'കാപ്പ' പൃഥ്വിരാജ് - ഷാജി കൈലാസ് ടീം വീണ്ടും ഒന്നിക്കുന്നു; ഒപ്പം മഞ്ജു വാര്യരും ആസിഫ് അലിയും'

തിയേറ്ററുകളില്‍ വന്‍ വിജയം നേടിയ കടുവയ്ക്ക് ശേഷം പൃഥ്വിരാജ് - ഷാജി കൈലാസ് ടീം വീണ്ടും ഒന്നിക്കുന്ന 'കാപ്പ' സിനിമ തിരുവനന്തപുരത്ത് ആരംഭിച്ചു.ഫെഫ്ക റൈറ്റേഴ്‌സ് യുണിയന് വേണ്ടി ജി ആർ ഇന്ദുഗോപന്റെ രചനയിൽ ഒരുങ്ങുന്ന ചിത്രത്തിന്‍റെ പൂജ തിരുവനന്തപുരം വിജെടി ഹാളില്‍ നടന്നു. 

പ്രമുഖ തിരക്കഥാകൃത്ത് എസ്.എൻ സ്വാമിയാണ് സ്വിച്ച് ഓൺ കർമ്മം നിർവഹിച്ചത്. ജഗദീഷ് ഫസ്റ്റ് ക്ലാപ്പ് നിർവ്വഹിച്ചു. പൃഥ്വിരാജിനൊപ്പം ആസിഫ് അലി, മഞ്ജു വാര്യര്‍ എന്നിവരാണ് കേന്ദ്ര കഥാപാത്രങ്ങളെ അവതരിപ്പിക്കുക. നടി അന്നാ ബെന്നും ഒരു പ്രധാന വേഷത്തിലെത്തുന്നുണ്ട്.

പൃഥ്വിരാജ്, ആസിഫ്‌ അലി,ഷാജി കൈലാസ്, ജി.ആര്‍ ഇന്ദുഗോപന്‍ എ.കെ സാജൻ, ജിനു വി, എബ്രഹാം തുടങ്ങിയ പ്രമുഖ വ്യക്തികളും പൂജാകർമ്മത്തിൽ പങ്കെടുത്തു. 

ചിത്രത്തിനുവേണ്ടി 60 ദിവസത്തെ ഡേറ്റാണ് പൃഥ്വിരാജ് നൽകിയിരിക്കുന്നത്. വലിയ ഒരു ഇടവേളക്കുശേഷം ആണ് പൃഥ്വിരാജ് തന്‍റെ ജന്മനാട് കൂടിയായ തലസ്ഥാന നഗരിയിൽ വീണ്ടും ചിത്രീകരണവുമായി ബന്ധപ്പെട്ട് എത്തുന്നത്.

ഇന്ദുഗോപന്‍റെ പ്രശസ്ത നോവലായ ശംഖുമുഖിയെ അടിസ്ഥാനപ്പെടുത്തിയാണ് ചിത്രത്തിന്‍റെ തിരക്കഥ ഒരുങ്ങുന്നത്. ഇന്ദുഗോപൻ തന്നെയാണ് ചിത്രത്തിന്‍റെ രചനയും നിർവഹിക്കുന്നത്. തിരുവനന്തപുരത്തെ ലോക്കൽ ഗുണ്ടകളുടെ പശ്ചാത്തലത്തിലാണ് ചിത്രത്തിന്‍റെ കഥ പറയുന്നത്.

പൃഥ്വിരാജിനെ കൂടാതെ മഞ്ജു വാര്യർ ആസിഫ് അലി എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മഞ്ജു വാര്യർ അടുത്താഴ്ച ചിത്രത്തിൽ ജോയിൻ ചെയ്യും. ദിലീഷ് പോത്തൻ, ജഗദീഷ്, നന്ദു എന്നിവരും ചിത്രത്തിന്‍റെ താരനിരയിൽ ഉണ്ട്. ജോമോൻ ടി.ജോൺ ചായഗ്രഹണം നിർവഹിക്കുന്നു. ആർട്ട് ഡയറക്ടർ ദിലീപ് നാഥ്, എഡിറ്റർ ഷമീർ മുഹമ്മദ്, പ്രൊഡക്ഷൻ കൺട്രോളർ സഞ്ജു വൈക്കം, പി.ആർ.ഒ-ശബരി