Ram Charan‌| ഒരു സിനിമയ്ക്ക് 100 കോടിയോ! RRR ന് പിന്നാലെ പ്രതിഫലം കുത്തനെ കൂട്ടി രാം ചരൺ

ബാഹുബലിക്ക് ശേഷം രാജമൗലിയുടെ (S. S. Rajamouli)പുതിയ ചിത്രം RRR പുറത്തിറങ്ങാനുള്ള കാത്തിരിപ്പിലാണ് ആരാധകർ. തെലുങ്ക് സിനിമയിലെ സൂപ്പർ താരങ്ങളായ രാം ചരണും (Ram Charan) ജൂനിയർ എൻടിആറും (Junior NTR) ഒപ്പം ആലിയ ഭട്ടും (Alia Bhatt) ഒന്നിച്ചെത്തുന്ന ചിത്രം ബാഹുബലിയേക്കാൾ വലിയ ദൃശ്യ വിസ്മയമായിരിക്കും ഒരുക്കുക എന്നതിൽ സംശയമില്ല.

ബാഹുബലിക്ക് ശേഷം പ്രഭാസിന്റെ താരപരിവേഷം കുതിച്ചുയർന്നിരുന്നു. ഇപ്പോഴിതാ RRR പുറത്തിറങ്ങുന്നതിന് മുമ്പ് തന്നെ രാം ചരണും ജൂനിയർ എൻടിആറിനും വേണ്ടി നിർമാതാക്കൾ കാത്തിരിക്കുകയാണെന്നാണ് റിപ്പോർട്ടുകൾ.

ടോളിവുഡിൽ നിന്നുള്ള പുതിയ റിപ്പോർട്ടുകൾ അനുസരിച്ച് രാം ചരണിന്റെ പ്രതിഫലം നൂറു കോടിയിലേക്ക് എത്തിയത്രേ. അടുത്ത വർഷം ജനുവരി 7 നാണ് ആർആർആർ പുറത്തിറങ്ങുന്നത്.

സിനിമ പുറത്തിറങ്ങുന്നതിന് മുമ്പ് തന്നെ താരത്തിന്റെ പ്രതിഫലവും കുത്തനെ ഉയർന്നിരിക്കുകയാണ്. RRR ന് ശേഷം ചെയ്യാനിരിക്കുന്ന രണ്ട് ചിത്രത്തിൽ നൂറ് കോടിയാണ് താരം പ്രതിഫലമായി വാങ്ങിക്കുന്നത്.

സംവിധായകൻ ശങ്കർ, ഗൗതം തിന്നാനുരി എന്നിവരുടെ ചിത്രങ്ങളിലാണ് രാം ചരൺ ഇത്ര വലിയ തുക പ്രതിഫലമായി വാങ്ങുന്നത്. യുവി ക്രിയേഷനാണ് ചിത്രം നിർമിക്കുന്നത്.

450 കോടി മുതൽ മുടക്കിലാണ് രാജമൗലി RRR ഒരുക്കിയിരിക്കുന്നത്. തെലുങ്കിന് പുറമേ, ഇന്ത്യയിലെ പ്രധാന ഭാഷകളിലെല്ലാം ചിത്രം ഒന്നിച്ചു പുറത്തിറങ്ങും.

RRR റിലീസിനു ശേഷം രാം ചരണിന്റെ ഒരു ചിത്രം കൂടി പുറത്തിറങ്ങാനുണ്ട്. കൊരട്ടല ശിവ യുടെ ആചാര്യയാണിത്. 2022 ഫെബ്രുവരി നാലിനാണ് ചിത്രം പുറത്തിറങ്ങുന്നത്. RRR റിലീസായതിനു ശേഷമായിരിക്കും ശങ്കർ ചിത്രം RC15 ന്റെ ചിത്രീകരണം ആരംഭിക്കുക.