'രാജ്യദ്രോഹികള്‍ക്കെതിരെ പ്രതികരിക്കുന്നതിനാല്‍ വര്‍ഷം തോറും കോടികളുടെ നഷ്ടം'; കങ്കണ റണാവത്ത്

ദേശവിരുദ്ധര്‍ക്കെതിരെ സംസാരിച്ചതുമൂലം പ്രതിവര്‍ഷം 30-40 കോടി രൂപയുടെ നഷ്ടമുണ്ടായതായി നടി കങ്കണ റണാവത്ത്. രാഷ്ട്രീയ വിഷയങ്ങളില്‍ പ്രതികരിച്ചതിനാല്‍ 25ഓളം ബ്രാന്‍ഡുകളുമായി ഏര്‍പ്പെട്ടിരുന്ന കാരാറുകളില്‍ നിന്ന് തന്നെ ഒഴിവാക്കിയെന്ന് താരം സമൂഹ മാധ്യമങ്ങളിലൂടെ വെളിപ്പെടുത്തി.

തനിക്ക് എന്താണോ പറയാനുള്ളത് അത് പറയും. അതിന്റെ പ്രത്യാഘാതം പണം നഷ്ടമാകുന്നത് ആയാല്‍ പോലും, അങ്ങനെയാകട്ടെ-എന്ന ഇലോണ്‍ മസ്‌കിന്റെ വാക്കുകള്‍ പങ്കുവെച്ചായിരുന്നു കങ്കണയുടെ വെളിപ്പെടുത്തല്‍.

ഇതാണ് സ്വാതന്ത്ര്യത്തിന്റേയും വിജയത്തിന്റെയും യഥാര്‍ത്ഥ സ്വഭാവം. ഹിന്ദുമതത്തിന് വേണ്ടിയും രാഷ്ട്രീയക്കാര്‍ക്കെതിരേയും രാജ്യദ്രോഹികള്‍ക്കെതിരേയും തുക്‌ഡേ തുക്‌ഡേ ഗാങ്ങുകള്‍ക്കെതിരേയും സംസാരിച്ചതിന് ഇരുപത്തിയഞ്ചോളം ബ്രാന്‍ഡുകളാണ് തന്നെ ഒരൊറ്റ രാത്രി കൊണ്ട് ഒഴിവാക്കിയത്. അത് ശരാശരി ഒരു വര്‍ഷം 30-40 കോടിയോളം വരും എന്നാല്‍, താന്‍ ഇപ്പോള്‍ സ്വതന്ത്രയാണെന്നും തന്നെ തടയാന്‍ ആര്‍ക്കും സാധിക്കില്ലെന്നും കങ്കണ വ്യക്തമാക്കി.

ന്ത്യയുടെ സംസ്‌കാരത്തിനെതിരേയും വൈവിധ്യത്തിനെതിരേയും കുത്തക കമ്പനികള്‍ നടത്തുന്ന അജണ്ടകള്‍ ഇനിയും തുറന്നു പറയുക തന്നെ ചെയ്യുമെന്നും കങ്കണ പറയുന്നു.

ഇലോണ്‍ മസ്‌കിനെ അഭിനന്ദിക്കുന്നു, കാരണം എല്ലാവരും അവരുടെ ദൗര്‍ബല്യത്തെയാണ് പുറത്ത് കാണിക്കുന്നത്. ധനികനായ ഒരു വ്യക്തി പണത്തിനെക്കുറിച്ച് വ്യാകുലപ്പെടുന്നില്ലല്ലോ. കൂടുതല്‍ സമ്പന്നരായവര്‍ കൂടുതല്‍ ദരിദ്രരാകുന്നതാണ്'താന്‍ കാണാറുള്ളതെന്നും കങ്കണ കൂട്ടിച്ചേര്‍ത്തു.

സിനിമാ മേഖലയിൽ നിലനിൽക്കുന്ന പ്രശ്‌നങ്ങളെക്കുറിച്ച് കങ്കണ തന്റെ അഭിപ്രായം തുറന്നുപറഞ്ഞിട്ടുണ്ട്.  1977ലെ അടിയന്തരാവസ്ഥാ കാലത്തെ പ്രമേയമാക്കി കങ്കണ സംവിധാനം ചെയ്യുന്ന എമര്‍ജന്‍സി എന്ന ചിത്രമാണ് താരത്തിന്‍റെ പുതിയ ചിത്രം. ഇന്ദിരാഗാന്ധിയുടെ റോളിലാണ് കങ്കണ എത്തുക. ചിത്രത്തിന്‍റെ നിര്‍മ്മാതാവും കങ്കണയാണ്.