്ന ഏക നടിയെന്നാണ് ഇത്തവണ കങ്കണ സ്വയം വിശേഷിപ്പിച്ചിരിക്കുന്നത്. കങ്കണ നായികയായ തനു വെഡ്സ് മനുവിന്റെ പത്താം വാർഷികത്തിലാണ് നടിയുടെ സ്വയം പുകഴ്ത്തൽ.

പരുക്കൻ കഥാപാത്രങ്ങൾ മാത്രം ചെയ്തിരുന്ന തന്റെ കരിയർ മാറ്റി മറിച്ച ചിത്രമാണ് തനു വെഡ്സ് മനുവെന്ന് കങ്കണ പറയുന്നു. കോമഡി ചിത്രത്തിനൊപ്പം താനും മുഖ്യധാരയിലേക്ക് ഉയർന്നു. ക്വീൻ, ഡാട്ടോ സിനിമകളിലൂടെ താൻ കൂടുതൽ നന്നായി കോമഡി കൈകാര്യം ചെയ്തു. ഇതോടെ ശ്രീദേവിക്ക് ശേഷം കോമഡി കൈകാര്യം ചെയ്യുന്ന ഏക നടിയായി താൻ മാറി. ഇതാണ് കങ്കണയുടെ കുറിപ്പ്.

ആനന്ദ് എൽ റായ് സംവിധാനം ചെയ്ത തനു വെഡ്സ് മനു 2011 ലാണ് പുറത്തിറങ്ങുന്നത്. മാധവനായിരുന്നു ചിത്രത്തിലെ നായകൻ. ചിത്രത്തിന്റെ പത്താം വാർഷികവുമായി ബന്ധപ്പെട്ട് വേറെയും നിരവധി ട്വീറ്റുകൾ കങ്കണ ചെയ്തിട്ടുണ്ട്.

ചില മീഡിയ ഹൗസുകൾ സിനിമയുടെ പത്താം വാർഷികം വാർത്തയാക്കിയപ്പോൾ കങ്കണയെ ടാഗ് ചെയ്തിരുന്നില്ല. ഇതിനെയും നടി ചോദ്യം ചെയ്തു. ചിത്രത്തിൽ സഹതാരമായി അഭിനയിച്ച സ്വര ഭാസ്കറിനെ പലരും ടാഗ് ചെയ്തപ്പോൾ പ്രധാന കഥാപാത്രമായി അഭിനയിച്ച തന്നെ ഒഴിവാക്കിയതിനെയാണ് കങ്കണ ചോദ്യം ചെയ്തത്.

കങ്കണ സ്ഥിരമായി വിമർശിക്കുന്ന ആലിയ ഭട്ട്, താപ്സി പന്നു, സ്വര ഭാസ്കർ എന്നിവരെ വലിച്ചിഴച്ചായിരുന്നു ട്വീറ്റ്. സിനിമയുടെ വാർഷികത്തെ കുറിച്ചുള്ള ട്വീറ്റിൽ കങ്കണയെ ടാഗ് ചെയ്യാത്തതിനെ കുറിച്ചുള്ള ട്വീറ്റ് പങ്കുവെച്ച് നടിയുടെ ട്വീറ്റ് ഇങ്ങനെ,(Image: Instagram/kanganaranaut)

"എന്റെ ശത്രുക്കളുടെ ബുദ്ധിമുട്ട് നോക്കൂ, അവരെന്നെ ദിവസവും ശപിക്കുന്നു. ഞാൻ സ്വരയോ, ആലിയയോ, താപ്സിയോ അല്ലെങ്കിൽ മറ്റാരെങ്കിലും ആയാലും ഞാൻ ആകരുതെന്നാണ് അവരുടെ ആഗ്രഹം. എന്തൊരു വിചിത്രമായ സ്നേഹമാണ് അവർക്കെന്നോട്".(Image: Instagram/kanganaranaut)

എന്നും വിവാദങ്ങളിൽ ഇടംപിടിക്കുന്ന നടിയാണ് കങ്കണ റണൗട്ട്. ഏറ്റവും ഒടുവിലായി കർഷക സമരത്തെ കുറിച്ചുള്ള നടിയുടെ ട്വീറ്റുകൾ ഏറെ വിവാദങ്ങൾക്ക് വഴിവെച്ചിരുന്നു. ഇതിനിടയിൽ, തന്റെ പുതിയ ചിത്രങ്ങളായ തലൈവി, ധാക്കദ് എന്നിവയിൽ നിന്നുള്ള ചിത്രങ്ങൾ പങ്കുവെച്ച് കങ്കണ നടത്തിയ പരാമർശങ്ങളും ഏറെ വിമർശനങ്ങൾക്കും ട്രോളുകൾക്കും കാരണമായിരുന്നു.

തന്റെ അത്ര റേഞ്ചുള്ള മറ്റൊരു നടി ഭൂമിയിൽ ഇല്ലെന്നായിരുന്നു കങ്കണയുടെ ട്വീറ്റ്. എന്നാൽ ട്വീറ്റ് അവിടം കൊണ്ട് തീർന്നില്ല, ഒരു പടി കൂടി കടന്ന്, മെറിൽ സ്ട്രീപ്പിനെ പോലെ വ്യത്യസ്ത കഥാപാത്രങ്ങൾ ചെയ്യാനുള്ള കഴിവ് മാത്രമല്ല തനിക്കുള്ളത്, ഗാൽ ഗഡോട്ടിനെ പോലെ ആക്ഷനും ഗ്ലാമറും തനിക്ക് വഴങ്ങുമെന്നും കങ്കണയുടെ ട്വീറ്റിൽ സ്വയം പ്രശംസിക്കുന്നു.(Image: Instagram/kanganaranaut)

അടുത്ത ട്വീറ്റിൽ കങ്കണയുടെ വെല്ലുവിളി ഇങ്ങനെ, ഈ ഭൂമിയിൽ തന്നേക്കാൾ ബുദ്ധിയും റേഞ്ചുമുള്ള മറ്റൊരു നടിയെ കാണിച്ച് തന്നാൽ അഹങ്കാരം അവസാനിപ്പിക്കാമെന്നും അതുവരെ അഭിമാനത്തിന്റെ ആഢംബരം താൻ ആസ്വദിക്കുമെന്നും കങ്കണ പറഞ്ഞു.(Image: Instagram/kanganaranaut)

മെറിൽ സ്ട്രീപ്പുമായി സ്വയം താരതമ്യം ചെയ്ത നടിക്കെതിരെ പലരും വിമർശനവുമായി എത്തിയപ്പോൾ, എന്തിനാണ് വെള്ളക്കാരെ ആരാധിക്കുന്നത് എന്നായിരുന്നു കങ്കണയുടെ മറുചോദ്യം. മെറിൽ സ്ട്രീപ്പിന് ധാക്കദോ, തലൈവിയോ ചെയ്യാനാകുമോ?. തന്റെ സിനിമകളായ ക്വീൻ, ഫാഷൻ, പങ്ക ഇതിലേതെങ്കിലും ഒന്ന് ചെയ്യാനാകുമോ എന്നും കങ്കണ റണൗത്ത് ചോദിച്ചു. (Image: Instagram/kanganaranaut)