മുൻ ഭാര്യയ്ക്കും സഹോദരനുമെതിരെ 100 കോടിയുടെ മാനനഷ്ടക്കേസ് നൽകി നവാസുദ്ദീൻ സിദ്ദീഖി

മുൻ ഭാര്യയ്ക്കും സഹോദരനുമെതിരെ 100 കോടിയുടെ മാനനഷ്ട കേസ് ഫയൽ ചെയ്ത് ബോളിവുഡ് നടൻ നവാസുദ്ദീൻ സിദ്ദീഖി. മാർച്ച് 30 ന് നടന്റെ ഹർജി കോടതി പരിഗണിക്കും.

നവാസുദ്ദീന്റെ മുൻ ഭാര്യ ആലിയ, സഹോദരൻ ഷംസുദ്ദീൻ എന്നിവർക്കെതിരെയാണ് കേസ് നൽകിയിരിക്കുന്നത്. ഇരുവരും നടത്തിയ തെറ്റിദ്ധാരണയുണ്ടാക്കുന്ന പ്രസ്താവനകൾ കാരണം മാനഹാനിയും ഉപദ്രവവും നേരിട്ടുവെന്നാണ് ഹർജിയിൽ പറയുന്നത്.

തുടർന്നും തന്നെ അപകീർത്തിപ്പെടുത്തുന്നതിൽ നിന്ന് ഇരുവരെയും തടയാൻ കോടതി ഉത്തരവിടണമെന്ന് ഹർജിയിൽ ആവശ്യപ്പെടുന്നു. സോഷ്യൽമീഡിയയിൽ തനിക്കെതിരെ ഇരുവരും നടത്തിയ അപകീർത്തികരമായ ആരോപണങ്ങൾ പിൻവലിക്കണമെന്നും ഭാവിയിൽ ഇത്തരം ഉള്ളടക്കങ്ങൾ പോസ്റ്റ് ചെയ്യുന്നതിൽ നിന്ന് ഇവരെ വിലക്കണമെന്നുമാണ് നടന്റെ ആവശ്യം.

തന്നെ അപകീർത്തിപ്പെടുത്തിയതിൽ ഇരുവരും പരസ്യമായി മാപ്പ് പറയണമെന്നുമാണ് താരത്തിന്റെ ആവശ്യം. തെറ്റായതും ദുരുദ്ദേശ്യപരവുമായ വിവരങ്ങൾ കൈമാറാൻ തങ്ങൾ സമീപിച്ച ആളുകളെക്കുറിച്ച് പൂർണ്ണമായ വെളിപ്പെടുത്തൽ നടത്താൻ കോടതി ഇരുവരോടും നിർദേശിക്കണമെന്നാണ് ഹർജിയിലെ മറ്റൊരു ആവശ്യം.

സഹോദരനെതിരെ ഗുരുതരമായ സാമ്പത്തിക ആരോപണങ്ങളാണ് നവാസുദ്ദീൻ ഉന്നയിച്ചിരിക്കുന്നത്. സിനിമാ താരമാകാനുള്ള വ്യക്തിത്വമില്ലെന്ന് പറഞ്ഞ് കുടുംബാംഗങ്ങൾ തന്നെ നിരുത്സാഹപ്പെടുത്തിയിരുന്നു. എന്നിട്ടും സിനിമാ ലോകത്ത് സ്വന്തമായ ഇടം നേടാൻ തനിക്ക് കഴിഞ്ഞു.

2008 ൽ ജോലിയില്ലെന്ന് പറഞ്ഞ് സഹോദരൻ സമീപിച്ചിപ്പോൾ, തന്റെ മാനേജരായി നിയമിച്ചു. അഭിനയത്തിലേക്ക് താൻ പൂർണ ശ്രദ്ധ നൽകിയപ്പോൾ ഓഡിറ്റിങ്, ആദായനികുതി റിട്ടേണുകൾ ഫയൽ ചെയ്യൽ, ജിഎസ്ടി, ഡ്യൂട്ടി അടയ്ക്കൽ തുടങ്ങിയ സാമ്പത്തിക കാര്യങ്ങളെല്ലാം സഹോദരനെയാണ് ഏൽപ്പിച്ചത്.

ഷംസുദ്ദീനെ പൂർണമായി വിശ്വസിച്ച് തന്റെ ക്രെഡിറ്റ് കാർഡുകളും ഡെബിറ്റ് കാർഡുകളും എടിഎം, ഒപ്പിട്ട ചെക്ക് ബുക്ക്, ബാങ്ക് പാസ്‌വേഡുകൾ, ഇമെയിൽ പാസ് വേർഡ് തുടങ്ങി എല്ലാം കൈമാറി. എന്നാൽ പകരം തന്നെ വഞ്ചിക്കുകയാണ് സഹോദരൻ ചെയ്തതെന്നും ഹർജിയിൽ നവാസുദ്ദീൻ പറയുന്നു.

തന്നോട് വിശ്വാസ വഞ്ചന കാണിക്കുകയും സാമ്പത്തികമായി ക്രമക്കേട് നടത്തുകയും ചെയ്തു. സിനിമയിൽ തിരക്കേറിയതിനിടയിൽ സഹോദരന്റെ ബാങ്ക് ഇടപാടുകളെ കുറിച്ചോ ചെലവുകളെ കുറിച്ചോ അന്വേഷിച്ചില്ല. തന്റെ പേരിൽ വസ്തു വാങ്ങുന്നു എന്നു പറഞ്ഞ് രണ്ടു പേരുടേയും പേരിൽ വാങ്ങിക്കുകയായിരുന്നു അയാൾ ചെയ്തത്.

യാരി റോഡിലെ ഒരു ഫ്ലാറ്റ്, യാരി റോഡിൽ തന്നെ സെമി-കൊമേഴ്സ്യൽ പ്രോപ്പർട്ടി, ഷാഹ്പൂരിലെ ഒരു ഫാം ഹൗസ്, ബുൽധാനയിലെ ഒരു സ്ഥലം, ദുബായിലെ ഒരു സ്ഥലം എന്നിവയാണ് വാങ്ങിയത്. ഇതുകൂടാതെ ബിഎംഡബ്ല്യു, റേഞ്ച് റോവറുകൾ, ഡ്യുക്കാട്ടി തുടങ്ങി 14ഓളം വാഹനങ്ങൾ വാങ്ങിക്കൂട്ടി.