മാർക്ക് അല്ല പ്രശ്നം; 2000ൽ SSLC എഴുതിയ ഹതഭാഗ്യൻ ആകാൻ കാരണവുമായി ഒമർ ലുലു

കഴിഞ്ഞ കുറെ ദിവസങ്ങളായി എസ്.എസ്.എൽ.സി പരീക്ഷയും അതിൽ എ പ്ലസ് കിട്ടിയവരും കിട്ടാത്തവരുമാണല്ലോ എല്ലായിടത്തും ചർച്ചാ വിഷയം. മാർക്ക് വാങ്ങിയവരാണ് മിടുക്കർ എന്നും അല്ല, മറുപക്ഷമാണ് മിടുക്കർ എന്നുമെല്ലാം ചർച്ചകൾ പൊടിപാറുകയാണ്. അതിനിടയിൽ തന്റെ പഴയ എസ്.എസ്.എൽ.സി. ബുക്ക് പോസ്റ്റ് ചെയ്തിരിക്കുകയാണ് സംവിധായകൻ ഒമർ ലുലു

പലരും കരുതും മാർക്കിനെ കുറിച്ചാണ് പറയാൻ പോകുന്നതെന്ന്, അല്ലേ. എന്നാൽ അല്ല, ഒരു അഡാർ ലവ്, ചങ്ക്‌സ് തുടങ്ങിയ സ്കൂൾ, ക്യാമ്പസ് ചിത്രങ്ങൾ ഒരുക്കിയ ആളാണ് ഒമർ ലുലു. ഇതിലെല്ലാം തന്നെ പഠിപ്പി വിഭാഗത്തെ ലവലേശം തട്ടാതെയാണ് സംവിധായകൻ കഥാപാത്രങ്ങളെ തിരഞ്ഞെടുത്തത്. വലുതല്ലെങ്കിലും തരക്കേടില്ലാത്ത മാർക്ക് ഉണ്ട് ഒമറിന്. എന്നിരുന്നാലും താൻ ഒരു ഹതഭാഗ്യൻ ആണെന്നാണ് ഇദ്ദേഹത്തിന്റെ വയ്പ്പ്. അതിനു കാരണമുണ്ട് (തുടർന്ന് വായിക്കുക)

മൊത്തം 379 മാർക്ക് നേടിയിട്ടുണ്ട് ഒമർ. ഫിസിക്സിനാണ് ഏറ്റവും ഉയർന്ന മാർക്ക്, 42. ഫസ്റ്റ് ക്ലാസ് കിട്ടിയിട്ടുമുണ്ട്. ഇനി മാർക്ക് കുറഞ്ഞ വിഷയമാണോ? അതുമല്ല. സംഭവം പാസ് ആയ വർഷമാണ്, 2000

'2000 മാർച്ചിൽ SSLC പരീക്ഷ എഴുതിയവർ ആണ് ഹതഭാഗ്യവൻമാർ. മന്ത്രി പി.ജെ.ജോസഫ് പ്രീഡിഗ്രി നിർത്തി', അതാണ് പ്രശ്നം. കോളേജ് കുമാരനാവേണ്ടിയിരുന്ന ഒമറും ബാച്ചുകാരും പിന്നെ കോളേജ് കാണാൻ രണ്ടു കൊല്ലം പ്ലസ് വൺ, പ്ലസ് ടു പൂർത്തിയാക്കേണ്ടി വന്നു

ഹാപ്പി വെഡിങ് എന്ന സിനിമയിലാണ് ഒമറിന്റെ തുടക്കം. 'ധമാക്ക' ഒഴികെയുള്ള സിനിമകൾ എല്ലാം വിദ്യാർത്ഥി ജീവിതത്തിലെ നുറുങ്ങുകൾ ചേർത്തുവച്ച് ഇറക്കിയതാണ്

ഇനി വരാനിരിക്കുന്നത് ബാബു ആന്റണി ചിത്രം 'പവർസ്റ്റാർ' ആണ്. ഒരു മുഴുനീള ആക്ഷൻ ചിത്രമായിരിക്കും ഇത്. ഒമറിന്റെ ധമാക്കയാണ് 2020ൽ ആദ്യമായി റിലീസ് ചെയ്ത മലയാള ചിത്രം

ഉർവശിയും മുകേഷും പ്രധാനകഥാപാത്രങ്ങളായ ധമാക്കയിലെ സ്റ്റിൽ