അഭിനയം തുടങ്ങിയിട്ട് 22 വർഷം; നായകന് തുല്യമായി പ്രതിഫലം ലഭിക്കുന്നത് ആദ്യമായെന്ന് പ്രിയങ്ക ചോപ്ര

23 വർഷമായി പ്രിയങ്ക ചോപ്രയെ ബിഗ് സ്ക്രീനിൽ ആരാധകർ കണ്ടു തുടങ്ങിയിട്ട്. 2000 ൽ മിസ് വേൾഡായി തിരഞ്ഞെടുക്കപ്പെട്ടതിനു ശേഷം തെന്നിന്ത്യൻ സിനിമകളിലും ബോളിവുഡിലും അഭിനയിച്ചു തുടങ്ങിയ താരം ഇന്ന് ഹോളിവുഡിലേയും സുപരിചത മുഖമാണ്.

2002 ൽ പുറത്തിറങ്ങി തമിഴൻ എന്ന തമിഴ് ചിത്രത്തിലൂടെയാണ് പ്രിയങ്ക ചോപ്ര വെള്ളിത്തിരയിൽ എത്തുന്നത്. 2003 ൽ ആദ്യ ബോളിവുഡ് ചിത്രത്തിലും താരം അഭിനയിച്ചു. പിന്നീട് നിരവധി സൂപ്പർ ഹിറ്റ് ചിത്രങ്ങളിൽ നായികയായി ബോളിവുഡിലെ മുൻനിര നടിയായി.

സിനിമാ മേഖലയിൽ നായികമാർക്ക് തുല്യ വേതനം എന്ന ആവശ്യം ഏറെ നാളായി ചർച്ചയിലുണ്ട്. നായകന്മാർക്ക് ലഭിക്കുന്ന പ്രതിഫലത്തിന്റെ പകുതി പോലും പലപ്പോഴും മുൻനിര നായികമാര‍്ക്ക് ലഭിക്കാറില്ല എന്നതാണ് യാഥാർത്ഥ്യം. ഇതിനെ സാധൂകരിക്കുന്നതാണ് പ്രിയങ്ക ചോപ്ര മുമ്പൊരിക്കൽ പറഞ്ഞതും.

ഇന്ത്യയിലെ മുൻ നിര നായകന്മാർ അമ്പതും നൂറും കോടി രൂപ വരെ പ്രതിഫലമായി വാങ്ങുമ്പോൾ അതേ സിനിമയിൽ നായികമാരായി എത്തുന്ന മുൻനിര നായികമാരുടെ ഏറ്റവും കൂടിയ പ്രതിഫലം 15 കോടി മാത്രമാണ്. നിലവിൽ ആലിയ ഭട്ട്, ദീപിക പദുകോൺ എന്നിവർക്കാണ് ഇത്രയും പ്രതിഫലമുള്ളതും.

തെന്നിന്ത്യൻ സിനിമയിലെ സൂപ്പർ നായികമാരായ സാമന്ത, നയൻതാര എന്നിവർക്കു പോലും പത്ത് കോടിയിൽ താഴെ മാത്രമാണ് പ്രതിഫലം. തിയേറ്ററിൽ സ്വന്തം നിലയിൽ ആളുകളെ എത്തിക്കാൻ പ്രാപ്തിയുള്ള നായികമാരാണ് ഇവർ എന്നതും ശ്രദ്ധേയമാണ്.

ബോളിവുഡിൽ താൻ അഭിനയിച്ച സിനിമകളിൽ നായകന് ലഭിക്കുന്നതിന്റെ വെറും പത്ത് ശതമാനം മാത്രമാണ് പലപ്പോഴും തനിക്ക് പ്രതിഫലമായി ലഭിക്കാറുണ്ടായിരുന്നത് എന്നാണ് പ്രിയങ്ക ചോപ്ര വെളിപ്പെടുത്തിയത്. 22 വർഷമായി സിനിമയിൽ തുടർന്നിട്ടും നായകന് തുല്യമായ വേതനം തനിക്ക് ലഭിച്ചിട്ടില്ലെന്നും പ്രിയങ്ക മുമ്പൊരിക്കൽ പറഞ്ഞിരുന്നു.

ബോളിവുഡിൽ നിന്നും ഹോളിവുഡിലേക്ക് ചേക്കേറിയപ്പോഴാണ് സഹപ്രവർത്തകരായ പുരുഷന്മാർക്ക് തുല്യമായ പ്രതിഫലം തനിക്ക് ലഭിച്ചതെന്നും പ്രിയങ്ക പറയുന്നു. പുതിയ ഹോളിവുഡ് സീരീസ് സിറ്റാഡലിലാണ് പ്രിയങ്കയ്ക്ക് നായകന് തുല്യമായ വേതനം ലഭിച്ചതെന്നാണ് വെളിപ്പെടുത്തൽ.

അഭിനയ ലോകത്ത് വിജയകരമായ കരിയർ ഉണ്ടാക്കിയിട്ടും തുല്യ വേതനം എന്ന നിലയിലേക്ക് എത്താൻ 22 വർഷങ്ങൾ എടുത്തുവെന്നും താരം വ്യക്തമാക്കി. ആമസോൺ പ്രൈമിൽ ഏപ്രിൽ 28 മുതൽ സിറ്റാഡൽ സംപ്രേഷണം ചെയ്യും.