ചില രംഗങ്ങൾ അഭിനയിക്കാൻ തയ്യാറായില്ല; പ്രിയങ്ക ചോപ്രയ്ക്ക് ബോളിവുഡിൽ അവസരങ്ങൾ കുറഞ്ഞത് ഇതുകൊണ്ടെന്ന് അമ്മ

ഇന്ത്യൻ സിനിമയുടെ ആഗോള ഐക്കൺ ആയാണ് പ്രിയങ്ക ചോപ്രയെ വിശേഷിപ്പിക്കുന്നത്. നടിയുടെ മകൾ മാൽതി മേരി ചോപ്ര ജോനാസിനും അമ്മ മധു ചോപ്രയ്ക്കും ഒപ്പം നിലവിൽ ഇന്ത്യയിലാണ് പ്രിയങ്ക ചോപ്രയുള്ളത്.

പ്രിയങ്ക ചോപ്രയും റിച്ചാർഡ് മാഡനും വേഷമിടുന്ന പുതിയ വെബ് സീരീസ് സിറ്റാഡലിന്റെ പ്രമോഷന്റെ തിരക്കിലാണ് പ്രിയങ്ക. സിറ്റാഡലിന്റെ അമേരിക്കൻ പതിപ്പിന് വലിയ സ്വീകാര്യതയായിരുന്നു. സ്‌പൈ-ത്രില്ലർ പരമ്പരയാണ് സിറ്റാഡൽ. പരമ്പരയുടെ ആദ്യ രണ്ട് എപ്പിസോഡുകള്‍ ഏപ്രില്‍ 28-നും തുടര്‍ന്ന് മേയ് 26 മുതല്‍ ആഴ്ചതോറും ഓരോ എപ്പിസോഡ് വീതവും ഇറങ്ങും.

അടുത്തിടെ ഒരു അഭിമുഖത്തിൽ പ്രിയങ്കയുടെ കരിയറിനെ കുറിച്ചും ചില രംഗങ്ങളിൽ അഭിനയിക്കാൻ വിസമ്മതിച്ചതിനാൽ ചില വേഷങ്ങൾ നഷ്ടമായതിനെ കുറിച്ചും പ്രിയങ്കയുടെ അമ്മ മധു സംസാരിച്ചിരുന്നു.

പ്രിയങ്ക ചോപ്ര 2000-ൽ ലോകസുന്ദരിയായി കിരീടമണിഞ്ഞു. അതിനുശേഷം ചലച്ചിത്രരംഗത്തേക്ക് കടന്നു വന്നു. 2002-ൽ വിജയ് നായകനായ തമിഴൻ എന്ന തമിഴ് ചിത്രത്തിലൂടെ അഭിനയരംഗത്ത് അരങ്ങേറ്റം കുറിച്ച പ്രിയങ്ക പിന്നീട് 2003-ൽ തന്റെ ആദ്യ ബോളിവുഡ് ചിത്രമായ ദി ഹീറോ: ലവ് സ്‌റ്റോറി ഓഫ് എ സ്പൈയിൽ പ്രത്യക്ഷപ്പെട്ടു.

‌പ്രിയങ്കയുടെ സിനിമാ ജീവിതത്തിന്റെ പ്രാരംഭ ഘട്ടമായിരുന്നു അതെന്ന് പ്രിയങ്കയുടെ അമ്മ മധു ചോപ്ര ഓർക്കുന്നു. പിന്നീട് വിവിധ ഭാഷകളിലായി ഒട്ടനവധി ചിത്രങ്ങളിൽ പ്രിയങ്ക അഭിനയിച്ചു. തെന്നിന്ത്യയിലും ഹിന്ദിയിലുമായി കുറേക്കാലം തിരക്കുള്ള നടി ആയി പ്രിയങ്ക ചുരുങ്ങിയ കാലത്തിനുള്ളിൽ മാറി.

മുംബൈയിൽ പുതിയതായതിനാൽ, സിനിമാ വ്യവസായം എങ്ങനെ പ്രവർത്തിക്കുന്നുവെന്ന് മധുവിനും പ്രിയങ്കയ്ക്കും അറിയില്ലായിരുന്നു. തൽഫലമായി മധു പ്രിയങ്കയ്‌ക്കൊപ്പം അവളുടെ സ്‌ക്രിപ്റ്റ് റീഡിംഗുകളിലും മീറ്റിംഗുകളിലും മറ്റും പോയിരുന്നു. "കാഴ്ചയില്ലാത്തവർ കാഴ്ചയില്ലാത്തവരെ നയിക്കുന്നത്" പോലെയായിരുന്നു കാര്യങ്ങൾ മുന്നോട്ട് പോയിരുന്നത്.

നിരവധി സിനിമ അവസരങ്ങൾ പ്രിയങ്കയ്ക്ക് നഷ്ടമായതിന്റെ കാരണങ്ങളും മധു വിശദീകരിച്ചു. "പ്രിയങ്ക വൈകുന്നേരം 7-7.30 ന് ശേഷം ഏതെങ്കിലും മീറ്റിംഗുകളിൽ പങ്കെടുക്കുകയോ പുറത്തുപോകുകയോ പൊതുപരിപാടികളിൽ പങ്കെടുക്കുകയോ ചെയ്യില്ലെന്ന് ഞങ്ങൾ ഒരിക്കൽ തീരുമാനിച്ചു, ഇഷ്ടമില്ലാത്തത് അവൾ ചെയ്യില്ല, അവൾ ആ തീരുമാനത്തിൽ ഉറച്ച് നിന്നു.

സിനിമയിൽ അനാവശ്യമായി തോന്നിയ ചില രംഗങ്ങളിൽ അഭിനയിക്കാൻ അവൾ വിസമ്മതിച്ചു. അതോടുകൂടി കിട്ടുമായിരുന്ന ഒട്ടനവധി സിനിമകൾ പ്രിയങ്കയ്ക്ക് നഷ്ടമായി. പക്ഷെ എനിക്കോ പ്രിയങ്കയ്ക്കോ അതിൽ നഷ്ട്ടബോധമൊന്നുമില്ല. ബോളിവുഡിൽ തുടരണമെന്ന് യാതൊരു നിർബന്ധവും ആവശ്യവും അവൾക്കില്ല.

അവൾക്ക് ധാരാളം കാര്യങ്ങൾ ചെയ്യാനാകും. പഠനം പുനരാരംഭിക്കാനോ മറ്റ് കാര്യങ്ങൾ അന്വേഷിക്കാനോ ഒക്കെ അവസരമുണ്ട്. ജോഷ് ടോക്ക്സ് ആഷയുമായുള്ള സംഭാഷണത്തിനിടെ പ്രിയങ്കയുടെ അമ്മ മധു പറഞ്ഞു.