'രണ്ടാമൂഴം' സിനിമയാക്കാൻ അനുമതി നൽകരുത്: ശ്രീകുമാർ മേനോനെതിരെ എം.ടി സുപ്രീംകോടതിയിൽ

ന്യൂഡൽഹി: 'രണ്ടാമൂഴം'സിനിമായാക്കുന്നതിനെതിരെ എഴുത്തുകാരാൻ എം.ടി വാസുദേവൻ നായർ സുപ്രീം കോടതിയെ സമീപിച്ചു. അനുമതി ആവശ്യപ്പെട്ട് സംവിധായകൻ ശ്രീകുമാര്‍ മേനോന്‍ ഹര്‍ജിയുമായി സുപ്രീം കോടതിയില്‍ എത്തിയാല്‍ തന്റെ ഭാഗം കൂടി കേള്‍ക്കണമെന്ന് ആവശ്യപ്പെട്ടുള്ള തടസ ഹർജിയാണ് എം.ടി ഫയൽ ചെയ്തിരിക്കുന്നത്.

രണ്ടാമൂഴം സംബന്ധിച്ച തർക്കം മധ്യസ്ഥചർച്ചയ്ക്ക് വിടണമെന്നന്ന ശ്രീകുമാർ മോനോന്റെ ആവശ്യം ഹൈക്കോടതി നേരത്തെ തള്ളിയിരുന്നു. ഇതിനെതിരെ ശ്രീകുമാർ സുപ്രീം കോടതിയെ സമീപിച്ചാൽ തന്‍റെ വാദം കൂടി കേൾക്കാതെ നടപടി സ്വീകരിക്കരുതെന്നാണ് എം.ടി തടസഹർജിയിൽ ആവശ്യപ്പെട്ടിരിക്കുന്നത്.

തർക്കത്തിൽ ഒത്തുതീർപ്പിനില്ലെന്നും തിരക്കഥ തിരിച്ചുതരണമെന്നുമുള്ള നിലപാടിലാണ് എം.ടി. നാലര കൊല്ലം മുമ്പാണ് രണ്ടാമൂഴം തിരക്കഥ എംടി വി എ ശ്രീകുമാറിന് കൈമാറിയത്. മോഹൻലാൽ നായകനാകുന്ന ചിത്രത്തിനായി ആയിരം കോടി ചിത്രത്തിനായി മുടക്കുമെന്ന് പ്രഖ്യാപിച്ച് വ്യവസായി ബി ആർ ഷെട്ടിയും രംഗത്തെത്തിയിരുന്നു.

എന്നാൽ മൂന്നു വർഷത്തിനകം ചിത്രീകരണം തുടങ്ങണമെന്ന കരാർ പാലിക്കപ്പെട്ടില്ല. ഇതോടെയാണ് സംവിധായകനെതിരെ എം.ടി കോഴിക്കോട് മുൻസിഫ് കോടതിയെ സമീപിച്ചത്.

തർക്കത്തിൽ മധ്യസ്ഥത ആവശ്യപ്പെട്ട് ശ്രീകുമാർ കോഴിക്കോട് ജില്ലാ അതിവേഗ കോടതിയെ സമീപിച്ചു. ആവശ്യം തള്ളിയതോടെ ഹൈക്കോടതിയെ സമീപിച്ചെങ്കിലും അവിടെയും വിധി ശ്രീകുമാർ മേനോന് എതിരായി.

ഈ സാഹചര്യത്തിൽ വി എ ശ്രീകുമാർ സുപ്രീംകോടതിയെ സമീപിച്ചേക്കുമെന്ന സൂചനയെത്തുടർന്നാണ് എംടി തടസഹർജി നൽകിയിരിക്കുന്നത്.