എന്റെ ഹൃദയത്തിൽ കുടിയിരിക്കുന്ന ആരാധകരേ; കൊറോണ ഭീതിയെത്തുടർന്ന് ലളിതമാക്കിയ മാസ്റ്റർ ഓഡിയോ ലോഞ്ചിൽ വിജയ്

ലോകേഷ് കനകരാജ് സംവിധാനം ചെയ്യുന്ന 'മാസ്റ്റർ' സിനിമയുടെ ഓഡിയോ ലോഞ്ച് ചടങ്ങിൽ ആരാധകരെ മറക്കാതെ ഇളയദളപതി വിജയ്. കൊറോണ ഭീതിയെത്തുടർന്ന് ചുരുങ്ങിയ സദസ്സിനോപ്പം നടത്തിയ പരിപാടിയായിരുന്നു. എന്നാൽ ആരാധകരെ സ്മരിച്ചു കൊണ്ടാണ് വിജയ് പ്രസംഗം ആരംഭിച്ചത് പോലും

എൻ നെഞ്ചിൽ കുടി ഇരുക്കും ... (എന്റെ ഹൃദയത്തിൽ കുടിയിരിക്കുന്ന പ്രിയപ്പെട്ട ആരാധകരെ) എന്ന് പറഞ്ഞു കൊണ്ടാണ് വിജയ് തുടങ്ങിയത്. 'എന്റെ ആരാധകർക്ക് ഓഡിയോ ലോഞ്ചിൽ പങ്കെടുക്കാൻ കഴിയാത്തതിൽ എനിക്ക് സങ്കടമുണ്ട്. കൊറോണ വൈറസ് മൂലമുണ്ടായ വൈഷമ്യങ്ങളെ തുടർന്ന് പരിപാടി ലളിതമാക്കേണ്ടി വന്നു, ക്ഷമിക്കണം'. വിജയ് പറഞ്ഞു.

തന്റെ കൂട്ടുകാരൻ തല അജിത്തിനെക്കുറിച്ച് സംസാരിച്ചതാണ് മറ്റൊരു പ്രത്യേകത. “എന്റെ സുഹൃത്ത് അജിത്തിനെപ്പോലെ ഞാനും ബ്ലേസർ ധരിച്ച് വന്നിട്ടുണ്ട്. ഇതെനിക്ക് ചേരുന്നുണ്ടോ?" അത്ര വലുതല്ലാത്ത സദസ്സിനെ നോക്കി വിജയ് ചോദിച്ചു

ചിത്രത്തിലെ വില്ലനായി അഭിനയിക്കുന്ന വിജയ് സേതുപതിയെ പ്രശംസിച്ചതായിരുന്നു ശ്രദ്ധേയമായ മറ്റൊരു കാര്യം. 'വിജയ് സേതുപതി ഇപ്പോൾ സിനിമയ്ക്കു ഒഴിവാക്കാൻ കഴിയാത്ത ഒരു വ്യക്തിയായി മാറിയിരിക്കുന്നു. ഞങ്ങൾ നിരവധി നെഗറ്റീവ് കഥാപാത്രങ്ങൾ കണ്ടിട്ടുണ്ട്, എന്നാൽ മാസ്റ്ററിലെ അദ്ദേഹത്തിന്റെ റോൾ സ്‌പെഷൽ ആയിരിക്കും.' വിജയ് പറഞ്ഞു

കഴിഞ്ഞ മാസം ചെന്നൈയിലെ വീട്ടിൽ നടന്ന ആദായ നികുതി റെയ്‌ഡിനെ പറ്റിയും വിജയ് സംസാരിച്ചു. 'എനിക്ക് എന്റെ പഴയ ജീവിതം തിരികെ വേണം. അത് റെയ്‌ഡ്‌ ഇല്ലാതെ സമാധാനപരമായിരുന്നു'. വിജയ് പറഞ്ഞു. അനിരുദ്ധ് രവിചന്ദർ ആണ് മാസ്റ്റർ സിനിമയുടെ സംഗീതം