Juhi Chawla| 'ആരാണ് ആമിർഖാൻ, ആരാണ് ജൂഹി ചൗള?'; 33 വർഷം മുമ്പ് ടാക്സി ഡ്രൈവർമാർ പരിഹസിച്ചതിനെ കുറിച്ച് താരം

ബോളിവുഡിൽ (Bollywood)മാത്രമല്ല, ഇന്ത്യയൊട്ടാകെ ആരാധകരുള്ള താരങ്ങളാണ് ആമിർ ഖാനും( Aamir Khan ) ജൂഹി ചൗളയും(Juhi Chawla). ആമിർ ഖാൻ സിനിമകൾക്കായി ഇന്നും വലിയൊരു പ്രേക്ഷകർ ലോകത്തിന്റെ വിവിധ ഭാഗങ്ങളിലുണ്ട്. സിനിമയിൽ ഇപ്പോൾ സജീവമല്ലെങ്കിലും ജൂഹി ചൗളയ്ക്കും ആരാധകർ കുറവല്ല.

എന്നാൽ, സിനിമയിൽ അഭിനയിച്ചിട്ടും ആരാലും തിരിച്ചറിയപ്പെടാതെ പരിഹസിക്കപ്പെട്ട കഥകൾ ഈ താരങ്ങൾക്കുമുണ്ട് പറയാൻ. 33 വർഷങ്ങൾക്ക് മുമ്പ് നടന്ന സംഭവം ഇന്നും ജൂഹി ചൗള ഓർക്കുന്നു.

ജൂഹിയുടെയും ആമിറിന്റേയും കരിയറിൽ വഴിത്തിരിവായ ചിത്രമാണ് ഖയാമത്ത് സേ ഖയാമത്ത് തക്ക്. 1988 ൽ പുറത്തിറങ്ങിയ ചിത്രം ആ കാലത്തെ സൂപ്പർ ഹിറ്റായിരുന്നു. ഈ ചിത്രത്തിന്റെ റിലീസിന് മുമ്പുണ്ടായ അനുഭവമാണ് ദി കപിൽ ശർമ ഷോയിൽ ജൂഹി പങ്കുവെച്ചത്.

മുംബൈയിലെ ടാക്സി ഡ്രൈവർമാർ പുറത്താക്കിയതിനെ കുറിച്ചാണ് നടി പറയുന്നത്. സിനിമയുടെ റിലീസിന് മുമ്പാണ് സംഭവം. ആ ചിത്രം പുറത്തിറങ്ങുന്നത് വരെ ആമിർ ഖാനേയോ തന്നെയോ ആർക്കും അറിയില്ലായിരുന്നു.

ആ കാലത്ത് പുതിയ സിനിമകളുടെ പോസ്റ്റർ മുംബൈയിലെ ടാക്സികളിൽ പതിക്കുന്നത് സ്ഥിരമായിരുന്നു. സിനിമയ്ക്ക് കൂടുതൽ പ്രചാരം കിട്ടാൻ വേണ്ടിയായിരുന്നു ഇത്.

താൻ താമസിച്ചിരുന്ന കെട്ടിടത്തിന് താഴെ ടാക്സിയുടെ വലിയൊരു നിരയുണ്ട്. ഇവിടേക്ക് സിനിമയുടെ പോസ്റ്ററുമായി ചെന്നു. ഓരോ ഡ്രൈവറുടെ അടുത്ത് ചെന്ന് പോസ്റ്റർ പതിക്കാമോ എന്ന് ചോദിച്ചെങ്കിലും നിരാശയായിരുന്നു ഫലം.

പുതിയ നടീനടന്മാരുടെ സിനിമകളുടെ പോസ്റ്റർ പതിക്കാൻ തങ്ങളുടെ ടാക്സിയിൽ ഇടമില്ലെന്നായിരുന്നു അവർ പറഞ്ഞത്.

മാത്രമല്ല, പോസ്റ്റർ നോക്കിയതിന് ശേഷം ആരാണ് ആമിർ ഖാൻ, ആരാണ് ജൂഹി ചൗള എന്നും അവർ തന്നോട് ചോദിച്ചു.

താൻ തന്നെയാണ് ഈ ചിത്രത്തിലെ നായിക ജൂഹി ചൗള എന്ന് പറഞ്ഞപ്പോൾ അവർ അത് വിശ്വസിച്ചില്ലെന്നും വേഗം സ്ഥലം വിടാനുമായിരുന്നു പറഞ്ഞതെന്ന് ജൂഹി പറയുന്നു.

എന്നാൽ, ടാക്സി ഡ്രൈവർമാരിൽ ഒരാൾ തന്നോട് മാന്യമായി പെരുമാറി. അദ്ദേഹത്തിന്റെ കാറിൽ പോസ്റ്റർ പതിക്കാനും അനുവദിച്ചുവെന്നും ജൂഹി പറയുന്നു. 33 വർഷം മുമ്പ് നടന്ന സംഭവമാണെങ്കിലും ഇന്ന് താനത് വ്യക്തമായി ഓർക്കുന്നുവെന്നും താരം.